Protesta sa UP. Kada semana ang protesta sang mga estudyante kag manunudlo sang Unibersidad ng Pilipinas (UP) sa nagkalain-lain nga kampus sini isip pagsugata sa ikaduha nga semester sadtong Enero. Ginpatigbabaw sa mga protesta ang buhin sa badyet, pamahog sa seguridad kag kahilwayan pang-akademiko, upod man ang panawagan nga “Duterte Pasabton, Marcos Sukton!”

Pinakadako ang rali sa UP Los Baños kung sa diin masobra 800 ang nagkigbahin sa “First Day Rage” sadtong Enero 27. Naglunsar man sang rali sa UP Tacloban sadtong Enero 13; UP Manila kag UP Visayas, sadtong Enero 20; UP Baguio, UP Diliman, UP DEPPO sa Pampanga, kag UP Cebu sadtong Enero 21; kag UP Mindanao sadtong Enero 28.

Pagdumdom sa Mendiola Masaker. Gindumdom sang Kilusang Magbubukid ng Pilipinas (KMP) kag mga demokratiko nga sektor ang ika-38 nga anibersaryo sang maduguon nga Mendiola Masaker sadtong Enero 22. Ginlunsar nila ang isa ka porum sa Bantayog ng mga Bayani para dumdumon ang 13 ka indibidwal nga napatay pagkatapos sugataon sang kapintas sang mga tinawo sang sadto nga Presidente Corazon Aquino ang linibo ka nagprotesta nga mangunguma. Ginsundan ini sang martsa padulong Mendiola sa Manila kung sa diin nahitabo ang makasiligni nga krimen.

Protesta kontra mahal nga multa sa Cebu. Naglunsar sang protesta sadtong Enero 25 ang mga drayber sang dyip sa idalom sang Piston Cebu sa atubang sang LTO Region 7 para sawayon ang pagtarget sa ila para patungan sang sobra-sobra nga multa. Nagreklamo ang mga drayber sa Joint Administrative Order 2014-01 sang ahensya nga nagatalana sang tubtob P27,000 multa para sa gagmay kag himu-himo nga paglapas sa mga laye pangtrapiko.

Suporta kag kumpensasyon, ginduso sang mga Batangueño. Nagpiket sa Department of Social Welfare and Developmenet, Department of Agriculture kag Sugar Regulatory Administration-Main Office sa Metro Manila ang mga nagaprodukto sang tubo kag mangunguma sang Batangas sadtong Enero 22. Sa pagpanguna sang Sugar-Batangas kag Alyansa ng Mga Magsasaka para sa Kumpensasyon, ginsukot nila ang rehimen Marcos sang suportang pampinansya kag kumpensasyon sa mga apektado sang grabe nga kalamidad kag pagsira sang CADPI sa prubinsya.

Mga estudyante sang UE kag BCP, nagprotesta. Naghulag ang mga estudyante sang University of the East (UE) kag Bestlink College of the Philippines (BCP) sadtong Enero para sawayon ang plano nga pagsaka sang matrikula kag pagpatuman sang paantus nga mga patakaran sa ila eskwelahan. Sa UE, nagpiket sa kampus sa Caloocan kag Manila sadtong Enero 27-28 kadungan sa ginlunsar nga “konsultasyon” sang UE angot sa ginaduso sang unibersidad nga 5% tuition and other fees increase (TOFI). Bag-o sini, ululupod sila nga nagsindi sang kandila kadungan sang paglunsar sang isa ka malip-ot nga programa sa UE-Caloocan sadtong Enero 24.

Sa BCP, liwat nga naglunsar sang protesta ang mga estudyante sa Quezon City sadtong Enero 30 para sawayon ang dako nga kapalpakan sang administrasyon sa ginlunsar nga kahiwatan sang anibersaryo sang eskwelahan sadtong Enero 26 sa Bataan. Ginbansagan sang Anakbayan-BCP kag mga estudyante sini nga #BCPTortureDay ang nasambit nga adlaw sang kahiwatan tungod sa tuman kadamo nga aberya kag mahal nga gasto.