Sa Pebrero 8, saulogon sa katawhang Pilipino ang ika-86 nga adlawng natawhan ni Kauban Jose Maria Sison, founding chairman sa Komite Sentral sa Partido Komunista ng Pilipinas (PKP). Duha ka tuig na ang nakalabay sukad mipanaw si Ka Joma, apan nagpabilin pa gihapon siyang inspirasyon sa mga kabatan-onan ug sa tibuok katawhan. Ang iyang gibilin nga bahandi sa mga pagtulun-an ug kabilin lakip karon sa nagsilbing pundasyon ug giya sa gipasiugdang kalihukang pagtul-id sa Partido ug sa tibuok rebolusyonaryong kalihukan.

Lakip sa mga pagtulun-an mao ang panginahanglan nga hingpit nga makigbatok sa mga kontra-rebolusyonaryong ideya, nga nahimong tataw sa Una ug Ikaduhang Bantungang Kalihukang Pagtul-id (IBKP). Kini ang gihatagan og gibug-aton ni Ka Luis Jalandoni, usa sa mga nangulong upisyal sa National Democratic Front of the Philippines ug dugay nang kaabag ni Ka Joma. Gitumbok ni Ka Luis ang partikular ug krusyal nga papel ni Ka Joma sa pagpasiugda sa IBKP, sa pag-andam sa borador sa dokumentong “Subling Palig-onon ang Atong mga Batakang Prinsipyo ug Tul-iron ang Kasaypanan.”

“Niining panahona, daghang lain-laing ideya ang mituhup sa atong rebolusyonaryong kalihukan. Ang mga kasaypanang natumbok sa dokumento sa pagtul-id nakaimpluwensya sa panghunahuna ug ideolohiya sa mga kauban,” matud ni Ka Luis. Dugang pa niya, bisan ang mga kauban sa Netherlands, diin sila nadestyero, dili luwas sa impluwensya niining sayop nga mga ideya.

Gisaysay niya, nga adunay mga yaweng lider kaniadto sa organisasyon sa Europa nga “nagdala na og linya sa ideolohiya nga sukwahi sa linya sa dokumento sa pagtul-id.” Pagpatin-aw pa ni Ka Luis, lisud kaayo nga yugto alang kanila ang panahon sa paningkamot nga ipasabot ang dokumentong “Subling Palig-onon,” ug kumbinsihon ang mga kauban sa Netherlands nga masabtan ang kamahinungdanon niini.

Gipaambit usab niya ang kaso sa usa ka kanhing kauban nga misupak sa kalihukang pagtul-id pinasikad sa pagtuo sa iyang mga higala, imbes nga tun-an ug susihon ang dokumentong gipagawas sa Partido. Dugang pa ni Ka Luis, sa maong yugto usab mitumaw sa Netherlands ang terminong “kontras” sa mga “rejectionist” o nagdumili sa kalihukang pagtul-id.

“Kung wala mahitabo ang IBKP, ambot lang kung unsay posibleng dangatan sa atong rebolusyonaryong kalihukan,” sumala ni Ka Luis. Gitumbok ug gitul-id sa Partido atol sa IBKP ang mga dagkung sayop nga milungtad sa kalihukan sulod sa daghang katuigan. Lakip sa maong mga sayop ang linya sa “estratehikong kontra-opensiba” nga sukwahi sa tulo ka hugna sa gubat sa katawhan. Niadtong dekada 1980 sa Mindanao, nagtukod og hilaw nga dagkung pormasyong militar nga maoy hinungdan sa pagbiya sa buluhatong masa ug miresulta sa dagkung kadaot.

“Imbes nga susihon kung nganong nahitabo kadto, ang konklusyon sa mga kontras kay tungod adunay mga espiya sa kalihukan (o mga Deep Penetration Agent). Misangpot kini sa labing pait nga panahon sa atong rebolusyonaryong kasaysayan,” asoy ni Ka Luis.

Sama sa kalihukang pagtul-id sa kasamtangan nga gipasiugdahan sa Komite Sentral, ang IBKP sa kinauyukan usa ka kalihukang pagtuon. Ang kakulang sa buluhatong pang-ideolohiya sulod sa daghang katuigan miresulta sa seryosong mga kasaypanan.

“Sa katapusan, gamay ra nga porsyento sa rebolusyonaryong kalihukan ang misaway sa kalihukang pagtul-id. Ang nahabilin mipailalum sa pagtul-id sa ideolohiya, pulitika ug organisasyon. Milig-on ang BHB. Nag-abli ang daghang gerilyang nataran sa hukbo. Nabawi nato pag-usab ang pagsalig sa atoa sa masa,” dugang ni Ka Luis.

Saysay ni Ka Luis, adunahan kaayo ang bahandi sa pagtulun-an nga gibilin kanato ni Ka Joma. Sugod sa pagkatukod niini, pagtumbok sa mga kasaypanan, ug pag-uswag human sa mga kalihukang pagtul-id. “Sa iyang katapusang mensahe kanato, siya miingon: Dili mabuntog ang Nasudnon Demokratikong Rebolusyon sa katawhang Pilipino!”.