Halin Luzon tubtob Mindanao, padayon nga nagapanalasa sa kabukiran ang Retooled Community Support Program (RCSP) sang mga yunit sang Armed Forces of the Philippines. Ang programa nga ini ang napaidalom sa Development Support and Security Plan sang “Oplan Kapayapaan” nga programa pa sang rehimen Duterte nga ginpadayon ni Ferdinand Marcos Jr.

Ang RCSP, sa esensya, amo ang Special Operations Team sadto pang Oplan Lambat Bitag sang dekada 1990. Gintawag man ini nga “Community Organizing for Peace and Development” kag “Community Support Program” sa idalom sang Oplan Bayanihan sang rehimen Aquino. Kabahin ini sang kontra-rebolusyonaryo nga estratehiya nga idingot sa rebolusyonaryong armadong kahublagan ang “pisikal kag sikolohikal nga base” paagi sa grabe nga militarisasyon sang mga komunidad sang tumandok kag mangunguma. Sang nagligad nga walo ka tuig, kapid sini ang focused military operations kon sa diin ginapahulag ang ginatos tubtob pila ka libo nga mga pwersa militar sa dasok kag malaparan nga operasyon kombat.

Kapintas sang RCSP sa Masbate

Sa isla sang Masbate, ginpaidalom sa RCSP sang 22nd IB kag 96th IB ang indi magnubo sa 58 ka barangay sa 12 ka banwa kag syudad halin pa Enero. Sa sini nga panahon, nalista sa mga banwa nga ini ang 36 ka kaso sang paglapas sa tawhanon nga kinamatarung. Indi magnubo sa walo ka mangunguma sa mga barangay nga ini ang ginpatay sang mga soldado.

Lapnagon sa mga lugar nga may RCSP ang pagpatawag sang militar sa mga upisyal sang barangay. Ginapatawag man ang mga “surrenderee” nga ginpasungka sadto pang 2021. Ginatukod sini ang nanari-sari nga mga asosasyon kag organisasyon nga ginapilit nila nga maglunsar sang mga peke nga rali pangkalinong kontra sa rebolusyonaryong kahublagan. Ginapahog sang militar ang mga residente nga kasuhan kung indi mag-ako nga aktibo sa organisasyon ukon may kaangtanan sa hukbo sang banwa.

Para nga daw mapatihan, nagapaseminar angot sa RCSP ang mga lokal nga ahensya, nagapaliga sa mga pamatan-on kag nagahatag sang iban pa nga serbisyo. Nagapagwa ang mga soldado sang mga pelikula sang pagpakamalaut kag Red-tagging sa mga progresibo nga mga organisasyon.

Sobra nga ginakaakig sang mga residente ang pagpalapnag nila sang panahor kag mga bisyo pareho sang pag-inom sang makahulobog nga ilimnon kag iban pa nga anti-sosyal nga aktibidad nga ginagamit sang militar para makakuha sang impormasyon kag makapaniid. Ginapilit man ang tagabaryo nga mag-intra sa mga grupo nga paramilitar, mag-CAFGU ukon magserbe nga aset paniid.

RCSP sa komunidad sang Mangyan

Sa Mindoro, magluwas sa dinosena nga kampo-militar, ginatos ka komunidad ang gin-okupar sang mga pwersa pang RCSP sang 203rd Brigade kag PNP-MIMAROPA. Nagkampo ang mga ini sa tunga ukon tambi sang mga baryo sang mga mangunguma kag tumandok nga Mangyan halin pa 2019.

Ginsentruhan sang militar ang apat nga magkatambi nga barangay sa dulunan sang Oriental Mindoro (Bulalacao) kag Occidental Mindoro (San Jose kag Rizal). Yara sa mga banwa nga ini ang mga operasyon sang kwari kag pagmina, kag ang Tamaraw Reservation Expansion Project nga magasakop sa masobra 100,000 ektarya nga dutang tumandok.

Nagpatuman ang mga soldado sang karpyu kag iban pa nga pagpang-ipit. Ginapilit nila ang mga tumandok nga mag-upod sa operasyon kombat para sa “sumay sa agi” sa kantidad nga P300 kada adlaw kag P500 kon may matukiban nga agi. Ginatarget nila nga irekrut nga aset paniid bisan ang mga menor-de-edad.

Isa sa pinakamadugay nga RCSP ang kampo sa Sityo Mantay, Barangay Monteclaro sa San Jose nga ginapondohan sang mga soldado sugod 2019. Ginapapirma sa logbook ang mga naga-gwa sulod sa sityo, bisan ang mga residente.

Gina-ulipon sang mga soldado ang mga Mangyan bilang tigbakal kag tighakot sang suplay. Lapnagon ang mga kaso sang pagpanghimulos kag abuso sekswal sa kababainhan.

Grabe ang epekto sang mga operasyon militar sa mental nga kapagros sang mga Mangyan. Naga-agum sang troma ang mga tigulang kag mga bata halin sa mga pagpamomba. Troma man ang tuga sang mapintas nga interogasyon kon sa diin ginatayaan sang pusil ukon binangon ang mga biktima. Sugod 2019, anom na ka Mangyan-Buhid ang nareport nga naghikog tungod sa grabe nga tortyur kag saywar sa proseso sang interogasyon.