Nagtirok an magkalain-lain nga demokratiko nga grupo ha Liwasang Bonifacio, Manila hadton Enero 31 para ilansar an protesta kontra ha “3K” o Kilos Bayan laban sa kahirapan, korapsyon at kawalang-pananagutan. Tinambong ha paggios an mga estudyante, magturutdo, trabahador, propesyunal, mga tawo-han-singbahan, administrador han unibersidad, ngan progresibo nga partido. Ginpangunahan ini han Taumbayan Ayaw sa Magnanakaw at Abusado Network Alliance (TAMA NA).

Kapareho nga mga paggios an iginlansar ha Naga City, Cebu City, Iloilo City, ngan Bacolod City ha pangunguna han TAMA NA ngan mga tsapter han Bagong Alyansang Makabayan. Hiton gihap nga adlaw, duha pa nga protesta an iginlansar han iba nga mga grupo, ngaduha ha atubangan han People Power Monument ha EDSA.

Antes hini, iginlansar an pagdagkot han kandila ngan halipot nga protesta hadton Enero 30. Hadton Enero 27, nagprotesta an mga konseho han estudyante, pankampus nga mantalaan ngan grupo han kabatan-unan ha Liwasang Bonifacio ha pangunguna han Leaders and Advocates of the Youth for the Accountability of Sara Duterte (LAYAS Duterte) Network nga igintukod hadton Enero 23.

Hadton Enero 26, nagmartsa an mga magturutdo ha ilarum han Alliance of Concerned Teachers ha Baguio City para ha sweldo, badyet ha edukasyon ngan baratunon ha kakurian, korapsyon ngan kawaray baratunon han gubyerno. Iginduduso nira an impeachment kan Duterte nga sigon ha ira palpak ha pagserbe komo daan nga sekretaryo han Department of Education.

Haton Enero 24, ginpangunahan han Kilusang Mayo Uno an protesta nga “UWIAN Na” para ha suhol ngan kontra ha kawat ha Quezon City. Tumikang an panawagan nga UWIAN Na ha “Unite for Wage Increase at Ag- ainst Nakaw sa Gubyerno.”