Sa Pebrero 8, pagasaulogon sang pumuluyong Pilipino ang ika-86 nga kaadlawan ni Kaupod Jose Maria Sison, tigpangulo nga tigtukod sang Komite Sentral sang Partido Komunista ng Pilipinas (PKP). Duha ka tuig na ang nagligad halin sang nagtaliwan si Ka Joma, apang nagpabilin sa gihapon siya nga inspirasyon sa mga pamatan-on kag bilog nga katawhan. Ang ginbilin niya nga manggaran nga baul sang mga pagtulun-an kag palanubli-on ang kabahin subong sa nagserbe nga pundasyon kag giya sa ginasulong nga kahublagan panadlong sang Partido kag bug-os nga rebolusyonaryong kahublagan.

Kabahin sa mga leksyon nga ini ang kakinahanglanon nga maukod nga makigbanggi sa mga kontra-rebolusyonaryo nga ideya, nga nagapanguna nga makit-an sa Una at Ikalawang Dakilang Kilusang Pagwawasto (IDKP). Ini ang ginhatagan tum-ok ni Ka Luis Jalandoni, isa sa pamunuan nga upisyal sang National Democratic Front of the Philippines kag malawig nga panahon nga kaupod ni Ka Joma. Gintumod ni Ka Luis ang partikular kag krusyal nga papel ni Ka Joma sa pagsulong sang IDKP sa pag-andam sang balayon sang dokumento nga “Muling Pagtibayin ang Ating mga Saligang Prinsipyo at Iwasto ang mga Pagkakamali.”

“Sa panahon nga ini, madamo sang nagkalain-lain nga ideya ang nanalupsop sa aton nga rebolusyonaryong kahublagan. Ang mga pagsayop nga natumod sa dokumento sang panadlong ang naka-impluwensya sa paminsaron kag ideolohiya sang mga kaupod,” suno kay Ka Luis. Dugang pa niya, mangin ang mga kaupod sa Netherlands, kung sa diin sila nakadistyero, ang wala nakaluwas sa impluwensya sang sayop nga mga ideya nga ini.

Saysay niya, may yara sang mga yabi nga lider kag nagapanguna sadto sa organisasyon sa Europa ang “nagadala sang linya sa ideolohiya nga kabaliskaran sa linya sang dokumento sang panadlong.” Paathag pa ni Ka Luis, tuman ka budlay nga hugna para sa ila ang panahon sang pagpaninguha nga ipaathag ang dokumento nga “Muling Pagtibayin,” kag buyukon ang mga kaupod sa Netherlands nga hangpon ang kabilidhon sini.

Ginbahin man niya ang kaso sang isa ka anay kaupod nga nagsaway sa kahublagan panadlong sandig sa opinion sang iya mga abyan, sa baylo nga tun-an kag bukaron ang dokumento nga ginpagwa sang Partido. Dugang pa ni Ka Luis, sa amo man nga hugna nagtuhaw sa Netherlands ang bansag nga “kontras” sa mga “rejectionist” ukon nagsikway sa kahublagan panadlong.

“Kung wala nahitabo ang IDKP, wala ko nahibaluan kung ano ang posible nga nahitabo sa aton nga rebolusyonaryong kahublagan,” suno kay Ka Luis. Gintumod kag gintadlong sang Partido sadtong IDKP ang mayor nga mga pagsayop nga nagluntad sa kahublagan sa sulod sang malawig nga tinuig. Kabahin sa mga pagsayop nga ini ang linya sang “estratehiko nga kontra-opensiba” nga kabaliskaran sa tatlo ka halintang sang inaway banwa. Sadtong dekada 1980 sa Mindanao, adelantado nga nagtukod sang dalagko nga pormasyon militar nga kabangdanan sang pagbuya sa hilikuton masa kag nagbunga sang dako nga kahalitan.

“Sa baylo nga tukibon kung ngaa nahitabo ang kasubong sadto, ang konklusyon sang mga kontras nga tungod may yara sang mga espiya sa kahublagan (ukon mga Deep Penetrating Agent). Nagpadulong ini sa pinakamapait nga panahon sa aton nga rebolusyonaryong maragtas,” panaysayon ni Ka Luis.

Pareho sang kahublagan panadlong sa ginalunsar subong sang Komite Sentral, ang IDKP sa kaidadalman ang isa ka kahublagan pagtuon. Ang kakulangan sa hilikuton pang-ideolohiya sa malawig nga tinuig ang nagbunga sa seryoso nga mga pagsayop.

“Sa ulihi, gamay nga porsyento lang sang rebolusyonaryong kahublagan ang nagsaway sa kahublagan panadlong. Ang nabilin ang nagpaidalom sa panadlong sa ideolohiya, pulitika kag organisasyon. Nagbaskog ang BHB. Nagbukas ang madamo nga larangan gerilya sang hukbo. Liwat naton nabawi ang salig sa aton sang masa,” suno kay Ka Luis.

Tugda ni Ka Luis, tuman ka manggaran sang baul sang pagtulun-an nga ginbilin sa aton ni Ka Joma. Sugod sa pagkatukod sini, pagtumod sa mga sayop, kag pagsulong matapos ang mga kahublagan panadlong. “Sa iya ulihi nga mensahe sa aton, ginhambal niya: Indi maperdi ang Pungsodnon Demokratiko nga Rebolusyon sang pumuluyong Pilipino!”