Hadton Pebrero 5, nagpirma an diri mamenos ha 215 nga kongresista ha kaso nga impeachment o kaso kontra kan bise presidente Sara Duterte para patalsikon ini ha pwesto. Iginpadayon an kaso nga impeachment kontra kan Duterte kahuman han haros duha kabulan nga pagdelatar dinhi han rehimen Marcos. Ginpangunahan mismo han anak han presidente nga hi Sandro Marcos an pag-endorso ha ika-upat nga reklamo.

Ginsalawad an impeachment ha urhi nga adlaw han regular nga sesyon han kongreso. Antes hini, tulo nga reklamo han impeachment na an ginsalawad ha Kongreso. An ikaduha hini ginsalawad han mga progresibo nga organisasyon ngan indibidwal ngan igin-endorso han Koalisyon nga Makabayan.

Mayda pito nga artikulo an ikaupat nga reklamo nga impeachment. Nangunguna hini an “pakigkunsabuhay para patayon hi Marcos, an iya asawa nga hi Liza Araneta ngan an House Speaker Martin Romualdez.” Ginhimo ni Duterte an panarhug hadton Nobyembre 23, 2024 ha butnga han pagbista han anomaliya ha paggastos niya han confidential funds nga gin-alutaga ha iya upisina.

An iba pa nga basaranan amo an: korapsyon han ₱615.5 kamilyon ha confidential funds, pagsuborno ngan korapsyon ha Department of Education; diri mahieksplikar nga karikuhan ngan kapakyasan nga igdeklara an iya mga pananag-iya ha Statement of Assets, Liabilities, and Net Worth; pagkadabi ha ektrahudisyal nga panmatay ha Davao City, mga maniobra nga destabilisasyon, kalakip an iya pagboykot ha SONA ngan pag-ulang ha mga pagbista ha Kongreso; ngan “kabug-usan nga higwaos” komo bise presidente ngan ikaduha nga pinakahitaas nga upisyal han nasud.

Iginpadangat ha Senado an igin-endorso nga resolusyon han impeachment, nga mayda buruhaton nga bug-uson an korte nga magbibista ha mga reklamo. Kun masentensyahan, diri la mapapatalsik ha pwesto hi Duterte, mapupugngan liwat hiya nga utro nga dumalagan ha bisan ano nga pusisyon ha masunod nga mga eleksyon.

An pinakaurhi nga hugna han pingkiay han grupo nga Marcos ngan han mga Duterte tigaman han pagpintas han sumpakiay giutan nira. Ginpapakita hini an dugang pa nga paghilarum han pagkabuhag-buhag ha sakob han mga namumuno nga reaksyunaryo nga mga klase, diin nag-aaragaw ha mga burukrata-kapitalista nga pribilehiyo ngan poder an mga magkaribal nga paksyon ngan grupo.

Mayor nga pitad an impeachment ha pagkonsolida han grupo nga Marcos ha poder hini ha pulitika, labina ha sakob han militar, pulis ngan depensa. Kadungan hini, ginpapadig-on liwat ni Marcos an iya leyaltad ha imperyalista nga US pinaagi han dugang pa nga pagpakusog han pakigbuligay ha US ha mga propaganda nga kontra-China ngan operasyon nga nabal nga gindidiriher han US ha West Philippine Sea, ha tahub han “pagpasulong han soberaniya han Pilipinas.”

Malipayon nga ginkarawat han mga Pilipino an impeachment ni Sara Duterte komo pasiuna nga pitad para papagbatunon an bise presidente ngan tanggalon hiya ha iya pwesto, komo pitad agud sirutan hiya ha iya mga krimen han korapsyon. Ginkikinahanglan pa nga pakusgon ngan pahiluagon han katawhan an ira mga paggios agud iduso an Senado nga ha gilayon magtirok komo usa nga korte ngan tikangan an pagbista ha pinakamadagmit nga panahon.

Kadaugan han kagiusan masa an impeachment, nga dirudiretso ha pagpapakusog han protesta para hini. Dugang hini nga pakukusgon an kaburut-on ngan determinasyon han katawhan agud sukton hi Marcos mismo ha mas dagko nga krimen han korapsyon ha porma han iya kalugaringon nga confidential funds, pork barrel ha porma nga ayuda, pagkontrol ha bilyun-bilyon nga pondo han Maharlika Fund ngan pagkuha ha “waray magasto” nga pondo han Philhealth. Kinahanglan liwat papagbatunon hi Marcos ha pagpapabasura niya ha mga nakasalawad nga kaso han kinawat nga karikuhan han iya pamilya nga nabalor hin diri mamenos ha ₱202 kabilyon.

Ha gapil han mga progresibo nga grupo, ginkukulawan nira nga kadaugan an impeachment han katawhan nga nakikigbisog para pagbatunon an mga Duterte ngan an ira grupo han mga natalapas ha tawhanon nga katungod. Sering nira, ha pagpursige ngan duruyog nga paggios, pag-insister, ngan pagin mabinantayon han katawhan nakab-ot an pasiuna nga pitad ha pagpapabaton ha korapsyon. Kadungan han panawagan nga sentensyahan nga salaan hi Duterte, ginsusukot liwat nira an rehimen Marcos ha kawaray pulos hini nga batunon an natikagrabe nga korapsyon han iya rehimen.

Ha adlaw han borotosay, nagtirok ha atubangan han Kongreso para ipanawagan nga dagmit nga husgaran hi Duterte. Nagkamayda hin pareho nga protesta ha Cabuyao, Laguna.