Ha Pebrero 8, igseselebrar han katawhan Pilipino an ika-86 nga kaadlawan ni Kasamang Jose Maria Sison, tagapangulo nga tagapagtukod han Komite Sentral han Partido Komunista ng Pilipinas (PKP). Duha katuig na an nakalabay tikang han mamatay hi Ka Joma, kundi nagpapabilin pa gihap hiya nga inspirasyon ha mga kabatan-unan ngan bug-os nga katawhan. An nahibilin niya nga baul-karikuhan han mga leksyon ngan pamana kaparte yana ha nagseserbe nga pundasyon ngan giya ha iginpapasulong nga kagiusan nga pagtutul-id han Partido ngan bug-os nga rebolusyunaryo nga kagiusan.

Kalakip hini nga mga leksyon an panginahanglan nga pursigido nga makigsumpaki ha mga kontra-rebolusyunaryo nga ideya, nga nagin landaw ha Syahan ngan Ikaduha nga Dakila nga Kagiusan nga Pagtutul-id (IDKP). Ini an gintagan-duon ni Ka Luis Jalandoni, usa ha namumuno nga upisyal han National Democratic Front of the Philippines ngan maiha nga panahon nga sangkay ni Ka Joma. Gintudlok ni Ka Luis an partikular ngan krusyal nga papel ni Ka Joma ha pagpasulong han IDKP ha pangandam han borador han dokumento nga “Utro nga Padig-unon an Aton mga Batakan nga Prinsipyo ngan Itul-id an mga Pagsasayop.”

“Hini nga panahon, damo nga magkalain-lain nga mga ideya an namahot-pahot ha rebolusyonaryo nga kagiusan. Ini nga mga natudlok nga kasaypanan ha dokumento han pagtutul-id, nakaimpluwensya ha panhunahuna ngan ideolohiya han mga kasama,” sigon kan Ka Luis. Dugang pa niya, bisan an mga kasama ha Netherlands, kun diin hira nakadistyero, waray matalwas ha impluwensya hini nga mga sayop nga ideya.

Estorya niya, mayda mga yawe nga lider ngan nangunguna hadto ha organisasyon ha Europa an “nagdadara na han linya ha ideolohiya nga sukwahi ha linya han dokumento han pagtutul-id.” Pag-eksplikar pa Ka Luis, para ha ira makuri ura-ura an panahon han panalinguha nga maipaklaro an dokumento nga “Utro nga Padig-unon,” ngan aghaton an mga kasama ha
Netherlands nga santupon an importansya hini.

Iginpasaro liwat niya an kaso han usa nga dati nga kasama nga nagsukna ha kagiusan nga pagtutul-id basar ha pagkita han iya mga sangkay, imbes nga pag-adman ngan analisaron an dokumento nga gin-gawas han Partido. Dugang pa ni Ka Luis, hini nga panahon linutaw liwat ha Netherlands an bansag nga “kontras” ha mga “rejectionist” o kumontra ha kagiusan nga pagtutul-id.

“Kun waray mahitabo an IDKP, diri ako maaram kun ano an posible nga nahitabo ha aton rebolusyunaryo nga kagiusan,” sigon kan Ka Luis. Gintudlok ngan gintul-id han Partido hadton IDKP an mayor nga mga kasaypanan nga ineksister ha kagiusan ha sakob hin damo nga tuig. Kaparte hini nga mga kasaypanan an linya han “estratehiko nga kontra-opensiba” nga sukwahi ha tulo kabalitang han gerra han katawhan. Hadton dekada 1980 ha Mindanao, diri napapanahon nga nagtukod hin dagko nga pormasyon militar nga hinungdan han pagbul-iw ha buruhaton masa ngan nagresulta han dagko nga destroso.

“Imbes nga analisaron kun kay ano nahinugad, an kongklusyon han mga kontras tungod kay mayda mga espiya ha kagiusan (o mga Deep Penetration Agent). Nagresulta ini ha pinakamagpait nga panahon ha aton rebolusyonaryo nga kasaysayan,” estorya ni Ka Luis.

Sugad han presente nga kagiusan nga pagtutul-id nga ginlalansar han Komite Sentral, an IDKP ha pinakaubod usa nga kagiusan nga pag-aram. An kakulang ha pan-ideolohiya nga buruhaton ha damo nga tuig nagbunga ha seryoso nga mga pagsasayop.

“Ha katapusan, guti nga porsyento la han rebolusyunaryo nga kagiusan an kumontra ha kagiusan nga pagtutul-id. An nahibilin nagpailarum ha pagtutul-id ha ideolohiya, pulitika ngan organisasyon. Kinusog an BHB. Nag-abre han damo nga prente-gerilya han hukbo. Utro naton nga nabawi an pagtapod ha aton han masa,” sigon kan Ka Luis.

Estorya ni Ka Luis, puno kaupay hin leksyon an baul-karikuhan nga ginbilin ha aton ni Ka Joma. Tikang ha katukod hini, pagtudlok ha mga kasaypanan, ngan pagpasulong kahuman an mga kagiusan pagtutul-id. “Ha urhi niya nga mensahe ha aton, ginsering niya: Diri mapeperdi an Nasyunal Demokratiko nga Rebolusyon han katawhan Pilipino!”