Rinambakan ti Liga ng Agham para sa Bayan (LAB) ti maika-49 nga anibersaryo daytoy idi Disyembre 2024. Iti maysa a sikreto a panagtitipon idiay National Capital Region, dumanon iti 50 kamkameng daytoy ti nagtitipon tapno aggiddan a rambakan ti anibersaryo da ken ti maika-56 anibersaryo ti Communist Party of the Philippines.

Sinublian ken rinambakan da ti nadumaduma a balligi a nagun-od dagiti balangay da ken dagiti napadasan a pannubok iti tawen 2024, nangruna iti panawen ti umuna a tawen ti tignay panagilinteg. Pinadayawan met ti LAB ti amin a rebolusyonaryo a martir manipud iti sektor ti syensya ken teknolohiya a nagidaton ti biag da para iti umili ken iti rebolusyon.

“Nagbalin a nalatak dagiti balligi kadagiti kampanya, iti balbaliw a panagtaud ti panag-organisa iti intar ti basaran a masa, ken iti panangpadur-as ti suporta para iti New People’s Army (NPA),” segun iti ulat ti Agham Bayan, pagiwarnak ti LAB. Iti bangir daytoy, inyebkas da a dakkel pay ti kasapulan a rimbawan a pagkapuyan kabilang ti konserbatismo iti panagrekrut kadagiti baro a kameng.

Segun iti editoryal ti Agham Bayan, “rumbeng a nalawag kadatayo, kas rebolusyonaryo, a ti kangrunaan a panggep tayo iti panangisayangkat ti kampanya ket ti panangsungbat iti interes ti masa ken panangpaado ken panagpapigsa iti rebolusyonaryo a pwersa tayo.” Tatta 2025, inlanad ti LAB a tuloy-tuloy daytoy nga isakad dagiti rebbengen tapno makatulong iti panagiyabante ken panagpapigsa ti rebolusyon a Pilipino.

Nayon pay ti LAB, inpakita daytoy kadakuada a posible nga annongen ti maysa a syentista ti rebolusyonaryo a rebbengen nga iyabante ti nailyan-demokratiko a rebolusyon nga addaan sosyalista a perspektiba, kadagiti laboratoryo ken siled-pagadalan ti kasyudadan agingga iti armado a dangadang iti kaaw-awayan.

Ituloy-tuloy dagiti rebolusyonaryo a syentista, inhinyero, propesyunal ken estudyante ti tignay panagilinteg tapno magun-od ti ad-adda a balligi,” kuna daytoy. Agsagana met ti LAB para iti nabalitokan nga anibersaryo daytoy inton Disyembre.

Biyolohista iti hukbo ti umili

Maysa ni Ka Jerry kadagiti rebolusyonaryo a syentista a simmungbat iti panawagan a makipagbiag iti NPA. Timmipon isuna iti maysa a yunit ti hukbo ti umili iti Luzon. “Para kanyak kas maysa a biyolohista, maysa a dakkel nga oportunidad ti agbalin a Nalabbaga a mannakigubat tapno paunegen ti kaamwan iti biodiversity (intar dagiti nadumaduma nga organismo nga adda iti partikular nga ekolohikal a komunidad) iti pagilyan,” istorya na.

Manipud kadagiti lugar a pappapanan, agingga iti kankanen, inaldaw a makalanglangen ti Nalabbaga a mannakigubat ti law-ang (kalikasan). Kadawyan nga adda iti kabakiran ken kabanbantayan dagiti yunit ti NPA. Nu dadduma met ket kadagiti patag nga erya. Numanpay nadumaduma ti kasasaad dagiti bakir, bantay ken kapatagan, iti amin a gundaway ket kasla “field researcher” dagiti Nalabbaga a mannakigubat iti panagtapog da iti law-ang.

Kunana, “iti inaldaw a trabaho mi iti yunit, makitkita mi ti nadumaduma nga species (klase wenno tipo dagiti organismo)—mulmula, uong, insekto, billit ken dadduma pay.” Masansan met kano a makakitkita ti yunit kadagiti endemiko wenno katutubo a mulmula wenno ayup kas ti jade vine, corpse flower, hornbill wenno kalaw ken adu pay. “Adu met laeng a daras a napan ti yunit kadagiti lugar a posible a saan pay a pisikal a napanan dagiti syentista, uray siasinoman—di tayo ammo, baka makatakwat tayo kadagiti baro nga species kadagitoy a lugar.”

Makatulong met kano ti kaamuan iti biodiversity para iti pagkasapulan iti taraon ti hukbo ti umili ken ti masa. Nadumaduma nga species ti pagnumnumaran mi iti trabaho iti produksyon, Nangruna kadagiti nalipit a sitwasyon kadagiti adayo iti komunidad, pangnamnamaan a pagalaan ti taraon ti biodiversity ti kabakiran,” istorya na. Mangipatpatungpal met ti yunit ti NPA kadagiti patakaran tapno liklikan ti panagtiliw kadagiti endangered species wenno klase ti ayup nga agpegpeggaden a mapukaw.

Adu ti posible a maadal ken matakwatan panggep iti biodiversity iti pagilyan tayo, iti konteksto ti pannakitipon tayo iti rebolusyonaryo a dangadang para iti umili a Pilipino,” kunana. Innayon pay ni Ka Jerry a daytoy a kinabaknang ket palagip kenkuana nu apay a kasapulan a makipaset iti gubat ti umili—tapno salakniban ti law-ang ken umili manipud iti panaggamrud dagiti imperyalista ken lokal nga agar-ari a dasig.