Awan-sarday dagiti pananglabsing iti karbengan-tao dagiti pwersa ti Armed Forces of the Philippines (AFP) ken Philippine National Police (PNP) laban iti umili a Pilipino kadagiti napalabas a lawas.

Pammaltog. Idi Enero 19, napuntaan ken nasugatan iti likod na ti 61-anyos a dati a barangay kagawad ken mannalon a ni Marcial Detalo iti dursok a pammaltog dagiti soldado ti 2nd IB iti Sityo Balunos, Barangay Rizal, Dimasalang, Masbate. Tapno kaluban ti krimen ken panangipeggad kadagiti sibilyan, malisyoso nga inrakurak iti midya ti 2nd IB a napuntaan ti bala ti New People’s Army (NPA)-Masbate ni Detalo iti tengnga ti parparwarenda a maysa nga engkwentro iti lugar.

Panagaresto. Idi Enero 27, inaresto dagiti pwersa ti estado ti 70-anyos a ni Myrna Cruz-Abraham, beterano nga aktibista, idiay San Rafael, Bulacan. Nakemmeg ti biktima iti bileg ti mandamyento de aresto nga inparuk-at ti maysa a korte idiay Cagayan kanaig kadagiti kaso ti napaay a pammapatay ken pammapatay. Inyulat dagiti grupo iti karbengan-tao a nakaruk-at ni Cruz-Abraham kalpasan ti walo nga aldaw.

“Terrorism financing.” Napilaan kadagiti pinarbo a kaso ti “panangpondo iti terorismo” ti lima nga aktibista manipud iti Cagayan Valley.

Nakasuan da Isabelo Adviento, lider mannalon; Cita Managuelod a tagasuporta dagiti mannalon; Agnes Mesina, koordineytor ti Makabayan Cagayan Valley; Jackie Valencia, salaknib ti karbengan-tao; ken ni Deo Montesclaros, maysa a peryodista. Amin da ket nabayagen a mangitantandudo iti karbengan ken pagimbagan ti umili ti Cagayan Valley ken ti umili a Pilipino.

Demolisyon. Iti katengngaan ti panaginana dagiti residente, tuso a rimmaut idi Enero 29, alas-2 ti parbangon, ti 200 maton ken tauhan ti managkamkam ti daga a ni Caroline Piñeda idiay Dalat/Purok 47, San Roque, Bangkal, Davao City tapno iyaramid ti demolisyon. Dinuprak ken sinamsam dagiti maton ti 20 a balay iti nasao a komunidad. Ti insidente ket paset ti serye ti demolisyon manipud pay Disyembre 2024.

Idiay Laguna, binabalaw dagiti residente ti panagsangpet idi Enero 31 ti 8 – 10 katao a demolisyon tim iti Barangay Nueva, San Pedro, Laguna, tapno ipatungpal ti pangta a demolisyon iti igid ti riles. Idi Enero 7, nangted ti pakdaar ti Department of Transportation kadagiti lokal nga isuda ket mapatalaw iti didiay nga aldaw iti laksid ti kinaawan ti “court order” para iti demolisyon.

Pwersaan a panagpasuko. Naimaldit ti baro a serye ti militarisasyon ken pwersaan a “panagparehistro” ti Philippine Army kadagiti mangngalap a kameng ti Timek La Union iti Barangay San Manuel Norte, Agoo, La Union idi Enero 20. Naiyulat ti panagrikrikus ti nakasibilyan a pito a tauhan ti Philippine Army iti nadakamat a barangay iti panangiyuna ti maysa a “Captain Fernandez.” Awit dagiti soldado ti maysa a listaan nga aglalaon ti 30 a nagan dagiti agdama ken dati a kameng ti TIMEK La Union ken sapsapulen (dagiti soldado) isuda tapno “iparehistro” ti timpuyog da.

Idiay Masbate, nagitambak dagiti soldado ti AFP kadagiti agkakaabay a barangay ti Baang, Sawmill, Barag ken Mapuyo iti ili ti Mobo, Masbate idi Enero 27 tapno kamaten ken “pasukuen” ti sibilyan nga agnagan ti Sony Diamos.