Waray wantas an mga pagtalapas ha tawhanon nga katungod han mga pwersa han Armed Forces of the Philippines (AFP) ngan Philippine National Police (PNP) kontra ha katawhan Pilipino ha nakalabay nga mga semana.

Panmusil. Hadton Enero 19, naigo ngan nasamaran ha gutok an 61 anyos nga hadto anay barangay kagawad ngan parag-uma nga hi Marcial Detalo ha waray putas nga panmusil han 2nd IB ha Sityo Balunos, Barangay Rizal, Dimasalang, Masbate. Agud tahuban an ira krimen ngan pagbutang han mga sibilyan ha peligro, malisyoso nga iginpahayag ha midya han 2nd IB nga naigo han bala han Bagong Hukbong Bayan (BHB)-Masbate hi Detalo ha butnga han ginpapagawas nga usa nga engkwentro ha lugar.

Pangaresto. Hadton Enero 7, gin-aresto han mga pwersa han estado an 70 anyos nga hi Myrna Cruz-Abraham, beterano nga aktibista, ha San Rafael, Bulacan. Gindakop an biktima basar ha mandamyento de aresto nga iginpagawas han korte ha Cagayan kasumpay han mga kaso han pakyas nga pagpatay ngan pagpatay. Ginreport han mga grupo ha tawhanon katungod nga nakagawas hi Cruz-Abraham kahuman han walo kaadlaw.

“Terrorism financing.” Ginsalawdan hin mga hinimu-himo nga kaso han “pagpondo ha terorismo” an lima nga aktibista ha Cagayan Valley.

Ginkasuhan hira Isabelo Adviento, lider parag-uma; Cita Managuelod nga peasant advocate; Agnes Mesina, koordineytor han Makabayan Cagayan Valley; Jackie Valencia, tagadepensa han tawhanon nga katungod; ngan hi Deo Montesclaros, usa nga mamamahayag. Ngatanan hira maiha na nga nag-uundong ha katungod ngan kaupayan han katawhan han Cagayan Valley ngan katawhan Pilipino.

Demolisyon. Ha butnga han pamahuway han mga residente, patraydor nga umatake hadton Enero 29, alas-2 han kaagahon, an 200 nga maton ngan tawuhan han parupanlupot han tuna nga hi Catherine Piñeda ha Dalat/Purok 47, San Roque, Bangkal, Davao City agud ipatuman an demolisyon. Ginruba ngan ginrekisa han mga maton an 20 nga balay ha nasering nga komunidad. Kaparte an panhitabo han serye han demolisyon tikang pa han Disyembre 2024.

Ha Laguna, ginsukna han mga residente an pag-abot hadton Enero 31 han 8-10 katawo nga demolisyon tim ha Barangay Nueva, San Pedro, Laguna para ipatuman an ginhulga nga demolisyon ha ligid han riles. Hadton Enero 7, naghatag hin pahimatngon an Department of Transportation ha mga residente nga palalayason hira hiton nga adlaw ha luyo han kawaray hin “court order” para ha demolisyon.

Piniritay nga pagpasurender. Nahilista an panibag-o nga serye han militarisasyon ngan pirit nga “pagparehistro” han Philippine Army ha mga parupangisda nga kaapi han Timek La Union ha Barangay San Manuel Norte, Agoo, La Union hadton Enero 20. Nahireport an paglinibot ha nasering nga barangay han pito nga nakasibilyan nga tawuhan han Philippine Army ha pangunguna ni “Captain Fernandez.” Dara-dara han mga sundalo an usa nga listahan nga nag-uunod han 30 nga ngaran han presente ngan daan nga mga kaapi han TIMEK La Union ngan ginbibiling hira agud kunuhay “iparehistro” an ira asosasyon.

Ha Masbate, nagtambak hin mga sundalo an AFP ha magkaraknit nga mga barangay han Baang, Sawmill, Barag ngan Mapuyo ha bungto han Mobo, Masbate hadton Enero 27 para lanaton ngan “pasurenderon” an sibilyan nga nagngangaran nga Sony Diamos.