Gisaulog sa Liga ng Agham para sa Bayan (LAB) ang ika-49 nga anibersaryo niadtong Disyembre 2024. Sa usa ka sekretong panagtapok sa National Capital Region, mokabat sa 50 ka myembro ang nagtapok aron saulogon ang ilang anibersaryo ug ang ika-56 nga anibersaryo sa Partido Komunista ng Pilipinas.

Gidumdum ug gisaulog nila ang lain-laing kalampusan nga nakab-ot sa mga balangay niini ug mga pagsulay nga nasinati sa tuig 2024, ilabina sa panahon sa unang tuig sa kalihukang pagtul-id. Giparangalan usab sa LAB ang tanang mga rebolusyonaryong martir gikan sa sektor sa syensya ug teknolohiya nga naghalad sa ilang kinabuhi alang sa katawhan ug rebolusyon.

“Nahimong tataw ang mga kalampusan sa mga kampanya, sa pagbalik sa pag-organisa sa han-ay sa baseng masa, ug sa pagpalambo sa suporta alang sa Bagong Hukbong Bayan (BHB),” sumala sa taho sa Agham Bayan, mantalaan sa LAB. Bisan pa niini, gipadayag nila nga daghan pang mga kahuyangan ang kinahanglang patigbabawan lakip na ang konserbatismo sa pagrekrut og bag-ong mga myembro.

Sumala sa editoryal sa Agham Bayan, “kinahanglang klaro kanato, isip mga rebolusyonaryo, nga ang nag-una natong tumong sa paglunsad og kampanya mao ang pagtubag sa interes sa masa ug pagpadaghan ug pagpalig-on sa atong rebolusyonaryong pwersa.” Niining 2025, gipahayag sa LAB nga padayon niining ipatuman ang mga katungdanan aron makatabang sa pagpaabante ug pagpakusog sa rebolusyong Pilipino.

Dugang pa sa LAB, gipakita niini kanila nga posibleng tumanon sa usa ka siyentista ang rebolusyonaryong katungdanan nga iasdang ang nasudnon-demokratikong rebolusyon nga may sosyalistang perspektiba, gikan sa mga laboratoryo ug mga eskwelahan sa kasyudaran ngadto sa armadong pakigbisog sa kabanikanhan.

“Makanunayong ipatuman sa mga rebolusyonaryong siyentista, inhinyero, propesyunal, ug estudyante ang kalihukang pagtul-id aron makab-ot ang dugang nga kalampusan,” kini nagkanayon. Pagaandaman usab sa LAB ang ilang bulawanong anibersaryo sa Disyembre.

Biyolohista sa Hukbong Bayan

Usa si Ka Jerry sa mga rebolusyonaryong siyentista nga mitubag sa panawagan nga makigsandurot sa BHB. Milubog siya sa usa ka yunit sa hukbong bayan sa Luzon. “Alang kanako isip usa ka biyolohista, usa ka dakung oportunidad ang mahimong Pulang manggugubat aron palalumon ang atong kahibalo sa biodiversity sa atong nasud,” matud niya.

Gikan sa mga lugar nga gipuy-an, hangtod sa ginakaon, adlaw-adlaw nakig-uban ang Pulang manggugubat sa kinaiyahan. Kasagarang anaa sa kalasangan ug kabukiran ang mga yunit sa BHB. Usahay anaa sa mga patag nga lugar. Bisan og lain-lain ang kahimtang sa mga lasang, bukid, ug kapatagan, sa tanang mga higayon daw mga “field researcher” ang mga Pulang manggugubat sa ilang paglubog sa kinaiyahan.

Matud niya, “sa adlaw-adlaw nga buluhaton namo sa yunit, makita namo ang nagkalain-laing species—tanum, uhong, insekto, langgam, ug uban pa.” Kanunay usab nga makakita ang yunit og mga endemiko o lumadnong tanom o hayop sama sa jade vine, corpse flower, hornbill o kalaw, ug daghan pang uban. “Daghang beses usab nga nakaadto ang yunit sa mga lugar nga posibleng wala pa pisikal nga naadtoan sa mga siyentista—basin makadiskubre ta og bag-ong mga species dinhing mga lugara.”

Nakatabang usab kuno ang pagkamaalam sa biodiversity alang sa panginahanglan sa pagkaon sa hukbong bayan ug sa masa. “Nagkalain-laing species ang gigamit namo sa gimpuhatong produksyon. Ilabina sa mga pig-ot nga sitwasyon sa mga lugar nga layo sa komunidad, kasaligan nga gigikanan sa pagkaon ang biodiversity sa kalasangan,” saysay niya. Nagpatuman usab ang yunit sa BHB og mga palisiya aron malikayan ang pagdakop sa mga giilang endangered species o matang sa hayop nga nameligro nga mawala.

“Daghang posibleng makat-onan ug madiskubrehan mahitungod sa biodiversity sa atong nasud, sa konteksto sa pagsalmot nato sa rebolusyonaryong pakigbisog alang sa katawhang Pilipino,” siya nagkanayon. Dugang pa ni Ka Jerry, pahinumdum usab ang maong bahandi kung nganong kinahanglang mosalmot sa gubat sa katawhan—aron maprotektahan ang kinaiyahan ug katawhan sa pagpangawkaw sa mga imperyalista ug lokal nga nagharing hut-ong.