Walay hunong ang mga paglapas sa tawhanong katungod sa mga pwersa sa Armed Forces of the Philippines (AFP) ug Philippine National Police (PNP) batok sa katawhang Pilipino sa miaging mga semana.

Pagpamusil. Niadtong Enero 19, naigo ug nasamdan sa likod ang 61-anyos nga kanhing barangay kagawad ug mag-uuma nga si Marcial Detalo sa paturagas nga pagpamusil sa mga sundalo sa 2nd IB sa Sityo Balunos, Barangay Rizal, Dimasalang, Masbate. Aron tabunan ang krimen ug pagbutang sa peligro sa mga sibilyan, malisyosong gipahayag sa midya sa 2nd IB nga naigo sa bala sa Bagong Hukbong Bayan (BHB)-Masbate si Detalo atol sa gipagawas nga usa ka engkwentro sa lugar.

Pag-aresto. Niadtong Enero 27, gidakop sa mga pwersa sa estado ang 70-anyos nga si Myrna Cruz-Abraham, beteranong aktibista, sa San Rafael, Bulacan. Gidakop ang biktima pinasikad sa mandamyento de aresto nga gipagawas sa usa ka korte sa Cagayan kalabot sa mga kasong pakyas nga pagpatay ug pagpatay. Gitaho sa mga grupo sa tawhanong katungod nga nakagawas si Cruz-Abraham human sa walo ka adlaw.

“Terrorism financing.” Gipasakaan og mga hinimo-himong kaso sa “pagpondo sa terorismo” ang lima ka aktibista gikan sa Cagayan Valley.

Gikasuhan silang Isabelo Adviento, lider mag-uuma; Cita Managuelod nga peasant advocate; Agnes Mesina, koordineytor sa Makabayan Cagayan Valley; Jackie Valencia, tigpanalipud sa tawhanong katungod; ug si Deo Montesclaros, usa ka peryodista. Silang tanan dugay nang nanalipud sa katungod ug kaayuhan sa katawhan sa Cagayan Valley ug sa katawhang Pilipino.

Demolisyon. Sa tunga-tunga sa pagpahulay sa mga residente, tusong misulong niadtong Enero 29, alas-2 sa kadlawon, ang 200 ka mga maton ug mga sakop sa mangilugay og yuta nga si Caroline Piñeda sa Dalat/Purok 47, San Roque, Bangkal, Davao City aron ipatuman ang demolisyon. Giguba ug giransak sa mga badigard ang 20 ka balay sa maong komunidad. Ang insidente kabahin sa serye sa demolisyon sugod pa niadtong Disyembre 2024.

Sa Laguna, gimakmak sa mga residente ang pag-abot niadtong Enero 31 sa 8-10 ka mga tawong demolition team sa Barangay Nueva, San Pedro, Laguna aron ipatuman ang demolisyon sa baybay riles. Niadtong Enero 7, nagpahimangno ang Department of Transportation sa mga lokal nga sila palayason sa maong adlaw bisan pa sa kawalay “court order” alang sa demolisyon.

Pugos nga pagpasurender. Narekord ang lain na usab nga serye sa militarisasyon ug pugos nga “pagparehistro” sa Philippine Army sa mga mangingisdang sakop sa Timek La Union sa Barangay San Manuel Norte, Agoo, La Union niadtong Enero 20. Nataho ang paglibot-libot sa nakasibilyan nga pitong sakop sa Philippine Army sa nahisgutang barangay sa pagpanguna sa usa ka “Captain Fernandez.” Bitbit sa mga sundalo ang usa ka listahan nga naglangkub sa 30 ka ngalan sa mga kasamtangan ug kanhing sakop sa TIMEK La Union ug gipangita sila aron “irehistro” ang ilang organisasyon.

Sa Masbate, nagbubu og mga sundalo ang AFP sa magkasikbit nga mga barangay sa Baang, Sawmill, Barag ug Mapuyo sa lungsod sa Mobo, Masbate niadtong Enero 27 aron gukdon ug “pasurenderon” ang sibilyang ginganlag Sony Diamos.