Upisyal na nga nagtikang an panahon han reaksyunaryo ng eleksyon hadton Enero 12. Magpapaisan-isanay ngan magsusungayay hini an mga kandidato agud makuha an diri mamenos ha 18,000 nga pusisyon ha gubyerno ngan pahimulsan an burukrata-kapitalista nga sistema. Maggigitgitay hini an dagko nga warlord ngan mga dinastiya ha pulitika ngan dudrungan nira nga tatamakan an interes han katawhan. Gamit nira an ira mga armado nga maton, pulis ngan pwersa militar.

Ha atubangan hini, hugot nga ginpapatuman han rebolusyunaryo nga kagiusan an naeksister nga mga palisiya ha panahon han reaksyunaryo nga eleksyon ha lupgop nga erya han operasyon. Ha mando han Partido, seseguruhon han Bagong Hukbong Bayan (BHB) an pagpanginano ha kaupayan, mga katungod ngan interes han katawhan.

Kaangayan nga ipahinumdom ha ngatanan han naglalanat hin pwesto ha reaksyunaryo nga gubyerno nga hugot nga ipapatuman an mga palisiya ha mga rebolusyunaryo nga erya. Tutugutan an mga kandidato ngan ira mga tagsuporta nga mangampanya subay ha mga naeksister nga pagsurundon.

Gindidiri an mga pulitiko nga magdara hin mga armado nga tawuhan ngan mga eskort nga pulis ngan militar nga kasagaran gin-gagamit agud hadlukon an katawhan. Diri papasibay-an an iba pa nga porma hin panmirit, paggamit hin armado nga pandarahug, labina han mga burukrata-kapitalista nga nagamit ha pondo han katawhan kontra ha katawhan. May epektibidad an mga mando ha BHB nga kumpiskahon an mga armas han mga kandidato ngan ira mga armado nga maton. Kun kinahanglan, ipapatuman ini pinaagi han mga tsekpoynt ngan iba pa.

Kinahanglan targeton han BHB an mga yunit han AFP ngan PNP, hasta na liwat an mga armado nga tawuhan han mga reaksyunaryo nga pulitiko, nga gagamiton an kampanya ha eleksyon ha mga prente gerilya komo tahub ha mga operasyon nga paniktik kontra ha Partido, ha BHB, ha demokratiko nga gubyerno han katawhan ngan ha rebolusyunaryo nga masa.

Antes mangampanya ha mga rebolusyunaryo nga erya, ginkikinahanglan nga magpahibaro an mga pulitiko ngan makigsumpayan ha mga lokal nga yunit han BHB. Importante ini nga koordinasyon agud malikyan an bisan ano nga insidente, kalakip an mga kumprontasyon giutan han mga armado nga maton han magkaribal nga pulitiko.

Segurado nga gagamiton han AFP an reakayunaryo nga eleksyon agud papintason an mga pankombat nga operasyon hini, pampulitika nga panmuypoy ngan pagkontrol ha mga barangay ha kabaryuhan ha balayan han kontra-insurhensiya nga gerra. Ha luyo nga gapil, uunaton liwat hini an AFP ngan PNP nga obligado nga isarang ha magkalain-lain nga bungto nga tutudlukon nga “red, orange ngan yellow-risk” basar ha kagrabihon han banggaay han mga lokal nga pulitiko, hasta an “presensya” han BHB. Lehitimo nga target han BHB an mga pankombat nga yunit han AFP.

Hugot nga gin-aghat han Partido an mga kandidato nga dumiri ha mga tanyag han armado nga seguridad tikang ha AFP, tungod kay gin-gagamit la ini han militar agud himuon an pampulitika nga panmuypoy.

Kaagsuban, an mga burukrata nga ginpaburan han militar amo gihapon an nakikigkonsabuhay ha pasista nga kampanya han panmuypoy ha kabaryuhan. Pinakatuyo han ira mga operasyon nga puypuyon an pag-ato han katawhan ngan depensahan an interes han mga dagko nga agaron maytuna, dagko nga negosyo ngan mga langyaw nga kompaniya ha pagmina ngan plantasyon.

Ha luyo han pauru-utro nga pagdeklara nga usa na gud la an “maluya nga prente gerilya” han BHB, gindeklara han Philippine Army nga “nagpapabilin [hira] nga alerto ngan padayon nga maghihimo hin mga operasyon para ha internal nga seguridad” agud maseguro an “kamurayawan ngan kaayusan” han piniliay. Ini nga mga operasyon nag-uundong han mga taktika nga “guns, goons and gold” nga kinaiya han ngatanan nga mga reaksyunaryo nga eleksyon.