Kalpasan ti 460 aldaw a brutal a panagbomba ken panangraut ti Zionista nga Israel iti Gaza, nabukel ti katulagan iti ceasefire iti Gaza Strip. Inyanunsyo daytoy idi Enero 16 ti gubyerno ti Qatar, ti nagserbi a taga-ballaet iti saritaan, karaman ti US ken Egypt. Naaddaan bileg ti umuna a tukad ti katulagan idi Enero 19.

Iti maysa a pablaak, dinayaw ti Hamas ti kinatibker ken kinatan-ok ti umili a Palestino a nangiduron iti Israel nga umannugot iti maysa a ceasefire. Dakkel a baw-ing ti katulagan iti sango ti kari ti Israel a saan nga isardeng daytoy ti panagraut agingga iti “absoluto a balligi.” Pinaay dagiti Palestino ti plano ti Israel a pagtalawen isuda ken abaken ti tarigagay da tapno agbalin a nawaya iti okupasyon ken agresyon daytoy.

“Ti katulagan tapno gibusan ti agresyon iti Gaza ket maysa a balligi ti umili tayo, ti panaglaban tayo, ken ti nawaya nga umili ti lubong,” segun iti Hamas. Inyuna ti Hamas, kadwa ti Palestinian Islamic Jihad, Popular Front for the Liberation of Palestine ken dadduma pay a grupo a Palestino ti nabanwar a panangsalaknib iti Gaza iti unos ti 15 bulan. Nagyaman dagiti grupo iti amin a suporta iti panaglaban da iti ballasiw-taaw.

Pinadayawan da dagiti namartir a mannakigubat a Palestino iti “nabanwar ken natibker a panaglaban” iti sango ti brutalidad ti Israel iti US. Nagladingit da iti pammapatay kadagiti inosente nga ubbing ken amin nga indadanes ken pinarigat ti Zionista nga estado.

Dumalan iti tallo a tukad ti ceasefire. Ti umuna ket pakaitampokan ti dagus a panagsardeng iti labanan ken panangruk-at ti Hamas iti iggem daytoy a 33 nga Israeli (ubbing, babbai ken natataengan nga agtawen 50 agpangato) kasukat ti panangruk-at ti Israel ti agingga 1,000 balud a Palestino. Iti daytoy a tukad, maobliga ti Israel nga umatras manipud kadagiti sentro ti populasyon ti Gaza ken wayaan ti panagserrek ti ad-adda a kasapulan nga ayuda para kadagiti pamilya a Palestino.

Iti maikadwa a tukad a mapasamak ti naan-anay a panag-atras ti Israel iti Gaza ken nayon a sinnukat kadagiti balud. Iti maikatlo a tukad a marugyan ti rekonstruksyon ti teritoryo a pinulbos dagiti airstrike ti Israel. Amin a detalye iti maikadwa ken maikatlo a tukad ket maidatag iti negosasyon bayat nga maipatpatungpal ti umuna a tukad ti katulagan, a mapatta-patta nga agbayag ti tallo a lawas.

Kinablaawan ti Communist Party of the Philippines (CPP) kagiddan dagiti demokratiko nga organisasyon iti intero a lubong ti ceasefire. Nupay kasta, ammo ti amin a saan daytoy a lepleppasen ti Zionista nga okupasyon ken gera a henosidyo. Iti mismo nga aldaw ti anunsyo idi Enero 16, nagiyaramid ti Israel ti baro a serye ti panagbomba. Iti uneg ti 24 oras, 101 Palestino ti napatay ken 264 ti nasugatan kadagiti airstrike daytoy.

“Saludwan tayo ti amin a mannakigubat iti kinatured ken kinalaing da iti panaglaban tapno aggun-od ti balligi para iti umili a Palestino iti tay-ak ti gubat ken negosasyon,” segun iti CPP. Inpakita ti umili a Palestino a kasano man kakaro ti terorismo ti Israel, saan daytoy a naatiw ti palaban a pakinakem ken determinasyon a madanon ti tartarigagayan a wayawaya.

Idi Enero 17, dimmanon iti 45,788 a Palestino ti pinatay ti Israel iti patpatarayen daytoy a gera a henosidyo iti Gaza iti napalabas a 15 bulan. Kabilang ditoy ti 18,000 nga ubbing. Adda iti 110,265 ti sugatan, nu sadinno a 25% ket nakaro a nasugatan. Nasurok 90% ti populasyon ti Gaza ket napadisi kadagiti pagtaengan da.