Waray hunong an militar nga pandarahug nga ginsasabrag han mga yunit han Armed Forces of the Philippines (AFP) ha Negros Island. Ha syahan nga mga semana pala han Enero, mayda na mga kaso hin ekstra-hudisyal nga pagpatay, iligal nga pag-aresto ngan iba pa nga mga pagtalapas ha tawhanon nga katungod an mga berdugo.

Pagpatay. Tinuyo nga ginpatay han mga sundalo han 15th IB an naaresto hini nga Pula nga mangaraway han Bagong Hukbong Bayan (BHB)-Southwest Negros (Armando Sumayang Jr Command) nga hi Rodney Lumanog (Ka Wanny) hadton Enero 10 ha Sityo Cambogui-ot, Barangay Camindangan, Sipalay City, Negros Occidental. Sigon han yunit han BHB, buhi nga nadakop hi Ka Wanny kasunod han usa nga armado nga agway ha nasering nga lugar.

Sigon ha mga report, gintortyur hiya antes patayon han mga sundalo. Mayda diperensya ha siki hi Ka Wanny tungod ha usa nga operasyon hadton dekada 1990 pa ngan ginliwanan ini hin stainless.

Pag-aresto. Ha Sityo Palosais, Barangay Mahalang, gin-aresto han 94th IB an usa nga gin-ngangaranan nga Dado Sanchez hadton Enero 14. Sigon ha mga residente, kinadto an biktima ha iya uringan ngan waray na makabalik kahuman. Ginpirit kuno han mga sundalo hi Sanchez nga magserbe nga giya ha pankombat nga operasyon hini.

Ha Sityo Nahulop, Barangay San Antonio, gindakop han mga sundalo hira Aira Gonzales ngan Alfredo Hilado hadton Enero 15. Ginkastigo naman an asawa ni Gonzales nga hi Joseph ngan an upod niya nga amyaw. Ginpapagawas nga nakumpiska ha ira an usa nga .45 kalibre nga pistola, mga command-detonated explosive, ngan mga dokumento. Hito gihapon nga adlaw, iligal nga ginkumpiska han mga sundalo han 94th IB an mga selpon han mga residente han Sityo Nahulop.

Panarhug. Hadton Enero 3, gintarhug han mga sundalo han 94th IB nga pupusilon an mag-asawa nga Tasi ngan ira mga amyaw ha Sityo Kambudlis, Barangay Mahalang.

Pan-gigipit. Ginsalawdan hin kaso nga “terrorism financing” an duha nga upisyal han United Methodist Church (UMC) ngan usa nga drayber hadton Disyembre 2024. Gintatahapan han mga pwersa han estado hira Rev. Julius Neri Camannong ngan Rev. Joel Ordaneza han UMC ha Zamboanga Sibugay, ngan drayber nga hi Romeo A. Russell nga naghatag hin pinansyal nga bulig ha mga “terorista.”

An kaso kasumpay han paghatag han mga pastor hin sangtwaryo ha gin-gigipit nga mga tagdepensa han tawhanon nga katungod hadton Enero 2024 ha Zamboanga Sibugay. Gin-gamit nga basaranan han mga pulis an asoy han hadto anay aktibista ngan yana ahente han estado nga hi Nelson Bautista Jr agud kasuhan an mga biktima.