Idi Pebrero 5, nagpirma ti saan a bumaba iti 215 a kongresista iti kaso nga impeachment wenno asunto kontra ken bise presidente Sara Duterte tapno padisien daytoy iti pwesto. Naituloy ti kaso nga impeachment kontra ken Duterte kalpasan ti agarup dua a bulan a panangitantan ditoy ti rehimen Marcos. Inyuna mismo ti anak ti presidente a ni Sandro Marcos ti panagiyendorso iti maikapat a reklamo.

Naiyuli ti impeachment iti maudi nga aldaw ti regular a sesyon ti Kongreso. Sakbay daytoy, tallo nga impeachment complaint ti naiyulin iti Kongreso. Ti maikadwa ditoy ket indatag dagiti progresibo nga organisasyon ken indibidwal ken inyendorso ti Koalisyong Makabayan.

Addaan pito nga artikulo ti maikapat a reklamo ti impeachment. Kangrunaan ditoy ti “pannakikumplot tapno papatayen ni Marcos, ti asawana a ni Liza Araneta ken ti House Speaker a ni Martin Romualdez.” Inaramid ni Duterte ti pangta idi Nobyembre 23, 2024 iti tengnga ti panagdengngeg ti anomalya iti panaggastos na iti confidential funds a nailatang iti upisina na.

Ti dadduma pay a basaran ket ti: korapsyon iti ₱615.5 milyon iti confidential funds; panagpasuksok ken korapsyon iti Department of Education; saan a maipalawag a kinabaknang ken pannakapaay nga ilanad dagiti sanikua na iti Statement of Assets, Liabilities, and Net Worth; pannakairaman iti ekstra-hudisyal a pammapatay idiay Davao City, dagiti maniobra a destabilisasyon, kabilang ti panagboykot na iti State of the Nation Address ken panangtubeng kadagiti panagdengngeg iti Kongreso; ken “kabuklan a kondukta” bilang bise presidente ken maikadwa a kangatwan nga upisyal ti pagilyan.

Ti naiyendorso a resolusyon ket naipatulod iti Senado nga isu ti addaan rebbengen a mangbukel iti korte a mangdengngeg kadagiti reklamo. Nu mahusgaan, saan laeng a mapadisi iti pwesto ni Duterte, malapdan met isuna a tumaray iti anyaman a pusisyon kadagiti sumaruno nga eleksyon.

Ti kaudian a paset ti panagdindinnuklos dagiti pangkat ti Marcos ken Duterte ket pakakitaan ti panagirteng ti susik iti baet da. Ipakpakita daytoy ti nakarkaro pay a panaguneg iti pannakagudwa-gudwa iti uneg dagiti agtuturay a reaksyunaryo a dasig, nu sadinno nga agiinnagaw da kadagiti burukrata-kapitalista a pribilehiyo ken bileg dagiti agkaribal a paksyon ken pangkat.

Ti impeachment ket mayor nga addang iti panagkonsolida ti pangkat ni Marcos iti bileg na iti pulitika, nangruna iti uneg ti militar, pulis ken depensa. Kagiddan daytoy, patpatibkeren met ni Marcos ti kinapudno na iti imperyalista a US babaen ti ad-adda pay a panangpapigsa iti pannakitinnulong iti US kadagiti anti-China a propaganda ken operasyon a nabal nga ikumkumpas ti US iti West Philippines Sea, iti linged ti “panangitandudo ti soberanya ti Pilipinas.”

Naragsak nga inawat dagiti Pilipino ti impeachment ni Sara Duterte kas umuna nga addang tapno pagsungbaten ti bise presidente ken ikkaten isuna iti pwesto, kas addang tapno dusaen isuna kadagiti krimen ken kunniber. Kasapulan pay a papigsaen ken palawaen ti umili dagiti tignay da tapno iduron ti Sendo a dagus nga agtipon bilang korte ken rugyanen ti panagdengngeg iti kabiitan a panawen.

Ti impeachment ket balligi ti tignay masa a tuloy-tuloy nga agpappapigsa iti protesta para ditoy. Ad-adda daytoy a papigsaen ti pakinakem ken determinasyon ti umili tapno singiren ni Marcos mismo kadagiti dakdakkel a krimen ti korapsyon iti langa ti bukod na a confidential funds, pork barrel iti langa ti ayuda, panagkontrol iti binilyon a pondo ti Maharlika Fund ken panangala iti “saan a nagastos” a pondo ti Philhealth. Nasken met a pagsungbaten ni Marcos iti panagibasura na kadagiti nakaipila a kaso ti tinakaw a kinabaknang ti pamilya na nga aggatad ti saan a bumaba iti ₱202 bilyon.

Iti benneg dagiti progresibo a grupo, kitkitaen da a balligi ti impeachment ti umili a makidangdangadang tapno pagsungbaten dagiti Duterte ken ti pangkat da nga aglablabsing iti karbengan-tao. Kunada, iti panangiduron ken sangsangkamaysa a panagtignay, panangirupir ken panagbantay ti umili a nagun-od ti umuna a nga addang iti panagpasungbat iti kunniber. Kagiddan ti panawagan a kedngan a nagbasol ni Duterte, siningir da ti rehimen Marcos iti kinainutil daytoy a sungbatan ti kumarkaro a korapsyon ti rehimen na.

It aldaw ti panagbotos, naguurnong da iti sango ti Kongreso tapno ipanawagan a dagus a kedngan ni Duterte. Adda met ti kapada a protesta idiay Cabuyao, Laguna.