Eksakto nga isa ka tuig ang nagligad sang ginsugdan sang Zionista nga Israel ang wala-kaluoy nga pagpamomba, pagpanglusob kag pagpangsakop sa Gaza Strip, kadutaan sang Palestine. Sa suporta sang imperyalismong US, ginpasingki sang mga pwersa nga Zionista ang gyera nga henosidyo batuk sa mga Palestino, gamit ang tone-tonelada nga bomba para pulbuson ang bilog nga Gaza.

Indi magnubo sa 41,000 ka tawo, lakip na ang 27,000 ka kababainhan kag mga bata ang ginpatay sa pasulit-sulit nga pagmasaker sa bilog nga pamilya kag komunidad. Napalayas sa ila nga mga puluy-an ang halos bilog nga 2.1 milyon nga populasyon sang Gaza. Hungod nga gintarget sang pagpamomba ang mga bilding pangnegosyo kag puluy-an, ospital, eskwelahan, mga planta sang kuryente, sistema sang patubig, mga karsada kag iban pa. Tuman ka grabe ang pag-antus sang pumuluyo sang Gaza tungod sa gutom kag masakit, kawad-on sang mainom, pagkaguba sang sanitasyon kag paglupog sa sistema pang-ikaayong lawas. Wala gin-untatan sang pag-atake sang Israel bisan ang mga tawong midya kag mga internasyunal nga ahensya nga nagadala sang bulig.

Tuman ka dako nga kabutigan ang paghatag-rason sang mga Zionista, sang US kag sang mga kaalyado nga imperyalistang pungsod. Ginaduso nila nga ang wala-untat nga pagpamomba sa Gaza ang kabahin sang “kinamatarung sang Israel nga pangapinan ang kaugalingon,” bisan nga ang ginatarget sini ang wala-igabato nga mga populasyon. Ang pagpamomba sa Gaza ang direkta nga pagpanglapak sa internasyunal nga makitawhanon nga laye kag makangilidlis nga mga krimen sa gyera.

Ang terorista nga gyera sang Zionista nga Israel sa Gaza ang indi patas nga sabat sa armado nga pag-alsa nga ginlunsar sadtong Oktobre 7, 2023 sang nagkalain-lain nga hangaway nga nagahimakas para sa kahilwayan sang Palestine. Sadto man nga adlaw, naglunsar sila sang mga armado nga opensiba batuk sa mga base militar kag pasilidad sa Israel kag nagkuha sang mga bihag. Ginpatigayon ini sang malapad mga kubay sang mga grupo nga nagapakigbato sa Palestine, kabahin na ang pwersa nga Islamiko (Hamas), ang People’s Front for the Liberation of Palestine, pati man ang iban nga demokratiko, armado kag indi-armado nga rebolusyonaryong pwersa.

Ang pag-alsa, nga gintawag nga Operations Al-Aqsa Flood, ang nagatuyo nga pakig-batuan ang nagasingki nga pagpamigos kag pampulitika nga pagpangsumpo sang Zionista nga Israel batuk sa mga Palestino sa Gaza kag sa Occupied West Bank. Amo na ini subong ang dugang sa maragtason nga tsapter sa nagapadayon nga paghimakas sang pumuluyong Palestino para sa pungsodnon nga kahilwayan kag kinamatarung sa kaugalingon pagbuot.

Masobra 75 ka tuig na ang nagligad sang ginlunsar sang mga pwersang Zionista ukon ultra-nasyunalista nga Hudyo, nga may suporta sang imperyalismong US kag Britanya, ang mga masaker kag nagkalain-lain nga porma sang kapintas agud tabugon ang 700,000 Palestino halin sa ila mga puluy-an kag duta kag hawanan ang dalan para tukuron ang estado nga Hudyo sang Israel. Tungod sa Al Nakba (ukon Ang Kalamidad), napilitan nga magpalagyo kag magtipon ang mga Palestino padulong sa Jordan (West Bank) kag sa Gaza Strip (sa dulunan sang Egypt), ukon magdangop sa nagkalain-lain nga bahin sang kalibutan. Sugod sadtong 1967, ginsakop sang Zionista nga Israel ang West Bank kag ginbilanggo ang mga Palestino sa mga ginkudal nga komunidad. Ang Gaza Strip ang nangin dako nga bilangguan nga permi ginabantayan kag ginalusob sang mga pwersang Israeli.

