Nagtitipon ti nadumaduma a demokratiko a grupo idiay Liwasang Bonifacio, Manila idi Enero 31 tapno angayen ti protesta laban iti “3K” wenno ti Kilos Bayan laban sa kahirapan, korapsyon at kawalang pananagutan. Dimmar-ay iti tignay dagiti estudyante, manursuro, mangmangged, propesyunal, dagiti tao ti simbahan, administrador ti unibersidad ken progresibo a partido. Inyuna daytoy ti Taumbayan Ayaw sa Magnanakaw at Abusado Network Alliance (TAMA NA).

Kapada met a tignay ti naisayangkat idiay Naga City, Cebu City, Iloilo City ken Bacolod City iti panangiyuna ti TAMA NA ken dagiti balangay ti Bagong Alyansang Makabayan. Didiay met laeng nga aldaw, dua pay a protesta ti insayangkat ti dadduma a grupo, agpada iti sango ti People Power Monument iti EDSA.

Sakbay daytoy, naisayangkat ti panaggangat ti kandila ken ababa a protesta idi Enero 30. Idi Enero 27, nagprotesta dagiti konseho ti estudyante, pagiwarnak a pangkampus ken grupo ti agtutubo iti Liwasang Bonifacio iti panangiyuna ti Leaders and Advocates of the Youth for the Accountability of Sara Duterte (LAYAS Duterte) Network a nabuangay idi Enero 23.

Idi Enero 26, nagmartsa dagiti manursuro iti salinong ti Alliance of Concerned Teachers idiay Baguio City para iti sweldo, badyet iti edukasyon ken sungsungbatan iti kinarigat, korapsyon ken panaglablabes ti gubyerno. Idurduron da ti impeachment ken Duterte a kunada ket palpak iti panagserbi kas dati a kalihim ti Department of Education.

Idi Enero 24, inyuna ti Kilusang Mayo Uno ti protesta nga “UWIAN Na” para iti sweldo ken laban iti panagtakaw idiay Quezon City. Ti panawagan nga UWIAN Na ket nagtaud iti “Unite for Wage Increase at Against Nakaw sa Gobyerno.”