Iginselebrar han Liga ng Agham para sa Bayan (LAB) an ika-49 nga anibersaryo hini hadton Disyembre 2024. Ha usa nga sikreto nga katitirok ha National Capital Region, maabot ha 50 nga kaapi hini an nagtirok para magkadungan nga igselebrar an ira anibersaryo ngan an ika-56 nga anibersaryo han Partido Komunista ng Pilipinas.

Ginbalikan nira ngan iginselebrar an dirudilain nga kadaugan nga nakab-ot han mga tsapter hini ngan ginkahitapo nga mga ayat ha tuig 2024, labina ha panahon han syahan nga tuig han kagiusan nga pagtutul-id. Ginpasidunggan liwat han LAB an tanan nga mga rebolusyunaryo nga martir tikang ha sektor han siyensya ngan teknolohiya nga naghalad han ira kinabuhi para ha katawhan ngan ha rebolusyon.

“Nagin landaw an mga kadaugan ha mga kampanya, ha utro nga pagrayhak han pag-oorganisa ha ranggo han batakan nga masa, ngan ha pagpauswag han suporta para ha Bagong Hukbong Bayan (BHB),” sigon ha report han Agham Bayan, mantalaan han LAB. Ha luyo hini, ginpahayag nira nga dako pa an kinahanglan ungbawan nga mga kaluyahan kalakip na an konserbatismo ha pagrekrut han bag-o nga mga kaapi.

Sigon ha editoryal han Agham Bayan, “kinahanglan klaro ha aton, komo mga rebolusyunaryo, nga an nangunguna nga katuyuanan naton ha paglansar han kampanya amo an pagbaton ha interes han masa ngan pagpadamo ngan pagpakusog han aton rebolusyunaryo nga pwersa.” Yana nga 2025, ginsering han LAB nga dirudiretso hini nga ig-uundong an mga buruhaton agud makabulig ha pagpasulong ngan pagpakusog han rebolusyon Pilipino.

Dugang pa han LAB, ginpakita hini ha ira nga posible nga papelan han usa nga siyentista an rebolusyunaryo nga buruhaton nga ipasulong an nasyunal-demokratiko nga rebolusyon nga may sosyalista nga perspektiba, ha mga laboratoryo ngan klasrum ha kasyudaran tubtub ha armado nga pakig-away ha kabaryuhan.

“Igdidirudiretso han mga rebolusyunaryo nga siyentista, inhinyero, propesyunal, ngan estudyante an kagiusan nga pagtutul-id agud makab-ot an dugang nga kadaugan,” sering hini. Mag-aandam liwat an LAB para ha bulawanon nga anibersaryo hini ha Disyembre.

Biyolohista ha hukbo han katawhan

Usa hi Ka Jerry ha mga rebolusyunaryo nga siyentista nga bumaton ha panawagan nga mag-integreyt ha BHB. Nag-integreyt hiya ha usa nga yunit han hukbo han katawhan ha Luzon. “Para ha akon komo biyolohista, usa nga dako nga oportunidad an pagigin Pula nga mangaraway agud pahilarumon an aton kahibaruan ha saribuhay o biodiversity han aton nasud,” pasaro niya.

Tikang ha mga lugar nga gin-uukyan, tubtub ha ginkakaon, kada adlaw nga nakakaupod han Pula nga mangaraway an kalibungan. Kasagaran nga aada ha kagugub-an ngan kabukiran an mga yunit han BHB. Danay naman ha mga patag nga erya. Bisan kun dirudilain an kamutangan han mga guba, bukid ngan kapatgan, ha ngatanan nga higayon baga hin mga “field re-searcher” an mga Pula nga mangaraway ha ira integrasyon ha kalibungan.

Sering niya, “ha kada adlaw nga buruhaton namon ha yunit, nakikit-an namon an dirudilain nga species—tanaman, ulaping, mananap, tamsi, ngan iba pa.” Agsub liwat kuno kumita an yunit hin mga endemiko o katutubo nga tanaman o hayop sugad han jade vine, corpse flower, hornbill o kalaw, ngan daramo pa nga iba. “Damo kabeses liwat nga nahingadto an yunit ha mga lugar nga posible diri pa pisikal nga nakakadtuan han mga siyentista, bisan hin-o man—diri kita maaram, bangin makadiskubre kita han mga bag-o nga species hini nga mga lugar.

Nakakabulig liwat kuno an pagigin maaram ha biodiversity para ha panginahanglan ha pagkaon han hukbo han katawhan ngan han masa. “Dirudilain nga species an ginpupulsan namon ha buruhaton produksyon. Labina ha mga magkuri nga kamutangan ha mga lugar nga hirayo ha komunidad, malalauman nga surok han pagkaon an biodiversity han kagugub-an,” asoy niya. Nagpapatuman liwat an yunit han BHB hin mga palisiya agud likyan an pandakop ha mga ginkukunsidera nga endangered species o klase han hayop nga nanenelikado na nga mawara.

“Damo an posible mahibaruan ngan madiskubre hiunong ha biodiversity han aton nasud, ha konteksto han aton pagpartisipar ha rebolusyunaryo nga pakig-away para ha katawhan Pilipino,” sering niya. Dugang pa ni Ka Jerry, pahinumdom liwat ini nga karikuhan para ha iya kun kay ano kinahanglan magpartisipar ha gerra han katawhan—para protektahan an kalibungan ngan katawhan ha pandambong han mga imperyalista ngan lokal nga naghahadi nga klase.