Awan-sarday ti ranggas militar nga imulmula dagiti yunit ti Armed Forces of the Philippines idiay Negros Island. Iti umuna a lawlawas pay laeng ti Enero, addan dagiti kaso ti ekstra-hudisyal a pammapatay, iligal a panag-aresto ken dadduma pay a panaglabsing iti karbengan-tao dagiti berdugo.

Pammapatay. Ingagara a pinapatay dagiti soldado ti 15th IB ti naaresto daytoy a Nalabbaga a mannakigubat ti New People’s Army (NPA)-Southwest Negros (Armando Sumayang Jr Command) a ni Rodney Lumanog (Ka Wanny) idi Enero 10 iti Sityo Cambogui-ot, Barangay Camindangan, Sipalay City, Negros Occidental. Segun iti yunit ti NPA, sibibiag a nakemmeg ni Ka Wanny kasaruno ti maysa nga armado a labanan iti nasao a lugar.

Segun kadagiti ulat, tinortyur isuna sakbay a pinapatay dagiti soldado. Adda ti rangkap iti saka ni Ka Wanny gapu iti maysa nga operasyon idi pay dekada 1990 ken nasuktan ti stainless daytoy.

Panag-aresto. Idiay Sityo Palosais, Barangay Mahalang, inaresto ti 94th IB ti maysa nga agnagan ti Dado Sanchez idi Enero 14. Segun kadagiti residente, nagturong ti biktima iti pagugingan na, kalpasanna ket saanen a nakasubli. Pinilit kano dagiti soldado ni Sanchez nga agserbi a giya iti operasyon a kombat dagitoy.

Iti Sityo Nahulop, Barangay San Antonio, kinemmeg dagiti soldado da Aira Gonzales ken Alfredo Hilado idi Enero 15. Binugbog da met ti asawa ni Gonzales a ni Joseph ken ti kadwa na a karruba na. Parparwaren dagiti soldado a nakumpiskar kadakuada ti maysa a .45 kalibre a pistola, dagiti command-detonated explosive, ken dagiti dokumento. Didiay met laeng nga aldaw, iligal a kinumpiskar dagiti soldado ti 94th IB dagiti selpon dagiti residente ti Sityo Nahulop.

Panagpangta. Idi Enero 3, pinangtaan dagiti soldado ti 94th IB a paltoganda ti agassawa a Tasi ken dagiti karruba da idiay Sityo Kambudlis, Barangay Mahalang.

Panaglipit. Naipilaan ti kaso a “terrorism financing” ti dua nga upisyal ti United Methodist Church (UMC) ken maysa a drayber idi Disyembre 2024. Pabpabasolen dagiti pwersa ti estado da Rev. Julius Neri Camannong ken Rev. Joel Ordaneza ti UMC iti Zamboanga Sibugay, ken ti drayber a ni Romeo A. Russell a nangted ti tulong pinansyal kadagiti “terorista.”

Ti kaso ket kanaig ti panangited ti sangtwaryo dagiti pastor iti maliplipit a salaknib ti karbengan-tao idi Enero 2024 idiay Zamboanga Sibugay. Inaramat a basaran dagiti pulis ti salaysay ti dati nga aktibista ken tatta ket ahente ti estado a ni Nelson Bautista Jr tapno maidarum dagiti biktima.