Eksakto a makatawen ti napalabas idi rinugian ti Zionista nga estado ti Israel ti awan-pilpilienna a panagbomba, panagraut ken panagsakop iti Gaza Strip a daga ti Palestine. Iti suporta ti imperyalismo a US, pinainget dagiti pwersa a Zionista ti gera a henosidyo laban kadagiti Palestino, usar ti tone-tonelada a bomba tapno pulbusen ti intero a Gaza.

Saan a bumaba iti 41,000 tao, kabilang ti 27,000 babbai ken ubbing ti napapatay iti maulit-ulit a panagmasaker kadagiti sibubukel a pamilya ken komunidad. Napadisi manipud iti taeng da ti dandani kabuklan a populasyon a 2.1 milyon iti Gaza. Naigagara a pinuntirya ti panagbomba dagiti pasdek a pangnegosyo ken pagtaengan, ospital, eskwelaan, dagiti planta ti kuryente, sistema ti padanum, dagiti kalsada ken dadduma pay. Palalo a nakaro ti panagsagaba ti umili ti Gaza gapu iti bisin ken sakit, kinaawan ti mainom, pannakaperdi ti sanitasyon ken pannakaparalisa ti sistema iti salun-at. Saan a sinardengan ti Israel ti panagatake uray kadagiti tao ti midya ken kadagiti internasyunal nga ahensya a mangip-ipan ti tulong.

Bin-ig a minamaag ti panagkalkalintegan dagiti Zionista, ti US ken dagiti kaalyado da nga imperyalista a pagilyan. Ipetpetteng da a ti awan-sarday a panagbombomba iti Gaza, ket paset ti “karbengan ti Israel a salakniban ti bagi na,” idinto a ti pinuntirya daytoy ket ti awanan laban a populasyon. Ti panagbombomba iti Gaza ket agdadata a pananggasaw iti internasyunal a makatao a linteg ken dagiti nakaam-ames a krimen iti gubat.

Ti terorista a gera ti Zionista nga Israel iti Gaza ket saan a patas a sungbat iti armado a panagrukwas a naiyaramid idi Oktubre 7, 2023 ti nadumaduma a mannakigubat a makidangdangadang para iti wayawaya ti Palestine. Daydi nga aldaw, nagiruswat da kadagiti armado nga opensiba laban kadagiti base militar ken pasilidad iti Israel ken nangala da kadagiti balud. Didiay ket inyaramid ti nalawa nga intar dagiti grupo a lumablaban iti Palestine, karaman dagiti pwersa nga Islamiko (Hamas), ti People’s Front for the Liberation of Palestine, kabilang metten ti dadduma pay a demokratiko, armado ken di-armado a rebolusyonaryo a pwersa.

Ti panagalsa, a naawagan nga Operation Al-Aqsa Flood, ket nagpanggep a labanan ti kumarkaro a panangidadanes ken pulitikal a panangipawil ti Zionista nga Israel laban kadagiti Palestino iti Gaza ken iti Occupied West Bank. Tatta, didiay ket nayon a naisangsangayan a panawen ti pakasaritaan ti agtultuloy a dangadang ti umili a Palestino para iti nailyan a wayawaya ken karbengan iti bukod da a pangngeddeng.

Nasurok 75 a tawen ti napalabasen idi inyaramid dagiti pwersa a Zionista wenno ultra-nasyunalista a Hudyo, nga addaan suporta ti imperyalismo a US ken Britanya, dagiti masaker ken nadumaduma a langa ti kinaranggas tapno iyabog ti 700,000 a Palestino manipud kadagiti pagtaengan ken daga da ken usatan ti dalan tapno itakder ti estado a Hudyo ti Israel. Gapu iti Al Nakba (wenno Ti Didigra), napilitan a naglibas ken agummong dagiti Palestino agturong iti Jordan (West Bank) ken iti Gaza Strip (iti beddeng ti Egypt), wenno agkamang iti nadumaduma a paset ti lubong. Manipud 1967, sinakop ti Zionista nga Israel ti West Bank ken inkulong da dagiti Palestino kadagiti nakubong a komunidad. Ti Gaza Strip ket nagbalin a dakkel a pagbaludan a kanayon a banbantayan ken rarauten dagiti pwersa nga Israeli.

