Klaro an baton han magkalain-lain nga panrehiyon nga komite han Partido Komunista ng Pilipinas (PKP) ha magkalain-lain nga parte han nasud ha kagiusan nga pagtutul-id nga ginpanawagan han Komite Sentral. Ginpahayag han mga namumuno nga komite an ira pagpursige ngan padayon nga paningkamot nga itul-id an mga nagin kaluyahan ngan pagsasayop ha naglabay nga mga tuig agud mapagdesisyon nga makaabante ha magkalain-lain nga natad han buruhaton ha kada tagsa nira nga lupgop nga erya han operasyon.

Mga kadaugan ha Southern Tagalog

“Kinahanglan igselebrar an mga kadaugan han presente nga kagiusan nga pagtutul-id ha rehiyon,” pahayag han komite ha Southern Tagalog nga gin-gawas han sekretaryat hini. Ginpasaro han komite nga ginpadig-on, ginkatinan ngan ginpatuman han Partido ha rehiyon an mga buruhaton ha kagiusan nga pagtutul-id. Kalakip hini an pagpatangpos ha kampanya nga pag-aram ha mga pampartido nga pag-aradman ha haros lima kayukot nga kaapi han Partido ha kabaryuhan ngan kasyudaran.

Sering hini, kadak-an han mga komite han Partido madinaugon nga nakaglansar han kada tagsa nira nga kumprehensibo nga sumada han ira praktika ha naglabay nga lima katuig.

“Dugang nga ginpahilarum hini nga mga sumada an mga nahiuna nga natudlok nga mga karukayaknon ha mga ginpadig-on nga sumada ha balitang han panrehiyon nga komite,” pahayag han Sekretaryat.

Nakabulig liwat an mga sumada agud dugang nga mas patarumon an mga naanalisar ngan natudlok nga kasaypanan ngan kaluyahan ha mga subrehiyon/prubinsya ngan mga prente komo mga partikular nga porma han empirisismo tikang 2019 tubtub 2022.

Dugang han sekretaryat, “Gintudlok an hamabaw, pan-gawas ngan usahan-nga-gapil nga pagsantop ha kamutangan ngan mga butang, kasaypanan ha istatiko (nakahunong) nga pagkulaw ha mga butang hinungdan agud magin paso an katin nga kahibaruan ngan diri humaum ha obhetibo nga kamutangan an kahibaruan ngan ha sugad [nakakaapekto ha] nabubug-os nga mga plano ngan palisiya.”

Ginpahayag han Sekretaryat nga “determinado ini nga dugang nga pahilarumon ngan pahiluagon ngan dad-on ngadto ha kadaugan an presente nga kagiusan nga pagtutul-id.” Sugadpaman, reyalistiko gihapon hini nga ginpahayag nga samtang may dako nga pag-abante diri pa nagkakamayda hin mapagdesisyon nga birik ha pagpugong ha mga destroso ngan pag-atras han mga rebolusyunaryo nga buruhaton ngan pwersa ha kabaryuhan ngan kasyudaran han rehiyon samtang may parte pa nga nagpapadayon an pag-atras.

Pagpupursige ha Negros Island

Dirudiretso nga ginpadig-on han Komite han Rehiyon ha Negros Island an panawagan han Komite Sentral para ha kagiusan nga pagtutul-id. Ha naglabay nga tuig, ginsumat hini an pagrebyu han Partido ngan mga kaapi ha nahiuna na nga nabug-os hini nga 22 katuig nga sumada han rebolusyunaryo nga pakig-away ha isla tikang butnga nga parte han dekada 1990. Ginpasaro nira nga amo ini an ginbasaran han Komite para ha 5-katuig nga sumada para ha 2017-2022.

“Nakagtirok kita hin bulawanon nga mga leksyon komo madig-on nga basaranan han pankabug-usan nga plano ngan direksyon nga labaw pa nga makakapakusog ha pundasyon han aton Partido,” pahayag han Komite hiunong ha sumada. Gintudlok hini an positibo nga eksperyensya han kolektibo nga pagsuma han mga buruhaton han kada komite tubtub ha balitang han prente gerilya.

Ginpasulong han Komite an kampanya nga pag-aram ha mga dokumento nga gin-gawas han Komite Sentral nga kinahanglan dirudiretso nga adman. Kalakip hini an tulo-kabalitang nga kurso han Partido nga ginhimo ha magkalain-lain nga organo ngan masa nga kaapihan basar ha nagin plano ha edukasyon han rehiyon. Linutaw ha ira ranggo an bag-o nga mga instruktor ngan mga bag-o nga kaapi han Partido.

Pasaro pa nira, samtang gin-aadman ini nga mga teoretikal nga dokumento, praktikal nga nakabulig ha rehiyon an kolektibo nga pag-aram ha Rebolusyon, an teoretikal nga dyornal han Partido, ngan mga memorandum tikang ha Komite Sentral agud ungbawan an mga sayop nga kabatasanan ngan ideya. Dako kuno an nagin bulig han paghubad han mga dokumento, kurso ngan barasahon ngadto ha lenggwahe nga Hiligaynon para ha mas masayon nga pag-intindi han mga kaapi, labina an mga nagtikang ha batakan nga klase.

Ha atubangan han mga focused military operations (FMO) han rehimen US-Marcos, nakagpursige an Partido ngan hukbo han katawhan ha rehiyon ha bulig han kagiusan nga pagtutul-id. Nahimo hini nga pahiluagon an gin-gigiusan nga erya han lima nga prente gerilya ha isla kun itatanding ha naglabay nga tuig. “Ha butnga han mga sakripisyo ngan kakurian ha pagpasulong han armado nga rebolusyon, napugngan an huyob han pag-atras. Kundi, dinako an BHB yana nga tuig itanding ha naglabay nga tuig,” sering han Komite.

Linutaw an bag-o nga kusog nga may kumpyansa ha ranggo han mga Pula mangaraway tungod ha naabot nga konsolidasyon ngan mga treyning ha pulitiko-militar. Diri mamenos ha 36 nga opensiba an ginlansar han Pula nga hukbo ha naglabay nga tuig. Nakumpiska hini an 17 nga mga armas, bala ngan iba pa nga higamit militar nga mag-aarmas ha bag-o nga mga rekrut han BHB. Nagin baton ini han BHB ha panawagan para ha hustisya han ura-ura kadamo nga biktima han mga pagtalapas ha tawhanon nga katungod han militar ngan pulis.