Kahuman han 460 kaadlaw han brutal nga panmomba ngan pag-atake han Zionista nga Israel ha Gaza, nabug-os ang kasarabutan ha ukoy-bubto ha Gaza Strip. Gin-anunsyo ini hadton Enero 16 han gubyerno han Qatar, an nagserbe nga tagatuhay ha erestorya, kaupod an US ngan Egypt. Nagin epektibo an syahan nga hugna han kasarabutan hadton Enero 19.

Ha usa nga pahayag, gindayaw han Hamas an kadig-on ngan kadakilaan han katawhan Palestino nga nagduso ha Israel nga umabuyon ha usa nga ukoy-bubto. Dako nga birik an kasarabutan ha atubangan han saad han Israel nga diri hini uundangon an pangatake tubtub ha “absoluto nga kadaugan.” Ginpakyas han mga Palestino an plano han Israel nga palayason hira ngan perdihon an ira ungara agud magin talwas ha okupasyon ngan agresyon.

“An kasarabutan agud tapuson an agresyon ha Gaza usa nga kadaugan han aton katawhan, han aton pag-ato, ngan han talwas nga katawhan han kalibutan,” sigon ha Hamas. Ginpangunahan han Hamas, kaupod an Palestinian Islamic Jihad, Popular Front for the Liberation of Palestine ngan iba pa nga grupo nga Palestino an mabayanihon nga pagdepensa ha Gaza sakob hin 15 kabulan. Nagpasalamat an mga grupo ha ngatanan nga suporta ha ira pag-ato ha langyaw nga labnasan.

Ginpasidunggan nira an mga namartir nga mangaraway nga Palestino ha ira “mabayanihon ngan madig-on nga pag-ato” ha atubangan han brutalidad han Israel ngan US. Ginhandum nira an ngatanan nga mga inosente nga bata nga ginpatay ngan ngatanan nga gintalumpigos ngan ginpakurian han Zionista nga estado.

Maagi ha tulo nga hugna an ukoy-bubto. Landaw ha syahan an pag-undang dayon han agway ngan pagpagawas han Hamas ha katin hini nga 33 nga Israeli (mga bata, babaye ngan kalagsan nga 50 katuig tipaigbaw) kasaliwan han pagpagawas han Israel hin tubtub 1,000 nga Palestino nga priso. Hini nga takna, oobligahon an Israel nga umatras tikang ha mga sentro han populasyon han Gaza ngan tagan wada an pagsakob han ura-ura nga ginkikinahanglan nga ayuda para ha mga pamilya nga Palestino.

Ha ikaduha nga hugna mahitatabo an hul-os nga pag-atras han Israel ha Gaza ngan dugang nga balyuay hin mga priso. Ha ikatulo nga hugna titikangan an rekonstruksyon han teritoryo nga ginrumok han mga airstrike han Israel. Ngatanan nga mga detalye han ikaduha ngan ikatulo nga hugna ig-aagi ha negosasyon samtang ginpapatuman an syahan nga hugna han kasarabutan, nga gintatantiya nga malastar hin tulo kasemana.

Ginkalipay han Partido Komunista ng Pilipinas (PKP), kadungan han mga demokratiko nga organisasyon ha bug-os nga kalibutan an ukoy-bubto. Sugadpaman, maaram an ngatanan nga diri hini ginhuhuman an Zionista nga okupasyon ngan henosidyo nga gerra. Hito mismo nga adlaw han pag-anunsyo hadton Enero 16, naghimo an Israel hin bag-o nga serye han panmomba. Ha sakob hin 24 oras, 101 nga Palestino an napatay ngan 264 an nasamad ha mga airstrike hini.

“Saludaran naton an ngatanan nga mga mangaraway ha ira kaisog ngan karit ha pag-ato agud magkab-ot hin mga kadaugan para ha katawhan Palestino ha natad han gerra ngan negosasyon,” sigon ha PKP. Ginpakita han katawhan Palestino nga ano man kagrabe an terorismo han Israel, waray hini maperdi an ira mapan-ato nga diwa ngan determinasyon nga makab-ot an ira ginhihingyap nga katalwasan.

Hadton Enero 17, inabot na ha 46,788 nga Palestino an ginpatay han Israel ha ginpapintas nga henosidyo nga gerra hini ha Gaza ha naglabay nga 15 kabulan. Kaupod hini an 18,000 nga kabataan. Aada ha 110,265 an samaran, diin 25% an grabe nga nasamaran. Masobra 90% han populasyon han Gaza napalayas ha ira mga urukyan.