Iti sango ti pinainget nga operasyon kombat ken panagdarup dagiti yunit ti Armed Forces of the Philippines (AFP) kadagiti barangay iti Samar, nakaisayagkat ti isnayp ken dagiti kontra-atake ti New People’s Army (NPA)-Western Samar (Arnulfo Ortiz Command).

Idi Setyembre 16, inisnayp ti NPA dagiti nakakampo nga elemento ti 87th IB iti Barangay Canvais, Motiong, Samar. Iti pakauna nga ulat, nasugatan ti agbanbantay a tropa ti militar.

Idi Setyembre 14, immuna a nakapagpaputok dagiti Nalabbaga a mannakigubat laban iti nasabat da nga agop-operasyon a yunit ti 46th IB iti Barangay Dugungan, Jiabong. Napatay iti engkwentro ti maysa a soldado ti 46th IB bayat a maysa ti naiyulat a nakaro a nasugatan.

Idi met Setyembre 11, pinaay ti maysa a yunit ti NPA-Western Samar ti gandat a panagatake ti 46th IB iti kampo da iti Barangay Salvacion, Jiabong. Kuna ti NPA, nagkawes sibilyan ken nagpammarang a Nalabbaga a mannakigubat dagiti soldado tapno maallilaw ti masa. Naagaw dagiti Nalabbaga a mannakigubat ti inisyatiba iti labanan ken aktibo a nakapagdepensa da kontra iti kabusor.