Ti kinaulpit ken barbarismo ti 75 tawen a Zionista ken imperyalista a panangidadanes ket batbatogan ti napinget ken awan-sarday a panaglaban ti umili a Palestino. Ipampamatmat da ti determinasyon da a lumaban babaen kadagiti gubat ken Intifada (Panagrukwas), nu sadinno nga inpakita ti saan a mabilang a martir ti kinatured ken awanan panagimbubukod a a sakripisyo. Ti armado nga opensiba idi Oktubre 7, 2023 ket senyal ti istorikal a panaglaban ti umili a Palestino tapno ruk-atan ti ili da manipud iti kawar ti panangidadanes.

Ti Zionista nga estado ti Israel ket naan-anay a supsuportaran ti US ken dagiti kaalyado da nga imperyalista a pagilyan. Nayon iti tinawen nga ayuda a $3.8 bilyon, nangted ti US ti saan a bumaba iti $12.5 bilyon nga ayuda a militar manipud Oktubre 2023 iti langa ti nasurok 10,000 tonelada a bombomba a naaramat iti aduan a pammapatay iti umili a Palestino. Agintutuleng daytoy iti sangalubongan a pammabalaw iti henosidyo iti Gaza, bayat a timmayok ti ganansya dagiti kumpanya nga Amerikano nga agar-aramid ti armas. Ipokrito ti panawagan ti gubyerno a Biden para iti panagsardeng ti rinnupak ken panggep na laeng nga ilinged ti papel na iti henosidyo. Ti pudno a panggep na ket agtuloy nga aramaten ti Israel a pagbatayan tapno pagtalinaeden ken papigsaen ti hegemonya na iti Middle East tapno siguraduen ti interes na iti nalawa a reserba a langis ken dadduma pay a rekurso.

Babaen ti nakalemmeng a suporta ti US, pinainget pay ti Israel ti gubat iti Middle East babaen ti panagatake iti Lebanon, Yemen, Syria ken Iran, nga agpapada a sumupsuporta iti panaglaban ti umili a Palestino iti henosidyo ti Israel. Ti panagpabettak kadagiti misayl iti Lebanon ket nangpapatay iti nasurok 500 sibilyan, kagiddan ti asasinasyon iti sumagmamano a lider ti tignay Hezbollah. Kas proxy ti US, kalikagum ti Israel a parnuayen ti nasaksaknap a gubat iti Middle East, a mangpunpuntirya kadagiti pagilyan a natibker a mangsalsalaknib iti soberanya da, nangruna ti Iran, nga inpaduyakyak ti US a kabusor na. Ti panangparparnuay ti nasaksaknap a gera ken kinagartem iti gubat ti Israel ken US ket nalawag a pagilasinan ti pannakabulok ti imperyalismo.

Iti intero a lubong, minilyon ti nagiyebkas iti nalaus a pungtot iti henosidyo iti Gaza, karaman ti okupado a West Bank. Iti laksid dagiti gandat a pawilan dagiti protesta da, kas iti US ken dadduma a pagilyan, saan da a mapaspasanud gapu ta umad-adaw da ti inspirasyon iti awan-patengga a determinasyon ti umili a Palestino ken dagiti rebolusyonaryo a pwersa da nga ituloy ti panaglaban da.

Rumbeng nga ipaay ti umili a Pilipino ti awan-patengga a suporta iti umili a Palestino iti saan a magungon a dangadang da para iti nailyan a pannakawayawaya ken karbengan iti bukod-a- pangngeddeng. Ti dangadang ti umili a Palestino ket nairut a nakasilpo iti dangadang ti umili a Pilipino, ti amin a maikuskuspil nga umili ken dagiti pagilyan a mangiruprupir iti nailyan a panagwaywayas laban iti imperyalista pannakibiang kadagiti gubat. Ti balligi ti umili a Palestino, ket balligi ti amin a maidadanes nga umili iti intero a lubong.