Wala-untat ang mga paglapas sa tawhanon nga kinamatarung sang mga pwersa sang Armed Forces of the Philippines (AFP) kag Philippine National Police (PNP) batuk sa pumuluyong Pilipino sa nagligad nga mga semana.

Pagpangluthang. Sadtong Enero 19, naigo kag napilasan sa likod ang 61-anyos nga anay barangay kagawad kag mangunguma nga si Marcial Detalo sa patarasak nga pagpangluthang sang mga suldado sang 2nd IB sa Sityo Balunos, Barangay Rizal, Dimasalang, Masbate. Para hinabunan ang krimen kag pagsapeligro sa mga sibilyan, malisyoso nga ginpahayag sa midya sang 2nd IB nga na-igo sang bala sang Bagong Hukbong Bayan (BHB)-Masbate si Detalo sa tunga sang ginapagwa nga isa ka engkwentro sa lugar.

Pag-aresto. Sadtong Enero 27, gin-aresto sang mga pwersa sang estado ang 70-anyos nga si Myrna Cruz-Abraham, beterano nga aktibista, sa San Rafael, Bulacan. Gindakop ang biktima sa dulot sang mandamyento de aresto nga ginpagwa sang isa ka korte sa Cagayan kaangot sang mga kaso nga paslaw nga pagpatay kag pagpatay. Ginreport sang mga grupo sa tawhanon nga kinamatarung nga nahilway si Cruz-Abraham pagkatapos ang walo ka adlaw.

“Terrorism financing.” Ginpasakaan sang mga hinimo nga kaso sang “pagpondo sa terorismo” ang lima ka aktibista halin sa Cagayan Valley. Ginkasohan sila ni Isabelo Adviento, lider mangunguma; Cita Managuelod nga peasant advocate; Agnes Mesina, koordineytor sang Makabayan Cagayan Valley; Jackie Valencia, tigpangapin sang tawhanon nga kinamatarung; kag si Deo Montesclaros, isa ka tigpamahayag. Tanan sila ang madugay na nga nagatib-ong sa kinamatarung kag kaayuhan sang pumuluyo sang Cagayan Valley kag sang pumuluyong Pilipino.

Demolisyon. Sa tunga sang pagpahuway sang mga residente, tuso nga naglusob sadtong Enero 29, alas-2 sang kaagahon, ang 200 ka maton kag tinawo sang manogpangagaw sang duta nga si Caroline Piñeda sa Dalat/Purok 47, San Roque, Bangkal, Davao City para ilunsar ang demolisyon. Ginguba kag ginransak sang mga maton ang 20 ka balay sa nasambit nga komunidad. Ang insidente ang kabahin sang serye sang demolisyon sugod pa Disyembre 2024.

Sa Laguna, ginsaway sang mga residente ang pag-abot sadtong Enero 31 sang 8-10 katawo nga demolisyon tim sa Barangay Nueva, San Pedro, Laguna para ipatuman ang pamahog nga demolisyon sa baybay riles. Sadtong Enero 7, naghatag sang paandam ang Department of Transportation sa mga lokal nga sila ang palayason sa amo nga adlaw sa pihak sang kawad-on sang “court order” para sa demolisyon.

Pwersahan nga pagpasungka. Nalista ang panibag-o nga serye sang militarisasyon kag pwersahan nga “pagparehistro” sang Philippine Army sa mga mangingisda nga katapo sang Timek La Union sa Barangay San Miguel Norte, Agoo, La Union sadtong Enero 20. Nabalita ang paglibot sang nakasibilyan nga pito nga tinawo sang Philippine Army sa nasambit nga barangay sa pagpanguna sang isa ka “Captain Fernandez.” Dala-dala sang mga suldado ang isa ka listahan nga naga-unod sang 30 ka pangalan sang mga subong kag anay katapo sang TIMEK La Union kag ginapangita sila para “irehistro” ang ila hugpong.

Sa Masbate, nagtampok sang mga suldado ang AFP sa magkalapit nga mga barangay sang Baang, Sawmill, Barag kag Mapuyo sa banwa sang Mobo, Masbate sadtong Enero 27 para lagson kag “pasungkaon” ang sibilyan nga ginhinganlan nga Sony Diamos.