Naiduron ti Nexperia Phils. Inc. Workers Union-National Federation of Labor Unions-Kilusang Mayo Uno ti maneydsment ti Nexperia Philippines a respetaren ti unyon ken karbengan dagiti mangmangged iti seguridad iti trabaho. Iti maysa a katulagan a nadanon idi Setyembre 18, nagkari ti kumpanya nga isubli dagiti naikkat, pawaywayen dagiti benepisyo ken padakkelen ti separation pay dagiti mangmangged sakbay a dumteng ti Oktubre 7.

Naiduron met ti unyon ti maneydsment nga agkari nga awanen ti mapasamak a panagikkat agingga iti agtapos ti tawen ken agtultuloy ti negosasyon para iti baro a collective bargaining agreement. Gapu ditoy, temporaryo nga inyatras ti unyon ti plano a welga a nagbotosan dagiti mangmangged idi Hulyo.