Ha tiarabot nga midterm nga piniliay, natikagrabe an atake ngan pan-gigipit han rehimen Marcos ngan armado nga pwersa hini kontra ha mga kandidato ngan partido ilarum han Koalisyon nga Makabayan.

Hadton Enero 15, inatubang ha Office of the City Prosecutor of Manila an mga kandidato ha pagkasenador han Makabayan agud magsalawad hin kontra-salaysay ha kaso nga iligal nga asembleya o pagtalapas ha Public Assembly Act o Batas Pambansa 880 nga ginsalawad kontra ha ira han mga pulis. Kasumpay ini han gios protesta hadton Nobyembre 30, 2024, Adlaw ni Bonifacio, ha Mendiola ha Manila.

Napulo ha 11 nga kandidato ha koalisyon an gindabi ha kaso kaupod an nominado han Bayan Muna Party-list, mga lider han Alliance of Concerned Teachers ngan Alliance of Health Workers. Mahinunumduman nga nahiuna na nga ginkasuhan hira KMU Chairperson Elmer “Ka Bong” Labog ngan Nilo Mortifero, kaapi han Bayan Muna nga iligal nga gin-aresto han mga pulis ha adlaw han protesta.

Hadton Enero 10, nagpagawas han memorandum an Bureau of Jail Management and Penology (BJMP) nga nagmando nga “hugot nga bantayan” an mga priso nga gintatahapan nga may sumpay ha Partido Komunista ng Pilipinas (PKP) o mga alyado hini. Gintudlok liwat ha mando nga kinahanglan bantayan an kandidato ha pagkasenador nga hi ACT Teachers Rep. France Castro tungod ha agsub nga pagbisita ha prisuhan. Ginpapagawas nga ginsusugo kuno niya an mga priso pulitikal nga kumubra hin pondo tikang ha mga “drug trafficker” ha prisuhan. Natikadamo gihapon an nakakarawat ni Castro nga hulga ha iya kinabuhi.

Samtang, haros kada adlaw an pagpagawas han National Task Force-Elcac hin mga pahayag han Red-tagging ngan pagpasamwak hin buwa kontra ha Makabayan, mga partido ngan kandidato hini.