Sa usa ka nataran sa Cordillera, ang gitoohang madilatar nga selebrasyon sa anibersaryo sa Partido Komunista ng Pilipinas niadtong Disyembre 26, 2024 misaangpot sa usa ka pyesta sa panaghiusa ug pagtuon sa mga Pulang manggugubat ug masa.

Nag-ilaid sa kalisud ang masa sa Barangay Ranyag (Liwanag) nga naabtan sa mga kauban. Nihit ang tinuig nga abot sa humay tungod sa grabeng hulaw nga gisundan sa parada sa mga bagyo nga miigo sa rehiyon. Nalimitahan usab ang gawasnong pag-adto sa masa sa mga sentrong lungsod aron makapamalit sa mga panginahanglanon tungod sa pagpamig-ot ug walay hunong nga mga operasyon sa AFP.

Tungod niini, dili malikayan sa pipila ka mga kauban nga mabalaka kung unsaon pagpahigayon ang selebrasyon. Unsa ang ilang ipakaon dihang nag-imbita man sila og mga mag-uuma? Busa sa buntag sa ika-26 sa Disyembre, wala na una nagpreparar ang mga Pulang manggugubat.

Apan pagkahapon, kalit na lang mibagting ang ilang warning device. Gikan sa kakahuyan, usa-usa nga mitunga ang mga taga-Baryo Ranyag.

“Mga kauban, aron masiguro ang atong seguridad, wala namo kamo paadtoa sa kabalayan. Kami na lang ang miduaw kaninyo aron madayon ang selebrasyon sa anibersaryo sa Partido,” pagpasabot ni Mang Cesar, ang lider sa grupo. Kauban niya ang iyang asawa ug anak. Dala nila ang dakung selopin sa suman ug usa ka balde nga bilu-bilo. Sa likod ni Mang Cesar ang ubang mga tagabaryo nga nagdala og ispageti ug sugnod.

Dali-daling nangandam ug gipadayon sa mga kauban ang giandam nga programa. Sa porma sa mga drama, balak, kanta ug mugbong mga pakigpulong, gipakita nila ang nagkagrabeng krisis sa panginabuhi nga giantus sa katawhang Pilipino, ang nagkalalum nga panagbangi tali ni Marcos ug Duterte, ug ang paggamit sa imperyalismong US sa mga neokolonya niini (lakip na ang Pilipinas) aron hagiton ang China.

Gipakita nila ang pagkawkaw sa mga nasudnon ug lokal nga dinastiya sa mga burukrata-kapitalista sa bahandi sa prubinsya, samtang tinuyo nga gipasagdan nga kulang sa mga katilingbanong serbisyo ang katawhan. Gihatagan usab og duut sa mga pasundayag ang kamahinungdanon sa padayon nga pagsalmot sa masa sa rebolusyon aron usbon ang ilang kahimtang.

“Ang tugon sa among amahan mao nga ampingan namo ang mga kauban tungod kay kamo ang tinuod nga nagpakabana sa among mga kabus. Kini usa ka tugon nga among ikabilin sa among mga anak ug apo,” saysay ni Dani, usa sa mga mitambong sa selebrasyon. “Nasayod kami nga ang among kusog anaa sa panaghugpong ug hiniusang paglihok.”

Wala dayon miuli ang mga tagabaryo human sa selebrasyon. Gilunsad nila ang asembliya aron tukuron ang lokal nga balangay sa Pambansang Kalipunan ng mga Magsasaka ug giplanuhan ang hiniusang bungkalan sa usa ka luna sa ilang komunal nga yuta. Giuyunan nila kung unsaon nga organisadong batukan ang gailaumang atake sa mga operasyong militar ug pagbalik sa RCSP.

Sa misunod pang mga adlaw, lain-laing mga espesyal nga kurso ug pagtuon ubos sa Padepa (Pambansa-demokratikong Paaralan) ang gilunsad sa pwesto sa BHB.

Adlaw-adlaw adunay nagaduaw sa lokasyon sa mga Hukbo—parehong mga batan-on ug tigulang. Miduaw ang uban aron magpatabang sa mga asignatura, ang uban alang sa yanong istoryahanay. Gipabalonan sila sa mga manggugubat og paglaom, kauban ang mga kinulit gikan sa kahoy nga sandok ug alho.

Sa katapusang adlaw sa mga kauban sa lugar, migradwar sa batakang oryentasyon sa Partido ang mga lokal nga aktibista nga giorganisa sa usa ka sanga sa Partido sa lokalidad.

“Mga kauban, gipatin-aw ninyo sa hingpit ang Programa sa Partido. Wala mi pagduhaduha nga mahimong myembro niini,” pahayag ni Mang Cesar sa sinugdanan sa ilang panumpa sa atubangan sa bandila niini.

Sa ilang pagbiya sa Baryo Ranyag, gibalik-balikan sa mga kauban ang ilang mga kabalaka. Kinasingkasing nilang giabi-abi ang leksyon sa ilang kasinatian: Kanunay, sa tanang panahon, mosalig sa masa.