Hadton udto han Enero 20 ha Washington DC, nanumpa hi Donald Trump komo ika-47 nga presidente han US ngan pinuno han pinakamakigerrahon nga imperyalista ha kalibutan. Utro hiya nga malingkod ha poder kahuman han iya syahan nga termino hadton 2016-2020. Matindog hiya nga presidente ha usa nga senado ngan kongreso nga dominado han iya mga kapartido. Tinambong ha iya inagurasyon an iya mga tagsuporta nga bilyunaryo sugad kanda Elon Musk, Jeff Bezos ngan Mark Zuckerburg, mga tag-iya han pinakadagko nga kompaniya ha teknolohiya ha bug-os nga kalibutan.

Ha iya pamulong, ginpatuman ni Trump an mga neopasista ngan imperyalista nga palisiya nga una na nga gin-anunsyo nga ipapatuman han iya rehimen.

Nagdeklara hiya hin “national emergency” agud himuon an “pinakadako nga programa ha deportasyon ha kasaysayan han Amerika” nga pagpadayon ha kontra-migrante ngan rasista nga palisiya han iya syahan nga pangatungdanan. Kalakip ha target ideport ni Trump an gintatantiya nga 370,000 nga diri dokumentado nga Pilipino ha US. Ipapadayon liwat niya an pagtindog hin “border wall” o pader ha giutan han US ngan Mexico ngan pagpahugot ha mga palisiya han migrasyon.

Ha iya syahan nga adlaw, gin-anunsyo niya an pira ha mga ehekutibo nga kamanduan nga plano niya igawas. Kalakip hini an diri mamenos ha 10 nga palisiya ha imigrasyon, pagtanggal ha pagkilala han iba nga tawoa ha gubyerno, paggikan han US ha kasarabutan kasumpay han pagbag-o han klima (Paris Climate Accords) ngan pagtanggal han regulasyon ha produksyon han lana ngan LNG.

Padayon gihapon nga lalanaton ni Trump an mga demokratiko ngan progresibo nga grupo ngan bisan an mga institusyon nga nag-uundong han mga sibil nga katungod ngan kontra ha militarista nga palisiya han imperyalista nga US.

Ha luyo nga gapil, pahihiluagon ni Trump an pribilehiyo nga ginhahatag ha iya paborito nga mga monopolyo kapitalista ha natad han teknolohiya, enerhiya, pinansya, real estate ngan industriya han armas. Nagsaad hiya nga “pagugution an gubyerno” agud tanggalon an mga regulasyon ha mga monopolyo nga kompaniya ha kahibangan han mga empleyado ngan trabahador nga Amerikano. Kadungan hini, iibanan niya an buhis ha pinakadagko nga kompaniya nga Amerikano, tikang 21% ngadto 18%. Diri mamenos ha 13 nga bilyunaryo an nakatalaan nga magin kaparte han iya gabinete.

Dugang nga ginpakusog ni Trump an iya agresibo nga palisiya ha langyaw nga labnasan. Antes lumingkod ha poder, aamkunon (pwersahay man o papaliton) an Greenland, usa nga isla nga mayda kalugaringon nga gubyerno nga mayda otonomiya nga nakapailarum ha Denmark. Ginlalawayan ni Trump an isla tungod ha importansya hini ha panmilitar nga estratehiya han US. Ha iya pamulong, gin-utro niya an tarhug nga aagawon an Panama Canal, diin naagi an 40% han mga epektos nga gin-iimport ngan gin-eeksport han US.

Agud pugngan an pagbagsak han produksyon ha US, permi ginluluwas ni Trump ha panahon han kampanya an umento ha taripa (10%-20%) ha ngatanan nga mga produkto nga nasakob ngadto ha US tikang ha iba nga nasud, kalakip an tikang ha Pilipinas. Pinakahitaas an plano niya nga ig-imponer nga taripa (tubtub 60%) ha mga produkto tikang ha China, nga ginkukunsidera han US komo estratehiko nga karibal.

Kadungan hini, ginlalauman nga padayon nga mag-iimponer hi Trump hin mga sangsyon o pan-gigipit nga pitad ha ekonomiya han Venezuela, Cuba, Iran ngan mga nasud nga nag-uundong han ira katalwasan.

Ha ilarum ni Trump, waray ginlalauman nga pagbabag-o ha mapan-gerra nga pagtagad han US ha karibal hini nga mga imperyalista nga China ngan Russia. Ha luyo han iya mga pahayag nga “kontra-gerra” an militarista nga panindugan nga “kamurayawan pinaagi han kusog.” Nakaangkla an ginduduso niya nga ukoy-bubto giutan han Russia ngan Ukraine ha pagkarawat han Russia ha mga kundisyon han US. Samtang gintatagad an Russia ngan Ukraine, ginpapakusog ni Trump an iya sumpayan ha maka-Tuo ngan neopasista nga mga partido ngan rehimen ha EU.

Gin-aamkon ni Trump an pagbug-os han kasarabutan han ukoy-bubto ha Gaza Strip, nga nagtikang ha Enero 19. Waray kaseguruhan nga mag-iiha ini nga kasarabutan, labina nga lanong an Israel ha kawaray-pagrespeto ha bisan ano nga pagsurundon ngan kasarabutan. Ngani, kada adlaw hini nga gintatalapas an ukoy-bubto nga sinakob hini ha Lebanon.

Igpapadayon ni Trump an maka-Zionista ngan mapan-gerra nga palisiya ha Middle East. Tikang pa ha iya syahan nga termino, bug-os an iya suporta ha rehimen ni Benjamin Netanyahu ngan ha okupasyon han Zionista nga estado ha mga teritoryo han Palestine ngan lahos pa. Gindayaw niya an Abraham Accords diin ginpakarawat ngan ginhimo niya nga lehitimo an pakigsumpayan han Zionista nga estado ha mga nasud nga Arabo.

Segurado nga papipintason ni Trump an panulsol han US hin gerra ha China. An rehimen ni Trump an nagbug-os hadton 2017 ha estratehiya nga Free and Open Indo-Pacific, nga nagduso para ha mas hiluag nga presensya militar han US ha Asia, partikular ha South China Sea. Gindeklara na han iya ginpili nga sekretaryo han state department nga “kukumprontahon” ni Trump an China, prinsipal pinaagi han pag-armas ngan panginlabot hini ha Taiwan. Mahinunumduman nga hi Trump an syahan nga nagpatuman han Enhanced Defense Cooperation Agreement ha Pilipinas ngan nagduso para ha syahan nga lima nga base militar han US ha nasud.