Sa tunga sang pagdumdom sang bulan sang mangunguma kag tumandok, wala untat ang atake sang militar kag pulis sa ila mga kinamatarung. Sining Oktobre, 32 iligal nga gin-aresto, lakip ang indi magnubo sa 29 ka Mangyan, duha ka konsultant sang NDFP sa hinun-anon pangkalinong, kag isa ka mangunguma sa Negros. Isa ka organisador naman ang gin-abdak kag ginapagwa nga “surenderi.”

Sa Occidental Mindoro, gindakop sang mga pulis kag militar ang 29 ka Mangyan Iraya nga mga residente sang Hacienda Almeda sa Abra de Ilog sadtong Oktobre 18. Sa mga gindakop, 17 ang tigulang kag 12 ang menor de edad. Gina-agaw ang nasambit nga asyenda sang pamilya Almeda, kakunsabo ang Pieceland Corporation. indi ini ang una nga higayon nga ginpintasan ang mga tumandok para tabugon sila halin sa ila nga kadutaan.

Sa Davao del Norte, gin-aresto sang gintingob nga pwersa sang pulis kag AFP ang konsultant pangkalinong sang National Democratic Front of the Philippines (NDFP) nga si Porferio Tuna sadtong Oktobre 2 sa Barangay Mankilam, Tagum City. Lapas ini sa Joint Agreement on Safety and Immunity Guarantees sa tunga sang gubyerno sang Pilipinas kag sang NDFP nga nagagarantiya sa kaluwasan sang tanan nga mga may kahilabtanan sa hinun-anon pangkalinong.

Sa Ilocos Norte, gin-aresto sang mga pwersa sang estado ang tigpamaba sang Cordillera People’s Democratic Front kag konsultant pangkalinong sang NDFP nga si Simeon “Ka Filiw” Naogsan sadtong Oktobre 21. Gindala si Naogsan sa Baccara Municipal Police Station kag pagkatapos sini ginbalhin sang mga pwersa sang estado sa isa ka wala ginpahibalo nga lugar.

Sa Escalante City, Negros Occidental, gin-aresto sang 79th IB ang lider sang mga mamumugon sa uma nga si Jose Puancing sadtong Oktobre 7 sang hapon. Ang pag-aresto kay Puancing ang base sa ginapagwa sang PNP kag 79th IB nga nakumpiskar nga mga armas kag palupok sang ginpatuman ang search warrant sadto pang 2019. Ang nasambit nga warrant ang kabahin sa mga depektibo nga mandamyento nga ginpagwa ni Judge Cecilyn Burgos-Villavert.

Sa Laguna, gin-abdak sang 203rd IBde sang AFP si Fhobie Matias, organisador sang mangunguma sa idalom sang Katipunan ng mga Samahang Magbubukid sa Timog Katagalugan, sadtong Septyembre 28 sa Calamba City. Nagapakigkonsulta sadto si Matias sa mga mangunguma sa Laguna. Pagkatapos sang halos duha ka semana, gin-anunsyo sang 203rd IBde nga uyat nila si Matias nga ginapagwa nila nga “nagsungka” sa ila.

Pagkaso sang “terorismo.” Ginpasakaan sang kaso nga “terrorism financing” ang tumandok nga gamay nga negosyante nga si Marcylyn Pilala, residente sang Barangay Gueday, Besao, Mountain Province. Si Pilala kag ang iya tindahan ang gina-akusaran nga ginakuhaan sang pagkaon, mga bulong kag iban pa nga kagamitan para sa Bagong Hukbong Bayan. Pareho nga kaso man ang ginapangatubang ni Alaiza Lemita, utod sang isa ka aktibista nga ginpatay sang militar sa gintawag nga Bloody Sunday sadtong Marso 7, 2021.

Ginpasakaan man sang reklamo nga “terrorism financing” si Lenville Salvador, anay pamunuan sang organisasyon pangkauswagan nga Ilocos Center for Research, Empowerment and Development.

Pagpang-ipit. Sa Barangay Mapalacsiao, Tarlac City, ginlusob sang apat nga ginapatihan tinawo sang militar ang kabalayan kon sa diin nagapuyo si Francisco Dizon, pamunuan sang Alyansa ng mga Manggagawang Bukid sa Asyenda Luisita sadtong Oktobre 18.

Samtang, ginharangan sang mga pulis kag 31st MIB ang isa sa mga ginasakyan sang mga mangunguma sang Hacienda Luisita sadtong Oktobre 20 sa Tarlac City. Magatambong ang mga mangunguma sa pagtililipon para sa pagdumdom sa pungsodnon nga bulan sang mga pesante.

Ginpasakaan naman sang kaso nga paglapas sa BP 880 ukon Public Assembly Act ang mga lider-masa nga sila ni Mimi Doringo, Mar Valbuena kag Regie Manlapig sang Manibela, Mody Floranda kag Ruben Baylon sang Piston tungod sa ginlunsar nga untat-byahe kag protesta. Ginmanduan sila nga mag-atubang sa korte sa Nobyembre 14.