Iti umadani nga eleksyon a midterm, kumarkaro ti atake ken pananglipit ti rehimen Marcos ken armado a pwersa daytoy laban kadagiti kandidato ken partido iti sidong ti Koalisyong Makabayan.

Idi Enero 15, simmango iti Office of the City Prosecutor of Manila dagiti kandidato ti kinasenador ti Makabayan tapno agidatag ti kontra-salaysay iti kaso nga iligal nga asembleya wenno panaglabsing iti Public Assembly Act wenno Batas Pambansa 880 nga inpila kadakuada dagiti pulis. Kanaig daytoy ti tignay protesta idi Nobyembre 30, 2024, Aldaw ni Bonifacio, idiay Mendiola iti Manila.

Sangapulo iti 11 kandidato ti koalisyon ti nairaman iti kaso kabilang ti nominado ti Bayan Muna Party-list, dagiti lider ti Alliance of Concerned Teachers ken Alliance of Health Workers. Malagip nga immunan a nakasuan da KMU Chairperson Elmer “Ka Bong” Labog ken Nilo Mortifero, kameng ti Bayan Muna nga iligal nga inaresto dagiti pulis iti aldaw ti protesta.

Idi Enero 10, nagiparuk-at ti memorandum ti Bureau of Jail Management and Penology (BJMP) a nagmandar a “nairut a bantayan” dagiti balud a maatap nga addaan silpo iti Communist Party of the Philippines (CPP) wenno dagiti kaalyado daytoy. Naitudo met iti mandato a rumbeng a bantayan ti kandidato iti kinasenador a ni ACT Teacher’s Rep. France Castro gapu iti masansan a panagbisita na iti pagbaludan. Parparwarenda a manmandaran na kano dagiti balud pulitikal nga agkubra ti pondo manipud kadagiti “drug trafficker” iti pagbaludan. Umad-ado met ti maaw-awat ni Castro a pangta iti biag na.

Kabayatanna, dandani inaldaw ti panangiparuk-at ti National Task Force-Elcac kadagiti pablaak ti Red-tagging ken panagipasaknap ti inuulbod laban iti Makabayan, dagiti partido ken kandidato daytoy.