Inton Pebrero 8, rambakan ti umili a Pilipino ti maika-86 a kasangay ni Kadwa Jose Maria Sison, dadaulo a nangbuangay ti Komite Sentral ti Communist Party of the Philippines (CPP). Dua a tawenen ti napalabas manipud idi pimmusay ni Ka Joma, ngem agtaltalinaed pay laeng isuna nga inspirasyon kadagiti agtutubo ken intero nga umili. Ti inbati na a nabaknang a kaban dagiti adal ken patawid ket kabilang tatta iti agserserbi a pundasyon ken tarabay nga iyab-abante a tignay panagilinteg ti Partido ken intero a rebolusyonaryo a tignay.

Kabilang kadagitoy nga adal ket ti pagkasapulan a napinget a pannakirisiris kadagiti kontra-rebolusyonaryo nga ideya, a nagbalin a nalatak iti Umuna ken Maikadwa a Naidaklan a Tignay Panagilinteg (MNTP). Daytoy ti tinalmegan ni Ka Luis Jalandoni, maysa kadagiti dadaulo nga upisyal ti National Democratic Front of the Philippines ken iti napaut a panawen a katakunaynay ni Ka Joma. Tinudo ni Ka Luis ti partikular ken krusyal nga akem ni Ka Joma iti panangiyabante ti MNTP iti panagisagana ti borador ti dokumento a “Balbaliw a Pasingkedan dagiti Basaran a Prinsipyo Tayo ken Ilinteg dagiti Nagkamalian.”

Daytoy a panawen, adu ti nadumaduma nga ideya ti sumsumlep iti rebolusyonaryo a tignay tayo. Dagiti nagkamalian a natudo iti dokumento ti panagilinteg ket makaim-impluwensya iti panagpanunot ken ideolohiya dagiti kakadwa,” segun ken Ka Luis. Nayon na pay, uray dagiti kakadwa iti Netherlands, nu sadinno a nakadistyero da, ket saan a nakaliklik iti impluwensya dagitoy a kamali nga ideya.

Istorya na, adda dagiti kangrunaan a lider ken dadaulo idi iti organisasyon ti Europa ti “agaw-awiten ti linya iti ideolohiya a kaniwas iti linya ti dokumento ti panagilinteg.” Palawag ni Ka Luis, nakarigrigat a tukad para kadakuada ti panawen ti panagpinget nga ipalawag ti dokumento a “Balbaliw a Pasingkedan,” ken allukoyen dagiti kakadwa iti Netherlands nga awaten ti kinapateg daytoy.

Inbingay na met ti kaso ti maysa a dati a kadwa a nangsupyat iti tignay panagilinteg basar iti panagkita dagiti gagayyem na, imbes a pagadalan ken sukimaten a naimbag ti dokumento nga inruar ti Partido. Nayon pay ni Ka Luis, idiay met laeng a tukad a timmaud idiay Netherlands ti awag a “kontras” kadagiti “rejectionist” wenno nangilaksid iti tignay panagilinteg.

Nu saan a napasamak ti MNTP, saan ko nga ammo nu anya ti posible a napasamak iti rebolusyonaryo a tignay tayo,” segun ken Ka Luis. Intudo ken inlinteg ti Partido idi MNTP dagiti mayor a kamkamali a nagraira iti tignay iti uneg ti adu a tawen. Kabilang kadagitoy a nagkamalian ti linya ti “estratehiko a kontra-opensiba” a kaniwas iti tallo a tukad ti gubat ti umili. Idi dekada 1980 idiay Mindanao, adelantado a nagitakder ti dadakkel a pormasyon a militar a makagapu ti panangibbat iti gawaing masa ken nagibunga ti dadakkel a perdi.

“Imbes nga amirisen nu apay a nagbalin a kasdiay, ti kongklusyon dagiti kontras ket gapu ta adda dagiti espiya iti tignay (wenno dagiti Deep Penetration Agent). Nagtennag daytoy iti kasasaeman a panawen iti rebolusyonaryo a pakasaritaan tayo,” istorya ni Ka Luis.

Kas ti tignay panagilinteg iti agdama nga isaysayangkat ti Komite Sentral, ti MNTP iti kaunggan na ket maysa a tignay panagadal. Ti kinakurang iti trabaho a pang-ideolohiya iti adu a tawen ket nagibunga kadagiti seryoso a kamkamali.

“Kamaudianna, bassit a porsyento laeng ti rebolusyonaryo a tignay ti nangsupyat iti tignay panagilinteg. Ti nabatbati ket pimmauneg iti panagilinteg iti ideolohiya, pulitika ken organisasyon. Pimmigsa ti NPA. Naglukat ti adu a larangan gerilya ti hukbo. Balbaliw tayo a nasubbot ti talek ti masa kadatayo,” segun ken Ka Luis.

Salaysay ni Ka Luis, nagbaknang ti kaban ti adal nga inbati kadatayo ni Ka Joma. Manipud iti panangbuangay daytoy, panangitudo kadagiti nagkamalian ken panagabante kalpasan ti tignay panagilinteg. “Iti maudi a mensahe na kadatayo, kunana: Saan a maatiw ti Nailyan Demokratiko a Rebolusyon ti umili a Pilipino!”