Nagtapok ang lain-laing demokratikong grupo sa Liwasang Bonifacio, Manila niadtong Enero 31 aron ipahigayon ang protesta batok sa “3K” o ang Kilos Bayan batok sa kalisud, korapsyon ug kawalay tulubagon. Mitambong sa protesta ang mga estudyante, magtutudlo, mamumuo, propesyunal, mga tawong-simbahan, administrador sa unibersidad, ug progresibong partido. Gipangunahan kini sa Taumbayan Ayaw sa Magnanakaw at Abusado Network Alliance (TAMA NA).

Susamang mga protesta ang gilunsad sa Naga City, Cebu City, Iloilo City, ug Bacolod City sa pagpanguna sa TAMA NA ug mga balangay sa Bagong Alyansang Makabayan. Niadtong adlawa, duha pa ka protesta ang gilunsad sa laing mga grupo, pareho atubangan sa People Power Monument sa EDSA.

Sa wala pa kini, gilunsad ang pagdagkot og kandila ug mugbong protesta niadtong Enero 30. Niadtong Enero 27, nagprotesta ang mga konseho sa mga estudyante, mantalaang pangkampus ug grupo sa kabatan-onan sa Liwasang Bonifacio sa pagpanguna sa Leaders and Advocates of the Youth for the Accountability of Sara Duterte (LAYAS Duterte) Network nga gitukod niadtong Enero 23.

Niadtong Enero 26, nagmartsa ang mga magtutudlo ubos sa Alliance of Concerned Teachers sa Baguio City alang sa sweldo, badyet sa edukasyon ug pagpanubag sa kalisud, korapsyon ug impunity sa gubyerno. Giduso nila ang impeachment kang Duterte nga matud nila napakyas sa pagserbisyo isip kanhi kalihim sa Department of Education.

Niadtong Enero 24, gipasiugdahan sa Kilusang Mayo Uno ang protestang “UWIAN Na” alang sa suhulan ug batok sa pagpangawat sa Quezon City. Ang panawagang UWIAN Na naggikan sa “Unite for Wage Increase at Against Nakaw sa Gobyerno.”