Upisyalen a nangrugi ti panawen ti reaksyunaryo nga eleksyon iti pagilyan idi Enero 12. Agbabalubal ken agsisinnangdo ditoy dagiti kandidato tapno masukdal ti saan a bumaba iti 18,000 a pusisyon iti saan a bumaba iti 18,000 a pusisyon iti gubyerno ken pakinabangan ti burukrata-kapitalista a sistema. Agraranget ditoy dagiti dadakkel a warlord ken dagiti dinastiya iti pulitika ken aggigiddan da a rabngisen ti pagimbagan ti umili. Usaren da dagiti armado a maton, pulis ken pwersa a militar da.

Iti sango daytoy, nairut nga ipatungpal ti rebolusyonaryo a tignay ti agraraira a patakaran iti panawen ti reaksyunaryo nga eleksyon iti saklaw nga erya ti operasyon. Iti mandar ti Partido, siguraduen ti New People’s Army (NPA) ti panangsalaknib iti pagimbagan, dagiti karbegan ken interes ti umili.

Rumbeng nga ipalagip iti amin nga agkamkamat ti pwesto iti reaksyunaryo a gubyerno a dagiti patakaran ket nairut a maipatungpal kadagiti rebolusyonaryo nga erya. Dagiti kandidato ken dagiti tagasuporta da ket mapalubosan nga agkampanya umannurot kadagiti agraraira a pagallagadan.

Maparparitan dagiti pulitiko nga agitugot kadagiti armado a maton ken dagiti eskort da a pulis ken militar a kadawyan nga maar-aramat tapno pabutngan ti umili. Ti dadduma pay a langa ti panagpwersa, panagaramat ti armado a ranggas ket saan a palabsen, nangruna dagiti burukrata-kapitalista nga agar-aramat iti pondo ti pagilyan laban iti umili. Addaan bileg dagiti mandato iti NPA a kumpiskaren dagiti armas dagiti kandidato ken dagiti armado a maton da. Nu kasapulan, maipatungpal daytoy babaen kadagiti tsekpoynt ken dadduma pay.

Kasapulan a puntiryaen ti NPA dagiti yunit ti AFP ken PNP, karaman met laeng dagiti armado a maton dagiti reaksyunaryo a pulitiko, nga aramaten ti kampanya iti panagbobotos kadagiti larangan gerilya a panglinged kadagiti operasyon ti panagtiktik laban iti Partido, iti NPA, iti demokratiko a gubyerno ti umili ken iti rebolusyonaryo a masa.

Sakbay nga agkampanya kadagiti rebolusyonaryo nga erya, nasken nga agpakaammo dagiti pulitiko kadagiti yunit ti NPA. Napateg daytoy a koordinasyon tapno maliklikan ti anyaman nga insidente, karaman dagiti komprontasyon iti baet dagiti armado a maton dagiti aglalaban a pulitiko.

Sigurado nga aramaten ti AFP ti reaksyunaryo nga eleksyon tapno paingeten dagiti operasyon a kombat, pulitikal a represyon ken panagkontrol daytoy kadagiti barangay iti kaaw-awayan iti balangkas ti gera a kontra-insurhensya. Iti bangir na, guyuden met daytoy ti AFP ken PNP nga obligado a maiwaras iti nadumaduma nga ili a maituding a “red, orange ken yellow risk” basar iti kinakaro ti rinnupak dagiti lokal a pulitiko, karaman ti “presensya” ti NPA. Dagiti yunit a pangkombat ti AFP ket lehitimo a target ti NPA.

Nairut nga inallukoy ti Partido dagiti kandidato a pagkedkedan dagiti diaya ti armado a seguridad manipud iti AFP, gapu ta daytoy ket ar-aramaten laeng ti militar tapno ipatungpal ti pulitikal a represyon. Masansan a dagiti burukrata a pabpaboran ti militar ket isuda met laeng ti makikumkumplot iti pasista a kampanya ti represyon iti kaaw-awayan. Ultimo a panggep dagiti operasyon da a lapdan ti panaglaban ti umili ken salakniban ti interes dagiti dadakkel nga apo’t daga, dadakkel a negosyo ken dagiti gangannaet a kumpanya iti panagminas ken plantasyon.

Iti laksid ti maulit-ulit a panagideklara a maymaysa laengen ti “nakapsut a larangan gerilya” ti NPA, inpablaak ti Philippine Army nga isuda ket “agtaltalinaed nga alerto ken agtultuloy a mangisayangkat kadagiti operasyon para iti internal a seguridad” tapno masigurado ti “kapya ken urnos” ti eleksyon. Dagitoy nga operasyon ket agitantandudo kadagiti taktika ti “guns, goons and gold” a kagagalad ti amin a reaksyunaryo nga eleksyon.