Nalawag ti sungbat ti nadumaduma a komite a pangrehiyon ti Communist Party of the Philippines (CPP) iti nadumaduma a paset ti pagilyan iti tignay panagilinteg nga inpanawagan ti Komite Sentral. Inpanawagan dagiti mangidadaulo a komite ti panagpinget ken agtultuloy a panangigaed nga ilinteg dagiti nagkapuyan ken nagkamalian kadagiti napalabas a tawen tapno mapangngeddeng nga umabante iti nadumaduma a tay-ak ti trabaho kadagiti saklaw nga erya ti operasyon da.

Dagiti balligi iti Southern Tagalog

“Rumbeng a rambakan dagiti balligi ti agdama a tignay panagilinteg iti rehiyon,” pablaak ti komite iti Southern Tagalog nga inparuk-at ti kalihiman daytoy. Inbingay ti komite a pinasingkedan, pinaginggeman ken inpatungpal ti Partido iti rehiyon dagiti rebbengen iti tignay panagilinteg. Kabilang ditoy ti panagpaturpos iti kampanya a panagadal kadagiti pangpartido a leksyon iti agarup lima a ribo a kamkameng ti Partido iti kaaw-awayan ken kasyudadan.

Kuna daytoy a kaadwan kadagiti komite ti Partido ket balligi a nakaipatungpal kadagiti komprehensibo a panaglagom iti praktika da iti napalabas a lima a tawen. “Dagitoy a panaglagom ket ad-adda pay a nangpauneg kadagiti immuna a naitudo nga usapin kadagiti napasingkedan a panaglagom iti tukad ti komite iti rehiyon,” pablaak ti Kalihiman.

Nakatulong met dagiti panaglagom tapno ad-adda pay a patademen dagiti nausig ken natudo a nagkamalian ken nagkapuyan kadagiti subrehiyon/probinsya ken dagiti larangan kas partikular a langa ti empirisismo manipud 2019 agingga 2022. Nayon ti kalihiman, “Natudo ti narabaw, pangruar ken bangbangir a panangawat iti kasasaad ken dagiti banag, nagkamalian iti istatiko a panagbuya kadagiti banbanag, a makagapu nga agbalin a naglabesen ti iggem a kaamuan ken saan a naiyannatop iti obhetibo a kasasaad ken iti kasta ket [makaap-apektar iti] mabukbukel a plano ken patakaran.”

Inyebkas ti Kalihiman a “determinado daytoy nga ad-adda pay a paunegen ken palawaen ken itunda agingga iti balligi ti agdama a tignay panagilinteg.” Nupay kasta, napudno met nga inyebkas daytoy a bayat nga adda ti dakkel a panagabante ket awan pay ti mapangngeddeng a panagbaw-ing iti pananglapped kadagiti dangran ken panagsanud dagiti rebolusyonaryo a trabaho ken pwersa iti kaaw-awayan ken kasyudadan ti rehiyon bayat nga adda pay paset nga agtultuloy nga umat-atras.

Panagpinget idiay Negros Island

Tuloy-tuloy a paspasingkedan ti Komiteng Rehiyon idiay Negros Island ti panawagan ti Komite Sentral para iti tignay panagilinteg. Iti napalabas a tawen, inyulat daytoy ti panangrepaso ti Partido ken dagiti kamkameng iti immunan a nabukel daytoy a 22 tawen a sumada ti rebolusyonaryo a dangadang iti isla manipud tengnga a paset ti dekada 1990. Inbingay da a daytoy ti nagbatayan ti Komite para iti 5-tawen a panaglagom para iti 2017-2022.

“Nakaurnong tayo kadagiti nabalitokan nga ad-adal kas natibker a basaran iti kabuklan a plano ken direksyon nga ad-adda pay a makapagpapigsa iti pundasyon ti Partido tayo,” pablaak ti Komite kanaig ti panagsuma. Tinudo daytoy ti positibo a kapadasan ti kolektibo a panagsuma kadagiti trabaho ti tunggal komite agingga iti tukad ti larangan gerilya.

Inyabante ti Komite ti kampanya iti panagadal kadagiti dokumento nga inruar ti Komite Sentral a rumbeng a tuloy-tuloy a pagadalan. Kabilang ditoy ti tallo-tukad a kurso ti Partido a naiyaramid iti nadumaduma nga organo ken kamkameng batay iti nagbalin a plano iti edukasyon ti rehiyon. Timmaud iti intar da dagiti baro nga instruktor ken dagiti baro a kameng ti Partido.

Inbingay da pay a bayat a maad-adal dagitoy a teorya, praktikal a nakatulong ti kolektibo a panagadal iti teoretikal a pagiwarnak ti Partido a Rebolusyon, ken dagiti memorandum ti Komite Sentral tapno rimbawan dagiti kamali nga aramid ken ideya. Dakkel kano ti naitulong ti panagipatarus iti pagsasao a Hiligaynon kadagiti dokumento, kurso ken babasaen tapno nalaklaka a maawatan dagiti kamkameng, nangruna dagiti nagtaud iti basaran a dasig.

Iti sango dagiti focused military operations (FMO) ti rehimen US-Marcos, nakapagpinget ti Partido ken hukbo ti umili iti rehiyon iti tulong ti tignay panagiliteg. Naaramid daytoy a palawaen ti tigtignayan nga erya ti lima a larangan gerilya iti isla nu ikumpara iti napalabas a tawen.

Iti tengnga dagiti sakripisyo ken rigat iti panangiyabante iti armado a rebolusyon, nalapdan ti turongen ti panagsanud. Ngem ketdi, limmangto ti NPA tatta a tawen kumpara iti napalabas a tawen,” kuna ti Komite.

Timmaud ti baro a pigsa nga addaaan kumpyansa iti intar dagiti Nalabbaga a mannakigubat gapu iti madandanon a konsolidasyon ken dagiti panagsanay iti pulitiko-militar. Saan a bumaba iti 36 nga opensiba ti insayangkat ti Nalabbaga a hukbo iti napalabas a tawen. Nakumpiskar daytoy ti 17 nga armas, bala ken dadduma pay a ramit militar a mangarmas kadagiti baro a rekrut ti NPA. Nagbalin a sungbat daytoy ti NPA iti panawagan para iti hustisya ti nakaad-ado a biktima dagiti panaglabsing iti karbengan-tao ti militar ken pulis.