Protesta sa UP. Sinemana ang protesta sa mga estudyante ug magtutudlo sa Unibersidad ng Pilipinas (UP) sa lain-laing kampus niini isip pagsugat sa ikaduhang semestre niadtong Enero. Gihatagag duut sa mga protesta ang pagkibhang sa badyet, hulga sa seguridad ug pang-akademiko kagawasan, lakip na ang panawagang “Duterte Panagutin, Marcos Singilin!”

Pinakadaku ang rali sa UP Los Baños diin kapin 800 ang mitambong sa “First Day Rage” niadtong Enero 27. Naglunsad usab og rali sa UP Tacloban niadtong Enero 13; UP Manila ug UP Visayas, niadtong Enero 20; UP Baguio, UP Diliman, UP DEPPO sa Pampanga, ug UP Cebu niadtong Enero 21; ug UP Mindanao niadtong Enero 28.

Pagdumdum sa Mendiola Masaker. Gidumdum sa Kilusang Magbubukid ng Pilipinas (KMP) ug mga demokratikong sektor ang ika-38 nga anibersaryo sa madugoong Mendiola Masaker niadtong Enero 22. Gilunsad nila ang usa ka porum sa Bantayog ng mga Bayani aron dumdumon ang 13 ka indibidwal nga namatay human gisugat og kabangis sa mga maton ni kanhing presidente Corazon Aquino ang liboang nagprotestang mag-uuma. Gisundan kini og martsa padulong Mendiola sa Maynila kung asa nahitabo ang mangilngig nga krimen.

Protesta kontra mahal nga multa sa Cebu. Nagprotesta niadtong Enero 25 ang mga drayber sa dyip ilalum sa Piston Cebu atubangan sa LTO Region 7 aron makmakon ang pagtarget kanila aron pahamtangan og mahal kaayong multa. Naalarma ang mga drayber sa Joint Administrative Order 2014-01 nga nagtakda og hangtud ₱27,000 multa alang sa mga gagmay ug hinimo-himong paglapas sa mga balaod trapiko.

Suporta ug kompensasyon, giduso sa mga Batangueño. Nakapiket sa Department of Social Welfare and Development, Department of Agriculture ug Sugar Regulatory Administration-Main Office sa Metro Manila ang mga magtutubo ug mag-uuma gikan sa Batangas niadtong Enero 22. Sa pagpanguna sa Sugar-Batangas ug Alyansa ng Mga Magsasaka para sa Kumpensasyon, gisingil nila ang rehimeng Marcos og suportang pinansyal ug kumpensasyon alang sa mga naapektuhan sa grabeng kalamidad ug pagsira sa CADPI sa prubinsya.

Mga estudyante sa UE ug BCP, nagprotesta. Nagprotesta ang mga estudyante gikan sa University of the East (UE) ug Bestlink College of the Philippines (BCP) niadtong Enero aron batukan ang planong pagtaas sa matrikula ug pagpahamtang sa paantus nga mga palisya sa ilang eskwelahan. Sa UE, nagpiket sila sa kampus sa Caloocan ug Manila niadtong Enero 27-28 dungan sa gipahigayong “konsultasyon” sa UE mahitungod sa ginadusong 5% tuition and other fees increase (TOFI) sa unibersidad. Ayha niini, hiniusa silang nagdagkot og kandila samtang naglunsad og usa ka mubong programa sa UE-Caloocan niadtong Enero 24.

Sa BCP, nagprotesta usab ang mga estudyante sa Quezon City niadtong Enero 30 aron batukan ang dakung kapalpakan sa administrasyon atol sa pagsaulog sa anibersaryo sa eskwelahan niadtong Enero 26 sa Bataan. Gitawag kini sa Anakbayan-BCP ug mga estudyante niini og #BCPTortureDay tungod sa kadaghang aberya ug mahal nga gasto.