Niadtong Pebrero 5, mipirma ang dili moubos sa 215 ka mga kongresista sa kasong impeachment o asunto batok kang Bise Presidente Sara Duterte aron palagputon kini sa pwesto. Gipadayon ang kasong impeachment batok kang Duterte human sa halos duha ka bulan nga pagdelatar niini sa rehimeng Marcos. Gipasiugdahan mismo sa anak sa Presidente nga si Ferdinand Marcos nga si Sandro Marcos ang pag-endorso sa pang-upat nga reklamo.

Gipasaka ang impeachment sa katapusang adlaw sa regular nga sesyon sa Kongreso. Sa wala pa kini, tulo ka impeachment complaint na ang gipasaka sa Kongreso. Ang ikaduha niini gisumite sa mga progresibong organisasyon ug indibidwal ug giendorso sa Koalisyong Makabayan.

Adunay pito ka artikulo ang pang-upat nga reklamong impeachment. Nag-una dinhi ang “pakigkunsabo aron patyon si Marcos, iyang asawang si Liza Araneta ug si House Speaker Martin Romualdez.” Gihimo ni Duterte ang hulga niadtong Nobyembre 23, 2024 taliwala sa pagdungog sa anomalya sa paggastos niya sa confidential funds nga gigahin sa iyang upisina.

Ang uban pang mga basihan mao ang: korapsyon sa ₱615.5 milyon sa confidential funds; pagpanuhol ug korapsyon sa Department of Education; di mapatin-aw nga bahandi ug kapakyasan nga ibutyag sa iyang mga kabtangan sa Statement of Assets, Liabilities, and Net Worth; pagkalambigit sa ekstra-hudisyal nga pagpamatay sa Davao City, mga maniobra nga destabilisasyon, lakip ang pagboykot niya sa State of the Nation Address ug pagharang sa mga pagdungog sa Kongreso; ug “pangkinatibuk-ang kondukta” isip Bise Presidente ug ikaduhang pinakataas nga upisyal sa nasud.

Ang giendorsong resolusyon gipadala sa Senado nga maoy adunay katungdanan sa pagtukod sa korte nga modungog sa mga reklamo. Kung makonbikto, dili lamang masipa sa pwesto si Duterte, mapugngan usab siya sa pagdagan pag-usab sa bisan unsang posisyon sa sunod nga mga eleksyon.

Ang pinakabag-ong tsapter sa girian sa paksyong Marcos ug Duterte usa ka timaan sa pagkusog sa panagbangi tali nila. Gipakita niini ang labaw pang paglalum sa pagkabahinbahin sa han-ay sa mga nagharing reaksyunaryong hut-ong, diin nag-ilogay sa mga burukrata-kapitalistang pribilehiyo ug gahum ang mga magkaaway nga paksyon ug pundok.

Mayor nga lakang ang impeachment sa pagkonsolida sa mga Marcos sa gahum niini sa pulitika, ilabina sa sulod sa militar, pulis ug depensa. Kauban niini, gipalig-on usab ni Marcos ang iyang pagkamatinud-anon sa imperyalistang US pinaagi sa labaw pang pagpakusog sa pakigtambayayong sa US sa mga propagandang anti-China ug operasyong nabal nga gidirehe sa US sa West Philippine Sea, sa takuban sa “pagpalambo sa soberanya sa Pilipinas.”

Malipayong gidawat sa mga Pilipino ang impeachment ni Sara Duterte isip unang lakang aron manubagong ang Bise Presidente ug tangtangon siya sa iyang pwesto, isip lakang aron silutan siya sa iyang mga krimen sa katiwalian. Kinahanglan pang palig-onon ug palapdon sa mga katawhan ang ilang mga protesta aron iduso ang Senado nga magtigum dayon isip korte ug sugdan gilayon ang pagtaral.

Ang impeachment kadaugan sa kalihukang masa nga padayon sa pagpakusog sa protesta alang niini. Labaw niining palig-onon ang kabubut-on ug determinasyon sa katawhan aron singilon si Marcos mismo sa mas dagkung krimen sa korapsyon sa dagway sa iyang kaugalingong confidential funds, pork barrel sa pormang ayuda, pagkontrol sa binilyong pondo sa Maharlika Fund ug pagkuha sa “wala magasto” nga pondo sa PhilHealth. Kinahanglan usab nga manubag si Marcos sa pagbasura niya sa mga nakasampang kaso sa kinawat nga bahandi sa iyang pamilya nga nagkantidad og dili moubos sa ₱202 bilyon.

Sa bahin sa mga progresibong grupo, ilang gitan-aw isip kadaugan ang impeachment sa katawhang nakigbisog aron manubag ang mga Duterte ug ang ilang pundok sa mga paglapas sa tawhanong katungod. Matud pa nila, sa pagduso ug nagkahiusang paglihok, pagpanghingusog, ug pagbantay sa katawhan nakab-ot ang unang lakang sa pagpanubag sa korapsyon. Lakip sa panawagan nga hukmang sad-an si Duterte, gisingil nila ang rehimeng Marcos sa pagkainutil niini sa pagtubag sa nagkagrabeng korapsyon sa iyang rehimen.

Sa adlaw sa pagbotar, nagtigum sila atubangan sa Kongreso aron ipanawagan nga hukman dayon si Duterte. Adunay parehong protesta sa Cabuyao, Laguna.