Protesta iti UP. Linawas ti protesta dagiti estudyante ken manursuro ti Unibersidad ng Pilipinas (UP) iti nadumaduma a kampus daytoy kas panangsabat iti maikadwa a semestre idi Enero. Kalatakan kadagiti protesta ti kaltas iti badyet, pangta iti seguridad ken wayawaya a pang-akademiko, karaman met ti panawagan a “Duterte Pagsungbaten, Marcos Singiren!”

Kadakkelan ti rali idiay Los Baños nu sadinno a nasurok 800 ti timmabuno iti “First Day Rage” idi Enero 27. Naiyaramid met ti rali idiay UP Tacloban idi Enero 13; UP Manila ken UP Visayas, idi Enero 20; UP Baguio, UP Diliman, UP DEPPO idiay Pampanga ken UP Cebu idi Enero 21; ken UP Mindanao idi Enero 28.

Pananglagip iti Mendiola Masaker. Linagip ti Kilusang Magbubukid ng Pilipinas (KMP) ken dagiti demokratiko a sektor ti maika-38 anibersaryo ti nadara a Mendiola Masaker idi Enero 22. Inyaramid da ti maysa a porum iti Bantayog ng mga Bayani tapno lagipen ti 13 nga indibidwal a pimmusay kalpasan a sinabat ti ranggas dagiti tauhan ti presidente idi a ni Corazon Aquino ti rinibo a nagprotesta a mannalon. Sinaruno daytoy ti martsa agturong iti Mendiola idiay Manila nu sadinno a napasamak ti nakaam-ames a krimen.

Protesta kontra nangina a multa idiay Cebu. Nagisayangkat ti protesta idi Enero 25 dagiti drayber ti dyip iti sidong ti Piston Cebu iti sango ti LTO Region 7 tapno babalawen ti panangpuntirya kadakuada tapno patawan ti nalablabes a multa. Nagriri dagiti tsuper iti Joint Administrative Order 2014-01 ti ahensya a nangikeddeng ti agingga ₱27,000 multa para iti babassit ken pinarbo a panaglabsing kadagiti linteg pang-trapiko.

Suporta ken kumpensasyon, inrupir dagiti Batangueño. Nagpiket iti Department of Social Welfare and Development, Department of Agriculture ken Sugar Regulatory Administration-Main Office idiay Metro Manila dagiti aguunas ken mannalon ti Batangas idi Enero 22. Iti panangiyuna ti Sugar-Batangas ken Alyansa ng Mga Magsasaka para sa Kumpensasyon, siningir da ti rehimen Marcos iti suporta a pangpinansya ken kumpensasyon kadagiti apektado kadagiti nakaro a didigra ken panagserra ti CADPI iti prubinsya.

Dagiti estudyante ti UE ken BCP, nagprotesta. Nagtignay dagiti estudyante ti University of the East (UE) ken Bestlink College of the Philippines (BCP) idi Enero tapno babalawen ti plano a panagngato ti matrikula ken panangipataw kadagiti parigat a patakaran iti eskwelaan da. Idiay UE, nagpiket dagiti estudyante iti kampus ti Caloocan ken Manila idi Enero 27-28 kagiddan ti naisayangkat a “konsultasyon” ti UE kanaig iti idurduron ti unibersidad a 5% tuition and other fees increase (TOFI). Sakbay daytoy, sangsangkamaysa da a naggangat ti kandila kagiddan ti panangisayangkat ti maysa nga ababa a programa idiay UE-Caloocan idi Enero 24.

Idiay BCP, balbaliw a nagisayangkat ti protesta dagiti estudyante iti Quezon City idi Enero 30 tapno babalawen ti dakkel a kapalpakan ti administrasyon iti naisayangkat a panagrambak iti anibersaryo ti eskwelaan idi Enero 26 idiay Bataan. Inawagan ti Anakbayan-BCP ken dagiti estudyante daytoy a #BCPTortureDay ti nasao nga aldaw ti panagrambak gapu iti nakaad-adu nga aberya ken nangina a gastos.