Ha usa nga prente ha Cordillera, nagresulta an gin-antum nga diri madadayon nga pagsalin-urog han anibersaryo han Partido Komunista ng Pilipinas hadton Disyembre 26, 2024 ha usa nga pyesta han pagkaurusa ngan pag-aram han mga Pula nga mangaraway ngan masa.

Ludlod ha kakurian an masa ha Barangay Ranyag (Liwanag) nga naabutan han mga kasama. Bagsak an tinuig nga ani han humay tungod ha grabe nga kathuraw nga ginsundan han parada han mga bagyo nga nanlasurbo ha rehiyon. Nalimitahan liwat an libre nga pagdulhog han masa ha mga sentro nga bungto para makapamalit han ira mga panginahanglan tungod ha pan-gigipit ngan waray wantas nga operasyon han AFP.

Tungod hini, diri malikyan han pira nga kasama nga mabaraka kun tiunan-o hihimuon an selebrasyon. Ano an ira ipapakaon, labi nga nag-imbita hira han mga parag-uma? Sanglit aga han ika-26 han Disyembre, waray na anay magdekorasyon an mga Pula nga mangaraway.

Kundi han kinakulupan, tigda nala nga tinunog an ira warning device. Tikang ha kakahuyan, patag-usa nga binutbot an mga taga-Baryo Ranyag.

“Mga kasama, para masieguro an aton seguridad waray na namon kamo pakadtua ha kabablayan. Kami na la an kumadi ha iyo para madayon an selebrasyon han anibersaryo han Partido,” paliwanang ni Ka Cesar, an lider han grupo. Kaupod niya an iya asawa ngan anak. Dara nira an dako nga putos han minuron ngan usa kabalde han ginat-an nga hulog-hulog. Aada ha likod ni Ka Cesar an iba pa nga taghimaryo nga may dara nga ispageti ngan igsurungo.

Madagmit nga nagdekorasyon ngan iginpadayon han mga kasama an gin-andam nga programa. Ha porma han mga drama, luwa, kanta ngan haglipot nga pamulong, iginladawan nira an natikagrabe nga krisis ha panginabuhi nga gin-aantos han katawhan Pilipino, an natikapintas nga sumpakiay giutan ni Marcos ngan Duterte, ngan an paggamit han imperyalismo nga US ha bagakolonya hini (kalakip an Pilipinas) para atuhan an China.

Iginladawan nira an paghahadi han mga nasyunal ngan lokal nga dinastiya han mga burukrata-kapitalista ha karikuhan han prubinsya, samtang tinuyo nga ginpapasibay-an nga kulang ha mga pankatilingban nga serbisyo an katawhan. Gindun-an liwat ha mga pasundayag an importansya han padayon nga pagpartisipar han masa ha rebolusyon para bag-uhon an ira kamutangan.

“Katugunanan han amon amay nga mayuyuon namon an mga kasama tungod kay kamo an tinuod nga naugop ha amon nga mga kablas. Amo ini an katugunanan nga magigin sulundanon namon ha amon mga anak ngan apo,” estorya ni Dani, usa ha mga tumambong ha selebrasyon. “Maaram kami nga an amon kusog aada ha pagkaurusa ngan duruyog nga paggios.”

Waray umuli dayon an taghimaryo kahuman han selebrasyon. Ginhimo nira an asembleya para bug-uson an lokal nga tsapter han Pambansang Katipunan ng mga Magbubukid ngan ginplanuhan an duruyog nga paghulad ha usa nga parte han ira komunal nga katunaan. Ginkaurusahan nira kun tiunan-o organisado nga aatuhan an gin-aantum nga atake han operasyon militar ngan pagbalik han RCSP.

Ha sinunod pa nga mga adlaw, magkalain-lain nga ispesyal nga kurso ngan pag-aram ilarum han Padepa (Pambansa-demokratikong Paaralan) an iginlansar ha base han BHB.

Kada adlaw may naabot ha base han mga Hukbo—ngaduha mga kabatan-unan ngan kalagsan. Dinayo an iba para magpabulig ha mga asignatura, an iba para ha simple nga sarusaruay. Ginpabalunan hira han mga mangaraway hin paglaum, kalakip han mga gin-ukit tikang ha kahoy nga luwag ngan pambayo.

Ha urhi nga adlaw han mga kasama ha lugar, nagtangpos hin batakan nga oryentasyon ha Partido an mga lokal nga aktibista nga gin-organisa ha usa nga sanga han Partido ha lokalidad.

“Mga kasama, hul-os niyo nga naipaklaro an bug-os nga Programa han Partido. Waray kami anuman nga pagruhaduha nga magin kaapi hini,” pahayag ni Ka Cesar ha pagtikang han ira pagsumpa ha atubangan han bandera hini.

Ha ira paggikan ha Baryo Ranyag, ginhinumdom han mga kasama an ira mga kabaraka. Hukas-ha-kasingkasing nira nga ginhangkop an mga leksyon han ira eksperyensya: Pirme, ha ngatanan nga higayon, tumapod ha masa.