Protesta ha UP. Sinemana an protesta han mga estudyante ngan magturutdo han Unibersidad ng Pilipinas (UP) ha magkalain-lain nga kampus hini komo pagtapo ha ikaduha nga semestre hadton Enero. Ginpalandaw ha mga protesta an pag-iban ha badyet, hulga ha seguridad ngan pan-akademiko nga kalibrihan, kaupod liwat an panawagan nga “Duterte Pagbatunon, Marcos Sukton!”

Pinakadako an rali ha UP Los Baños diin masobra 800 an nagpartisipar ha “First Day Rage” hadton Enero 27. Naghimo liwat hin rali ha UP Tacloban hadton Enero 13; UP Manila ngan UP Visayas, hadton Enero 20; UP Baguio, UP Diliman, UP DEPPO ha Pampanga, ngan UP Cebu hadton Enero 21; ngan UP Mindanao hadton Enero 28.

Paghandum ha Mendiola Masaker. Ginhandum han Kilusang Magbubukid ng Pilipinas (KMP) ngan mga demokratiko nga sektor an ika-38 nga anibersaryo han madugo nga Mendiola Masaker hadton Enero 22. Iginhimo nira an usa nga porum ha Bantayog ng mga Bayani para handumon an 13 nga indibidwal nga namatay kahuman tapuon han pandarahug han mga tawuhan han hadto anay presidente Corazon Aquino an yukut-yukot nga nagpoprotesta nga parag-uma. Ginsundan ini han martsa tikadto ha Mendiola han Manila kun diin nahitabo an makangingirhat nga krimen.

Protesta kontra ha mahal nga multa ha Cebu. Naglansar hin protesta hadton Enero 25 an mga drayber han dyip ha ilarum han Piston Cebu ha atubangan han LTO Region 7 agud suknaon an pagtarget ha ira agud patukan hin sobra-sobra nga multa. Tumipa an mga drayber ha Joint Administrative Order 2014-01 han ahensya nga nagtalaan hin tubtub ₱27,000 nga multa para ha gudti ngan hinimu-himo nga pagtalapas ha mga pantrapiko nga balaud.

Suporta ngan kumpensasyon, igin-insister han mga Batangueño. Nagpiket ha Department of Social Welfare and Development, Department of Agriculture ngan Sugar Regulatory Administration-Main Office ha Metro Manila an mga magtutubo ngan parag-uma han Batangas hadton Enero 22. Ha pangunguna han Sugar-Batangas ngan Alyansa ng mga Magsasaka para sa Kumpensasyon, ginsukot nira an rehimen Marcos ha pampinansya nga suporta ngan kumpensasyon ha mga apektado han grabe nga kalamidad ngan pagserra han CADPI ha prubinsya.

Mga estudyante ha UE ngan BCP, nagprotesta. Gumios an mga estudyante han University of the East (UE) ngan Bestlink College of the Philippines (BCP) hadton Enero agud suknaon an larang nga paghitaas han matrikula ngan pag-imponer han pakuri nga mga palisiya ha ira eskoylahan. Ha UE, nagpiket ha kampus ha Caloocan ngan Manila hadton Enero 27-28 kadungan han iginlansar nga “konsultasyon” han UE hiunong ha iginduduso han unibersidad nga 5% nga tuition and other fees increase (TOFI). Antes hini, duruyog hira nga nagdagkot hin kandila kadungan han paglansar han usa nga halipot nga programa ha UE-Caloocan hadton Enero 24.

Ha BCP, utro nga naglansar hin protesta an mga estudyante ha Quezon City hadton Enero 30 para suknaon an dako nga kapalpakan han administrasyon ha iginlansar nga selebrasyon ha anibersaryo han eskoylahan hadton Enero 26 ha Bataan. Gintawag han Anakbayan-BCP ngan mga estudyante hini nga #BCPTortureDay an nasering nga adlaw han selebrasyon tungod ha ura-ura kadamo nga aberiya ngan mahal nga gastos.