Kadagiti sumaruno a bulan ken umay a tawen, sipipinget ken sistematiko a palawaen ken papigsaen tayo ti New People’s Army (NPA) kas takyag ti umili a Pilipino iti panaglaban iti pasista a panagari ti rehimen US-Marcos. Iti sango ti kumarkaro a panangidadanes iti umili, kumarkaro a pangpulitika a represyon ken bumasbassit nga espasyo para iti demokratiko a panagiyebkas ken tignay, dumakdakkel ti pagkasapulan nga usatan ti dana ti armado a dangadang.

Inpataw ni Marcos ti saan a deklarado a linteg militar iti ribo a barbaryo iti intero a pagilyan tapno rebbeken ti panaglaban ti masa a mangsaksalaknib iti biag ken pagbiaganda. Waywayaan dagiti armado a tropa ni Marcos ti gamrud ken managdadael nga operasyon a komprador dagiti korporasyon iti minas ken dagiti plantasyon. Agsusumbangir dagiti kaso ti pammapatay, pammutbuteng, iligal a panagaresto ken panagibalud laban iti masa a mannalon ken minorya a tumaktakder ken lumablaban.

Uray iti kasyudadan, awan-sarday ti panagespiya ken panaglipit iti umili nga organisado a mangilablaban iti pagimbagan da. Punpurtiryaen ni Marcos, nangruna, dagiti mangmangged, dagiti mala-mangmangged, dagiti kabataan-estudyante ken dadduma pay a sektor nga agtitipon iti panggep nga iyabante dagiti demokratiko a kadawatan da. Maap-apput ti ngiwat da tapno pawilan ti pukkaw da nga ingato ti sweldo, ibaba ti presyo, disente a trabaho, naan-anay a badyet para iti edukasyon ken dagiti serbisyo iti gimong.

Iti napalabas a nasurok pito a tawen, ginasut a bilyon a piso a pondo ti umili ti inbukbok ken binusbos ti reaksyunaryo nga estado iti gera ti represyon iti dangdang ti umili para iti nailyan a demokrasya. Nagulib a gagem daytoy a rebbeken ti NPA kas armas ti demokratiko a bileg ti umili, ken puntiryaen ken pawilan ti organisado a pwersa ti umili. Panggep daytoy a mapalubosan a makapagturay ti reaksyunaryo a bileg iti pagilyan, ken saan a mapawilan nga agakop ti kinabaknang iti panagtakaw ken panaggundaway dagiti imperyalista, dadakkel a burgesya komprador ken dadakkel nga apo’t daga.

Gubuay ti pang-uneg a kamkamali a bunga ti nagbalin a pagkapuyan iti panangsango iti todo nga atake ti kabusor, nagsagrap ti seryoso a dangran ti nadumaduma a yunit ti NPA. Napapanawen nga inpanawagan ti Partido ti tignay panagilinteg idi agtapos ti 2023 tapno ilinteg dagiti napalabas a nagkamalian iti panangiyabante ti tignay rebolusyonaryo, karaman ti nadumaduma nga aspeto ti gubat ti umili, tapno ibaw-ing ti hukbo ti umili manipud iti panagsanud agturong iti balbaliw a panag-abante.

Iti tarabay ken inspirasyon ti tignay panagilinteg, agpurpursige dagiti Nalabbaga a mannakigubat ti NPA iti panangiyabante ti naunday a gubat ti umili. Napaay ti deklarado a panggep ti rehimen US-Marcos a rebbeken ti armado a rebolusyon iti gibus ti napalabas a tawen. Agtultuloy tatta ti NPA iti panangpalapad ken panangpauneg ti base a masa, iti panangpapigsa kadagiti dangadang ti masa nga antipyudal ken antipasista, ken iti panangisayangkat kadagiti taktikal nga opensiba laban kadagiti napeklan a pasista a tauhan ni Marcos.

