Sukwahi ha gindedemanda nga hustisya han mga Pilipino, naglalangan-langan hi Marcos ha impeachment o pag-akusar kan Vice President Sara Duterte, ngan ha pagpaaresto kan hadto anay President Rodrigo Duterte agud umatubang ha International Criminal Court. Ha luyo ini han klaro kaupay nga ebidensya han grabe nga korapsyon ni Sara, ngan mga krimen kontra ha katawhan ni Rodrigo.

Ginsusunod ni Marcos an sagdon han amo nga imperyalismo nga US nga pahunungon an iya pakigsumpaki ha mga Duterte agud diri malisang an mga langyaw nga monopolyo kapitalista nga namumuhunan ha nasud. Imbes nga pamatian an guliat han katawhan para ha hustisya, gin-uuna ni Marcos an konsolidasyon han iya poder agud hinay-hinay nga kuhaan an mga Duterte hin poder ngan impluwensya. Kalakip hini nga mga pitad an ginhihimo nga “loyalty check” ngan pagbalasa han mga upisyal han AFP ngan PNP ngan reorganisasyon han National Security Council.

Pinakatuyo ni Marcos nga mas pahugton an kontrol ha pampulitika nga poder agud proteksiyunan an kalugaringon nga burukrata-kapitalista nga interes. Usa nga nangunguna nga gintatagan yana hin atensyon ni Marcos amo an tiarabot nga eleksyon ha Mayo. Gin-gagamit niya an bug-os nga gahum han estado ngan pampubliko nga pondo agud seguruhon nga makokontrol han iya mga alipures an Senado, Kongreso, ngan mga lokal nga gubyerno. An konsolidasyon han poder ni Marcos gin-gagamit niya kontra ha katawhan Pilipino ngan kontra ha iya mga karibal ha pulitika.

Ha pag-atentar nga tahuban an guliat han katawhan para ha hustisya ngan tarhugon an mga kongresista ngan grupo nga nagduduso han impeachment, naggastos an mga maka-Duterte nga lider han Iglesa ni Cristo hin gatus-gatos kamilyon kapisos agud tirukon an usa kamilyon nga kaapi hini ha mga rali hadton naglabay nga semana. Gin-gamit an mapan-uwat nga tema nga “pagkaurusa ngan kamurayawan” agud tahuban an gindedemanda han katawhan nga hustisya ngan guliat agud papagbatunon an ginkakangalsan nira nga mag-amay nga Duterte.

Masobra usa kabulan na an naglabay tikang han susrunod nga ginsalawad an tulo nga kaso han impeachment ha Kongreso. Kundi ha panguna ni Marcos, nga nagsering nga “pagkarag hin oras” ngan “diri pa napapanahon,” waray pa bisan usa hini nga tulo an gintikangan nga iproseso. Ginpapagawas han iba nga ginhuhulat ni Marcos nga maseguro nga katin niya an mayoriya han Senado agud segurado nga masentensyahan hi Sara. An kamatuoran, nagpapakabungol hi Marcos ha guliat han katawhan ngan gin-uulang ngan ginsasabotahe an i-nisyatiba han magkalain-lain nga demokratiko nga sektor nga papagbatunon hi Sara Duterte ngan amay nga hi Rodrigo.

An pagdelatar ni Marcos ha kaso han pagpatalsik kan Sara Duterte dugang nga nagsusungo ha kangalas han katawhan Pilipino. Diri nira makarawat nga makit-an nga padayon nga nakalingkod ha poder an bise presidente nga nanguna ha maanomaliya nga pagmalgastar ha gatus-gatos kamilyon kapisos nga kwarta han katawhan. Ngan mas diri nira makarawat nga an bilyun-bilyon kapisos nga badyet han reaksyunaryo nga gubyerno nga nagtikang ha ginbaydan nga buhis han ordinaryo nga katawhan, ginbubursa han mga korap nga upisyal han gubyerno, ha panguna han burukrata-kapitalista nga hi Marcos.

