Sa hugot nga pagtabang sa masa, malampusong napahigayon sa Bagong Hukbong Bayan (BHB)-Rizal (Narciso Antazo Aramil Command) ang pagsaulog sa ika-56 nga anibersaryo sa Partido Komunista ng Pilipinas sa prubinsya. Mitambong sa panagtapok ang mga myembro sa Partido ug mga rebolusyonaryong pwersa gikan sa sektor sa mga mag-uuma, kababayen-an, kabatan-onan-estudyante, mamumuo ug mga kabus sa kasyudaran. Nahimo kini sa taliwala sa grabeng operasyong militar sa gerilyang nataran.

Sa panagtapok, gilunsad ang pormal nga pagtuon sa pamahayag sa Komite Sentral alang sa anibersaryo diin kapin 50 ka tawo gikan sa kabanikanhan ug kasyudaran ang mitambong. Sa diwa sa kalihukang pagtul-id, kritikal ug mapaubsanong gitumbok sa pagtuon ang mga naglungtad pa gihapong mga kahuyangan nga kinahanglang patigbabawan sa kalihukang masa ug armadong pakigbisog.

Nagpahigayon usab og mga kulturanhonh pasundayag ang Pulang Bandila sa BHB-Rizal ug ang mga mitambong nga rebolusyonaryong pwersa. Gipakita usab sa pagsaulog ang paghimo og mga biswal nga arte sa mga manggugubat ug mga rebolusyonaryong pwersa gikan sa kasyudaran mahitungod sa tema sa pamahayag sa Partido ug pagpalambo sa kalihukang pagtul-id. Daghan sa mga mitambong ang unang higayon nga nakasulod sa yunit sa BHB.

Human sa tanan, naglunsad ang yunit og “kapehan” sa temang “ang papel sa kabatan-onan sa kalihukang pagtul-id”. Sa pagpuli-puli sa pamahayag ug awit gikan sa mga Pulang manggugubat ug rebolusyonaryong pwersa, gipaambit ang kamahinungdanon sa kalihukang pagtul-id ug kung giunsa kini gipatuman sa matag usa.

Sumala sa mga bisita, nahimong pamatuod ang aktibidad nga walay pulos ang gipamulong sa reaksyunaryong estado nga nagkahuyang na ang rebolusyonaryong kalihukan. Sa pagtapos sa programa, daghan ang nagpadayag sa ilang tinguha nga magpabilin aron makigsandurot sa hukbong bayan.