Iti panangiyabante ti tignay panagilinteg, kasapulan a nairut a pangiggeman ti amin a kadre ken rebolusyonaryo a pwersa ti armado a dangadang kas kangrunaan a langa ti dangadang, bayat a sekundarya ti naparang a tignay masa ken dadduma pay a langa ti dangadang, iti panangipatungpal ti sentral a rebbengen nga ibagsak ti neokolonyal nga estado dagiti burges-komprador ken apo’t daga. Nasken a patibkeren ti amin a kameng ti Partido ti kinasagana nga agiggem ti armas ken tumipon iti armado a dangadang.

Rumbeng a sipapasnek nga agibingay dagiti rebolusyonaryo a pwersa iti kasyudadan iti kumprehensibo a panagabante ti armado a dangadang iti kaaw-awayan. Usatan tayo ti nalapad a dana para iti panagmartsa ti saan a maartapan a bilang dagiti mangmangged, mala-mangmangged ken petiburges nga intelektwal manipud iti kasyudadan wenno uray iti ballasiw-taaw, agturong iti dana ti armado a dangadang. Kasapulan ti NPA dagiti kadre a mangmangged ken intelektwal tapno agserbi a Nalabbaga a mannakigubat, kumander ken upisyal iti pulitika ti NPA, bayat a daldalyasaten daytoy ti dana ti balbaliw a panagabante.

Tapno magun-od daytoy, kasapulan a palawaen ken papigsaen ti tignay masa iti kasyudadan, iyabante dagiti dangadang ti masa, papigsaen dagiti timpuyog ti masa, karaman dagiti limed nga organisasyon ti masa ken ingato ti rebolusyonaryo a kamulatan dagiti rebolusyonaryo a pwersa iti kasyudadan.

Iti atas ti Partido, makatawen a lukluktan ti ruangan para iti integrasyon ken rekrutment iti hukbo ti umili, malaksid pay kadagiti anibersaryo ti Partido, NPA wenno NDFP. Dagiti yunit ti NPA ket nakasagana nga umawat kadagiti pangkat ti aktibista ken kadre manipud iti kasyudadan tapno makipagbiag kadagiti Nalabbaga a mannakigubat, agpaisidong kadagiti pagsasanay pulitiko-militar, dumar-ay kadagiti innadal, produksyon wenno dagiti pangkultura nga aktibidad, agserbi iti masa a mannalon, agbalin a dentista, medik wenno manursuro ti masa, makikaykaysa iti kampanya nga antipyudal, ken mangibingay iti panagipundar ti Nalabbaga a bileg ti demokratiko a gubyerno ti umili.

Kapada nga addaan plano dagiti sangay ken seksyon ti Partido iti kaaw-awayan, rumbeng nga agbukel dagiti komite ken sangay ti Partido ken rebolusyonaryo nga organisasyon ti masa iti kasyudadan ken il-ili ti makatawen a plano tapno isimpa ti programa iti grupu-grupo nga integrasyon wenno panagkameng iti hukbo ti umili.

Iyaramid ti kampanya ti innadal panggep iti armado a dangadang kas kangrunaan nga armas ti panaglaban ken kanaig iti disiplina ti NPA. Pasaknapen ti panagadal iti agtultuloy a pakasaritaan ti armado a panaglaban ti umili a Pilipino para iti nailyan a wayawaya. Umadaw ti inspirasyon iti pakasaritaan ti biag dagiti rebolusyonaryo a banwar, a sipupuso a nagidaton ti sirib ken biag da para iti umili.

Kagiddan daytoy, nasken a papigsaen ti kampanya ti panagkalap ti amin a langa ti suporta para iti hukbo ti umili, manipud iti pinansya ken taraon, agingga kadagiti armas a panggubat, karamanen ti panangaywan kadagiti agpapaagas ken agpapaimbag.

Kasapulan a patibkeren ti panunot ken bagi dagiti kadre ken aktibista a makipagbiag wenno naan-anay nga agkameng iti hukbo ti umili, nangruna iti sango ti todo a pasista nga atake ti kabusor. Kuna ngarud ni Mao, saan a pasken ti rebolusyon. Ngem iti denna ti masa, inaldaw a nabsog dagiti Nalabbaga a mannakigubat iti tagiben ken ayat ti masa.