Nagtipon ang nagkalain-lain nga demokratikong grupo sa Liwasang Bonifacio, Maynila sadtong Enero 31 para tigayunon ang protesta batuk sa “3K” ukon ang Kilos Bayan laban sa kahirapan, korapsyon at kawalang pananagutan. Nagtambong sa hublag ang mga estudyante, manunudlo, mamumugon, propesyunal, mga tawong-simbahan, administrador sang unibersidad, kag progresibong partido. ginpangunahan ini sang Taumabayan Ayaw sa Magnanakaw at Abusado Network Alliance (TAMA NA).

Kasubong nga mga hublag ang ginlunsar sa Naga City, Cebu City, Iloilo City, kag Bacolod City sa pagpanguna sang TAMA NA kag mga sanga sang Bagong Alyansang Makabayan. Sa amo man nga adlaw, duha pa ka protesta ang ginlunsar sang iban nga grupo, lunsay sa atubang sang People Power Monument sa EDSA.

Bag-o sini, ginlunsar ang pagsindi sang kandila kag malip-ot nga protesta sadtong Enero 30. Sadtong Enero 27, nagprotesta ang mga konseho sang estudyante, pamantalaan pangkampus kag grupo sang pamatan-on sa Liwasang Bonifacio sa pagpanguna sang Leaders and Advocates of the Youth for the Accountability of Sara Duterte (LAYAS Duterte) Network nga gintukod sadtong Enero 23.

Sadtong Enero 26, nagmartsa ang mga manunudlo sa idalom sang Alliance of Concerned Teachers sa Baguio City para sa sweldo, badyet sa edukasyon kag salabton sa kapigaduhon, korapsyon kag impunity sang gubyerno. Ginaduso nila ang impeachment kay Duterte nga suno sa ila palpak sa pag-alagad nga anay tiglikom sang Department of Education.

Sadtong Enero 24, ginpangunahan sang Kilusang Mayo Uno ang protesta nga “UWIAN Na” para sa suhol kag batuk sa kawat sa Quezon City. Ang panawagan nga UWIAN Na ang naghalin sa “Unite for Wage Increase at Against Nakaw sa Gobyerno.”