Sa isa ka larangan sa Cordillera, ang ginkahangaw-an nga maatrasar nga selebrasyon sang anibersaryo sang Partido Komunista ng Pilipinas sadtong Disyembre 26, 2024 ang nangin isa ka pyesta sang paghiliugyon kag pagtuon sang mga Pulang hangaway kag masa.

Lubong sa kapigaduhon ang masa sa Barangay Ranyag (Liwanag) sang naabtan sang mga kaupod. Hagmak ang tuigan nga ani sang humay tungod sa grabe nga tigbalagtik nga ginsundan sang parada sang mga bagyo nga nangdalasa sa rehiyon. Nalimitahan man ang hilway nga pagkadto sang masa sa mga sentro nga banwa para makapamakal sang mga kinahanglanon tungod sa pagpang-ipit kag wala-pugong nga mga operasyon sang AFP.

Tungod diri, indi malikawan sang pila ka kaupod nga magkabalaka kung paano tigayunon ang selebrasyon. Ano ang ila ipakaon, sa amo nga nag-imbita sila sang mga mangunguma? Amo nga sang aga sang ika-26 sang Disyembre, wala na danay naghimus ang mga Pulang hangaway.

Apang pagkahapon, gulpi na lang naghuni ang ila nga warning device. Halin sa kakahuyan, isa-isa nga nagpakita ang mga taga-Baryo Ranyag.

“Mga kaupod, para masigurado ang aton nga seguridad wala na namon kamo ginpakadto sa kabalayan. Kami na lang ang nagkadto sa inyo para madayon ang selebrasyon sang anibersaryo sang Partido,” paathag ni Tiyoy Cesar, ang lider sang grupo. Upod niya ang iya nga asawa kag bata. Dala nila ang dako nga suludlan sang ibus kag isa ka balde sang alupe. Sa likod ni Tiyoy Cesar ang iban pa nga tagabaryo nga may dala nga ispageti kag panggatong.

Dali-dali nga naghimus kag gindayun sang mga kaupod ang ginpangandaman nga programa. Sa porma sang mga drama, binalaybay, kanta kag malip-ot nga pamulong-pulong, ginpakita nila ang nagalala nga krisis sa palangabuhian nga gina-agyan sang pumuluyong Pilipino, ang nagabaskog nga bangigay sa tunga ni Marcos kag Duterte, kag ang paggamit sang imperyalismong US sa mga neokolonya sini (kabahin ang Pilipinas) agud batuan ang China.

Ginpakita nila ang paghari sang mga pungsodnon kag lokal nga dinastiya sang mga burukrata-kapitalista sa manggad sang prubinsya, samtang hungod nga ginapatumbayaan nga uhaw sa mga serbisyong pangkatilingban ang mga pumuluyo. Ginhatagan man sang tum-ok sa mga pasundayag ang kabilidhon sang padayon nga pagpakigbahin sang masa sa rebolusyon agud mabag-o ang ila kahimtangan.

“Ang tugon sang amon tatay nga atipanon namon ang mga kaupod tungod kamo ang matuod nga naga-ulikid sa amon nga mga imol. Ini ang panugyan nga ipanubli namon sa amon mga kabataan kag apo,” panaysayon ni Dani, isa sa mga nagtambong sa kahiwatan. “Kahibalo kami nga ang amon kusog ang yara sa paghiliugyon kag ululupod nga paghulag.”

Wala gilayon nagpauli ang tagabaryo pagkatapos sang selebrasyon. Gintigayon nila ang asembliya para tukuron ang lokal nga sanga sang Pambansang Kalipunan ng mga Magsasaka kag ginplanuhan ang ululupod nga bungkalan sa isa ka bahin sang ila komunal nga duta. Ginkasugtan man nila kung papaano nga organisado nga batuan ang ginalauman nga hampas sang mga operasyon militar kag pagbalik sang RCSP.

Pagkasunod nga mga inadlaw, nagkalain-lain nga espesyal nga kurso kag pagtuon sa idalom sang Padepa (Pambansa-demokratikong Paaralan) ang ginlunsar sa pwestuhan sang BHB.

Adlaw-adlaw may nagakadto sa ginakampohan sang Hukbo-lunsay mga pamatan-on kag edaran. Nagkadto ang iban pagpabulig sa mga sabdyek, ang iban para sa simple nga hinun-anon. Ginpabalunan sila sang mga hangaway sang paglaum, upod na ang mga kinulit nga mga kahoy nga sandok kag pambayo.

Sa ulihi nga adlaw sang mga kaupod sa lugar, nakatapos sang sandigan nga oryentasyon sa Partido ang mga lokal nga aktibista nga gin-organisa sa isa ka sanga sang Partido sa lokalidad.

“Mga kaupod, napaathag ninyo sang bug-os ang Programa sang Partido. Wala kami sang ano man nga pagpangduha-duha nga mangin katapo sini,” pahayag ni Tiyoy Cesar sa panugod sang ila pagpanumpa sa atubang sang bandera sini.

Sa ila paghalin sa Baryo Ranyag, ginbalikan sang mga kaupod ang ila mga kabalaka. Bug-os tagipusuon nga ginhakos ang leksyon sang ila inagihan: Permi, sa tanan nga higayon, magsalig sa masa.