Sadtong Pebrero 5, nagpirma ang indi magnubo sa 215 kongresista sa kaso nga impeachment ukon pagkakas kontra kay bise president Sara Duterte para pahalinon ini sa pwesto. Gindayon ang kaso nga impeachment kontra kay Duterte matapos ang halos duha ka bulan nga pag-atrasar diri sang rehimen Marcos. Ginpangunahan mismo sang bata sang presidente nga si Ferdinand Marcos nga si Sandro Marcos ang pag-endorso sa ika-apat nga reklamo.

Ginpasaka ang impeachment sa ulihi nga adlaw sang regular nga sesyon sang Kongreso. Bag-o sini, tatlo ka impeachment complaint na ang ginpasaka sa Kongreso. Ang ikaduha diri ang ginhan-ay sang mga progresibo nga organisasyon kag indibidwal kag gin-endorso sang Koalisyon nga Makabayan.

May pito ka artikulo ang ika-apat nga reklamo nga impeachment. Nagapanguna diri ang “paghagyatanay para patyon si Marcos, iya nga asawa nga si Liza Araneta kag ang House Speaker Martin Romualdez.” Ginhimo ni Duterte ang pamahog sadtong Nobyembre 23, 2024 sa tunga sang pagtalakay sa anomalya sa pag-gasto niya sang confidential funds nga gintigana sa iya nga upisina.

Ang iban pa nga basehan amo ang: korapsyon sa ₱615.5 milyon sa confidential funds; pagpanuhol kag korapsyon sa Department of Education; indi mapa-athag nga manggad kag kapaslawan nga ibulgar ang iya mga propedad sa Statement of Assets, Liabilities, and Net Worth; pagkadalahig sa ekstra-hudisyal nga pagpamatay sa Davao City, mga maniobra nga destabilisasyon, kabahin ang pagboykot niya sa State of the Nation Address kag pagharang sa mga pagtalakay sa Kongreso; kag “pangkabilugan nga kondukta” isip bise presidente kag ikaduha nga pinakamataas nga upisyal sa pungsod.

Ang gin-endorso nga resolusyon ang ginpadala sa Senado nga amo ang may katungdanan nga tukuron ang korte nga magapamati sa mga reklamo. Kung mahukman, indi lang masipa sa pwesto si Duterte, mapunggan man siya nga liwat magpadalagan sa ano man nga pusisyon sa masunod nga mga eleksyon.

Ang pinaka-ulihi nga hugna sang banggianay sang hubon sang Marcos kag Duterte ang marka sang pagsingki sang awayan sa tunga nila. Ginapakita sini ang labaw pa kadalom nga pagkabahin-bahin sa sulod sang mga nagapamuno nga reaksyunaryong sahi, kung sa diin naga-agaway sa mga burukrata-kapitalista nga pribilehiyo kag gahum ang mga magkaribal nga paksyon kag grupo.

Mayor nga tikang ang impeachment sa pagkonsolida sang hubon ni Marcos sa gahum sini sa pulitika, ilabi na sa sulod sang militar, pulis kag depensa. Kadungan sini, ginapabakod man ni Marcos ang iya katampad sa imperyalistang US paagi sa labaw pa nga pagpabaskog sang pakigbinuligay sa US sa mga propaganda nga anti-China kag operasyon nabal nga ginakumpas sang US sa West Philippine Sea, sa tabon sang “pagsulong sang soberanya sang Pilipinas.”

Kinabubut-on nga ginbaton sang mga Pilipino ang impeachment ni Sara Duterte isip una nga tikang para pasabton ang bise presidente kag kakson siya sa iya nga pwesto, isip tikang para silotan siya sa iya nga mga krimen sang korapsyon. Kinahanglanon pa nga pabaskugon kag pasangkaron sang pumuluyo ang ila mga paghulag agud iduso ang Senado nga gilayon nga magtipon isip korte kag sugdan ang paghukom sa ilabi nga madali nga panahon.

Ang impeachment ang kadalag-an sang kahublagan masa nga tayuyon sa pagpabaskog sang protesta para diri. Ilabi sini nga pabaskugon ang buot kag determinasyon sang pumuluyo para sukton si Marcos mismo sa mas madako nga krimen sang korapsyon sa porma sang iya kaugalingon nga confidential funds, pork barrel sa porma sang ayuda, pagkontrol sa binilyon nga pondo sang Maharlika Fund kag pagkuha sa “wala nagasto” nga pondo sang Philhealth. Dapat man nga pasabton si Marcos sa pagbasura niya sa mga napasaka nga kaso sang kawat nga manggad sang iya nga pamilya nga nagakantidad sang indi magnubo sa ₱202 bilyon.

Sa habig sang mga progresibo nga grupo, pagalantawon nila nga kadalag-an ang impeachment sang pumuluyo nga nagahimakas para pasabton ang mga Duterte kag ang ila grupo sang mga naglapas sa tawhanon nga kinamatarung. Suno sa ila, sa pagtulod kag ululupod nga paghulag, pagduso, kag pagbantay sang katawhan naangkon ang pasiuna nga tikang sa pagpasabat sa korapsyon. Kadungan sang panawagan nga hukman nga maysala si Duterte, ginsukot nila ang rehimen Marcos sa ka-inutil sini nga sabton ang nagalala nga korapsyon sang iya nga rehimen.

Sa adlaw sang binotohay, nagtipon sila sa atubang sang Kongreso para ipanawagan nga hinanali nga hukman si Duterte. May yara sang kasubong nga protesta sa Cabuyao, Laguna.