Iti napalaus a pannakibinnulig ti masa, naangay ti New People’s Army (NPA)-Rizal (Narciso Antazo Aramil Command) ti panagrambak iti maika-56 anibersaryo ti Communist Party of the Philippines iti prubinsiya. Dimmar-ay iti taripnong dagiti kameng ti Partido ken dagiti rebolusyonaryo a pwersa manipud iti sektor dagiti mannalon, babbai, kabataan-estudyante, mangmangged ken nakurapay iti syudad. Naangay daytoy iti katengngaan ti nainget nga operasyon militar iti larangan gerilya.

Iti taripnong, naisayangkat ti pormal a panagadal iti pablaak ti Komite Sentral para iti anibersaryo nu sadinno a nasurok 50 katao manipud iti kaaw-awayan ken kasyudadan ti dimmar-ay. Iti anag ti tignay panagilinteg, kritikal ken napakumbaba a natudo iti panagadal dagiti agraraira pay laeng a pagkapuyan a rumbeng a rimbawan agpada iti tignay masa ken armado a dangadang.

Nagiyaramid met kadagiti pangkultura a pabuya ti Nalabbaga a Bandera ti NPA-Rizal ken dagiti dimmar-ay a rebolusyonaryo a pwersa. Tampok met iti panagrambak ti panagpartuat kadagiti biswal nga arte dagiti mannakigubat ken dagiti rebolusyonaryo a pwersa manipud iti kasyudadan kanaig iti tema ti pablaak ti Partido ken panangiyabante ti tignay panagilinteg. Adu kadagiti dimmar-ay ket damo pay laeng a nakastrek iti yunit ti NPA.

Kalpasan ti amin, nagisayangkat ti yunit ti “kapehan” iti tema a “ti papel ti agtutubo iti tignay panagilinteg.” Iti panagsisinnublat ti pablaak ken kankanta manipud kadagiti Nalabbaga a mannakigubat ken rebolusyonaryo a pwersa, naibingay ti kinapateg ti tignay panagilinteg ken nu kasano daytoy nga ipatpatungpal ti tunggal maysa.

Segun kadagiti bisita, nagbalin a pammaneknek ti aktibidad nga awan kaes-eskan ti ibagbaga ti reaksyunaryo nga estado a kumapkapsuten ti rebolusyonaryo a tignay. Iti panaggibus ti programa, adu ti nagiyebkas ti panangayat nga agtalinaed tapno makipagbiag iti hukbo ti umili.