Iti maysa a larangan idiay Cordillera, nagtungpal ti naipagarup a saan a matuloy a selebrasyon ti Communist Party of the Philippines idi Disyembre 26, 2024 iti maysa a pyesta ti panagkaykaysa ken panagadal dagiti Nalabbaga a mannakigubat ken masa.

Naidalupo iti rigat ti masa idiay Barangay Ranyag a dinanon dagiti kakadwa. Bagsak ti tinawen nga ani ti pagay gapu iti grabe a tikag a sinaruno ti parada dagiti bagyo a dimmalapus iti rehiyon. Nalimitaran met ti nawaya nga ipapan ti masa kadagiti sentro ti ili tapno aggatang kadagiti kasapulan da gapu iti panagliplipit ken awan-sarday nga operasyon ti AFP.

Gapu ditoy, saan a maliklikan ti sumagmamano a kakadwa nga agdanag nu kasano nga angayen ti selebrasyon. Anya ti ipakan da, idinto a nagawis da kadagiti mannalon? Isu nga iti bigat ti Disyembre 26, saan pay a nagsagana dagiti Nalabbaga a mannakigubat.

Ngem kamaleman na, kellaat laengen a naguni ti warning device da. Manipud iti kakaywan, maysa-maysa a simmungad dagiti taga-Baryo Ranyag.

“Kakadwa, tapno masigurado ti seguridad tayo ket saan dakayo a pinaumay iti kabalbalayan. Dakami laengen ti dimmayo kadakayo tapno matuloy ti selebrasyon ti anibersaryo ti Partido tayo,” palawag ni Tata Cesar, ti lider ti grupo. Kadwa na ti asawa ken anak na. Awit da ti dakkel a supot ti suman ken maysa a timba ti tambo-tambong. Iti likod ni Tata Cesar ket dagiti dadduma pay a tagabaryo nga addaan awit nga ispageti ken sungrod.

Dardaras a nagsagana ken intuloy dagiti kakadwa ti naisagana a programa. Kadagiti drama, daniw, kanta ken ababa a diskurso, inpakita da ti kumarkaro a krisis iti pagbiagan a sagsagabaen ti umili a Pilipino, ti kumarkaro a susik iti baet ni Marcos ken Duterte ken ti panangusar ti imperyalismo a US kadagiti neokolonya daytoy (kabilang ti Pilipinas) tapno labanan ti China.

Inpakita da ti panagari dagiti nailyan ken lokal a dinastiya dagiti burukrata-kapitalista iti kinabaknang ti prubinsya, bayat a bin-ig a mabaybay-an nga agkurkurang dagiti serbisyo iti gimong para iti umili. Natalmegan met kadagiti pabuya ti kinapateg ti agtultuloy a pannakitipon ti masa iti rebolusyon tapno mabaliwan ti kasasaad da.

“Ti bilin ni tatang mi ket aywanan mi dagiti kakadwa gapu ta dakayo ti pudno a mangisaksakit kadakami a nakurapay. Daytoy ket pammilin nga ipatawid mi kadagiti annak ken appo mi,” istorya ni Dani, maysa kadagiti dimmar-ay iti panagrambak. “Ammo mi nga ti pigsa mi ket adda iti panagkaykaysa ken sangsangkamaysa a panagtignay.”

Saan a dagus a nagawid dagiti bumaryo kalpasan ti selebrasyon. Insayangkat da ti asembliya tapno buklen ti lokal a balangay ti Pambansang Kalipunan ng mga Magsasaka ken plinano da ti sangsangkamaysa a “bungkalan” wenno panagsukay iti maysa a paset ti komunal a daga da. Pinagkaykaysaan da nu kasano nga organisado a labanan ti manamnama nga operasyon militar ken panagsubli ti RCSP.

Iti simmaruno pay nga al-aldaw, nadumaduma nga espesyal a kurso ken panagadal iti sidong ti Padepa (Pambansa-Demokratikong Paaralan) ti naisayangkat iti nagpwestwan ti NPA.

Inaldaw nga adda ti dimmayo iti kampo dagiti Hukbo—agtutubo ken natataengan. Ti dadduma ket dimmayo tapno agpatulong kadagiti leksyon da ken ti dadduma ket tapno makiinnistorya laeng. Pinabalonan isuda dagiti mannakigubat ti namnama, karaman dagiti kinitikit da nga aklo ken al-o.

Iti maudi nga aldaw dagiti kakadwa iti lugar, nagturpos ti batayan nga oryentasyon iti Partido dagiti lokal nga aktibista nga naorganisa iti maysa a sangay ti Partido iti lokalidad.

“Kakadwa, naipalawag yo a naan-anay ti Programa ti Partido. Awan ti panagdudua mi nga agbalin a kameng ditoy,” inyebkas ni Tata Cesar iti rugi ti panagsapata da iti sango ti bandera ti Partido.

Iti ipapanaw da iti Baryo Ranyag, sinublian dagiti kakadwa dagiti panagdandanag da. Sipupuso nga inarakup da ti adal iti kapadasan da: Kanayon, iti amin a gundaway, agtalek iti masa.