Ang kapintas kag barbarismo sang 75 ka tuig nga Zionista kag imperyalista nga pagpamigos ang ginatumbasan lamang sang matutom kag wala nagatahaw nga pagbato sang pumuluyong Palestino. Ginapakita nila ang ila determinasyon nga magbato paagi sa mga inaway kag Intifada (Pag-alsa), kon sa diin ginpakita ang kaisog kag wala pagpangduha-duha nga sakripisyo sang indi maisip nga martir. Ang armado nga opensiba sadtong Oktobre 7, 2023 ang palantadaan nga bato sang makasaysayan nga pagbato sang pumuluyong Palestino para hilwayon ang ila pungsod halin sa kadena sang pagpamigos.

Ang Zionista nga estado sang Israel ang lubos nga ginasuportahan sang US kag mga kaalyado nga imperyalista nga pungsod. Dugang sa tuigan nga ayuda nga $3.8 bilyon, naghatag ang US sang indi magnubo sa $12.5 bilyon nga ayuda militar halin Oktobre 2023 sa porma sang masobra 10,000 ka tonelada nga mga bomba nga gingamit sa madamuan nga pagpatay sa pumuluyong Palestino. Nagpabungol-bungol ini sa pangkalibutanon nga pagbatikos sa henosidyo sa Gaza, samtang nagasirit ang ganansya sang mga kumpanya nga Amerikano nga nagahimo sang armas. Ipokrito ang panawagan sang gubyernong Biden para sa untat-lupok kag katuyuan lang nga panason ang ila papel sa henosidyo. Ang matuod sini nga katuyuan ang padayon nga gamiton ang Israel nga tungtungan para ipabilin kag pabaskugon ang dominasyon sini sa Middle East para sigurohon ang iya nga interes sa malapad nga reserba nga lana kag iban pa nga rekurso.

Angkon ang patago nga suporta sang US, ginpasingki pa sang Israel ang gyera sa Middle East paagi sa pag-atake sa Lebanon, Yemen, Syria kag Iran, nga pareho nga hugot nga nagasuporta sa pagbato sang pumuluyong Palestino sa henosidyo sang Israel. Ang pagpalupok sang misayl sa Lebanon ang nagpatay sa masobra 500 ka sibilyan, kadungan sa asasinasyon sang pila ka lider sang kahublagan nga Hezbollah. Bilang proxy sang US, gusto sang Israel nga sulsolan ang mas malapad nga gyera sa Middle East, nga nagatarget sa mga pungsod nga mabakod nga nagapangapin sa ila nga soberanya, ilabi na ang Iran, nga hayagan nga gindeklarar sang US nga kaaway sini. Ang pagpangsulsol sang mas malapad nga gyera kag pagka-uhaw sa gyera sang Israel kag US ang maathag nga mga palatandaan sang pagkabangkarote sang imperyalismo.

Sa bilog nga kalibutan, minilyon ang nagpahayag sang ila sobra nga kaakig sa henosidyo sa Gaza, pati na sa okupado nga West Bank. Sa pihak sang mga pagtinguha nga sumpuon ang ila nga mga protesta, pareho sang US kag iban nga pungsod, wala sila napa-atras tungod nagakuha sila sang inspirasyon sa wala katapusan nga determinasyon sang pumuluyong Palestino kag ila mga rebolusyonaryo nga pwersa nga ipadayon ang ila pakigbato.

Dapat ihatag sang pumuluyong Pilipino ang wala-katubtuban nga suporta sa pumuluyong Palestino sa wala nagakahanaw nila nga paghimakas para sa pungsodnon nga kahilwayan kag kinamatarung sa pagbuot-sa-kaugalingon. Ang paghimakas sang pumuluyong Palestino ang hugot nga naka-angot sa paghimakas sang pumuluyong Pilipino, sang tanan nga pigos nga pumuluyo kag mga pungsod nga nagapangapin sa pungsodnon nga independensya batuk sa imperyalistang pagpasilabot kag mga gyera. Ang kadalag-an sang pumuluyong Palestino, ang kadalag-an sang tanan nga pigos nga pumuluyo sa bilog nga kalibutan.