Dugang nga natikahilarum an kangalas han katawhan Pilipino atubangan han natikagrabe nga krisis ha panginabuhi, labina ha susrunod nga pag-umento han presyo han pagkaon, lana, ngan magkalain-lain nga papliton ha syahan nga mga semana han 2025. Padayon nga nagpapakabungol hi Marcos ha guliat han mga trabahador ngan ordinaryo nga empleyado agud umentuhan an suhol ngan sweldo, nga kulang kaupay agud mabuhi hin disente an mga pamilya nga Pilipino.

Waray solusyon an rehimen Marcos ha grabe nga problema han hiluagan nga disempleyo, ngan ginpapasibay-an nala an mga tawo nga maglugaring ha pamiling han ira papakabuhian. Mas grabe pa, ginhihikawan hin kita an milyun-milyon nga parag-uma, parupangisda, mga drayber han dyip ngan iba pa nga sektor ha atubangan han pag-atentar han mga burges-kumprador ngan kakunsabo nga langyaw nga mga kompaniya ngan bangko nga agawon an ira tuna ngan panginabuhi.

Ha atubangan han hiluag nga pag-antos ngan pagbagsak han panginabuhi han katawhan, tikagrabe nga panmuypoy an baton han rehimen Marcos ha larang nga pamingawon an ira mga demanda. Padayon nga natikadamo an kaso han sarbeylans, pan-gigipit ha mga organisasyon, pagsalawad hin hinimu-himo nga kaso, pangaresto, tortyur ngan ekstrahudisyal nga panmatay kontra ha mga ordinaryo nga katawhan nga nagkakaurusa agud ipakigbisog an ira interes ngan kaupayan. Todo-larga an paggamit yana ni Marcos ha mga “kontra-terorismo” balaud para ha pagpuypoy ha mga katungod. Mas grabe an kamutanganbha kabaryuhan kun diin butad nga balaud militar an gin-iimponer ha yukut-yukot nga mga barangay nga ginkokontrol ngan ginhahadi-hadian han mga pasista nga sundalo.

Agud ipasulong an kaupayan ngan katungod han masa han katawhan Pilipino, kinahanglan pursigido nga butukon an ira ranggo ngan tagan hin gamhanan nga porma an ira kangalas ha mga krimen ngan sala han mga Duterte, ngan ha nagpapadayon nga burukrata-kapitalista ngan pasista nga paghahadi ilarum ni Marcos. Mas pakusgon an hiluag nga nagkakaurusa nga prente agud tirukon an ngatanan nga sektor, organisasyon ngan mga indibidwal ha panawagan nga papagbatunon an mga Duterte. Kinahanglan bug-uson an magkalain-lain nga porma han asosasyon ngan mga alyansa, pormal man o diri pormal, agud maaghat an pinakahiluag nga masa nga magpartisipar ha magkalain-lain nga porma han paggios ngan pagpahayag hin araba.

Kinahanglan mapagdesisyon nga ipasulong an demokratiko nga kagiusan masa agud papagbatunon an mga Duterte ngan pakusgon an pag-ato ha pagsukot ha mga Marcos ngan ha kabug-usan nga burukrata-kapitalista nga sistema. Paborable kaupay an sitwasyon agud pukawon an masa ngan paspas nga pahiluagon an ira organisado nga ranggo. Matambok an tuna agud tinagdamo nga pabuthuon an mga unyon ngan asosasyon masa ngaduha ha kasyudaran ngan kabaryuhan.

Hakbuton an paborable kaupay nga sitwasyon agud ipasulong an pan-ekonomiya ngan pampulitika nga mga pakigbisog han masa ngan magkab-ot han mga kadaugan ha ira mga pakigbisog. Kinahanglan isumpay iton ha mga pag-ato ha rehimen US-Marcos ngan ha pagpapasulong han nasyunal-demokratiko nga kagiusan.

Kinahanglan pursigido nga gumios ngan dugang nga magpakusog an mga kadre ngan kaapi han Partido agud magserbe nga rubas han mga pag-ato han masa. Hira an lamrag ngan giya ha pagpasulong han masa ha atubangan han makuri nga dalan han pakigbisog. Kinahanglan tukuron an mga sikreto nga asosasyon masa nga direkta nga nasuporta ha pagpasulong han armado nga pakig-away, ngan nagpupukaw ha masa nga umapi ha Bagong Hukbong Bayan.