Walay hunong ang pagpangatake sa reaksyunaryong estado sa kababayen-an sa ngalan sa gubat kontra-insurhensiya. Liboan ka kababayen-an ang biktima sa mga paglapas sa armadong mga pwersa niini, ilabina sa kabanikanhan. Kabahin sila sa mga komunidad nga gihari-harian sa militar ug ginabomba, ug ginapailalum sa blokeyo ug kontrol.

Sukad nga nakalingkod si Marcos Jr sa poder, dili moubos sa 23 ka kababayen-an ang gipatay sa mga ahente sa estado sa takuban sa gubat kontra-insurhensiya. Siyam kanila mga sibilyang giakusahang mga Pulang manggugubat ug gipatay sa gama-gamang mga engkwentro. Lakip dinhi silang Jelyn Deomo, Sheryl Dejomo ug Divina Ajitan nga gipatay sa 96th IB sa Masbate, ug ang mag-inahang Cristina Jacolbe ug iyang babayeng anak nga si Everlee nga gipatay sa 79th IB sa Negros Oriental. Ang uban mga Pulang manggugubat nga gidakop, gitortyur ayha gidayunan og patay, sama nilang Wilma Tiamzon, Hannah Cesista, Annabel Talon, Glorivic Belandres ug Kaliska Peralta.

Dili moubos sa 20 ka kababayen-an ang gidagit sa mga ahente ni Marcos Jr. Tulo kanila mao silang Elgene Mungcal, Ma. Elena Pampoza ug Lyngrace Martullinas, wala pa gilutaw hangtud karon. Pipila kanila ang nakaikyas sa kamot sa mga sundalo, sama nina Jhed Tamano, Jonila Castro, Rowena Dasig ug Dyan Gumanao. Ang uban sekretong gipriso sa kampo militar sama nilang Mariel Rebato ug Monica Ogacho, uban ang ilang mga batang anak.

Tinuyong ginatarget sa mga sundalo ang mga mabdos o bag-o lang nanganak nga gidudahan nilang Pulang manggugubat o asawa sa Pulang manggugubat aron pugson silang mosurender uban ang ilang mga bana. Usa dinhi si Cherilyn Rebita, nga gidagit gikan sa gisak-an niyang balay ug sekretong gipriso hangtud manganak. Gikidnap sa mga sundalo ang iyang anak aron pugson siyang ipasurender ang iyang bana nga usa usab ka Pulang manggugubat.

Sa mga komunidad sa mag-uuma nga giukopa sa militar, nagpasiugda ang mga sundalo sa pagpangyatak sa kababayen-an. Dili moubos sa walo ka kaso sa pagpanglugos ang nataho sa mga komunidad sa Northern Samar, Camarines Norte, Batangas ug Oriental Mindoro. Menor-de-edad ang biktima sa duha ka kaso. Duha usab ang nagtaho nga adunay laing sundalong nagsilbing “look out” samtang ginahimo ang krimen.

Gikan Hulyo 2022 hangtud Enero, dili moubos sa 27 ka kababayen-an ang giaresto sa rehimeng Marcos sa gama-gamang kaso sa illegal possession of firearms and explosives ug gilambigit sa armadong kalihukan. Daghan kanila ang tigulang na, sama nilang Presentacion Saluta, 63; Dolores Rapsing Belibit, 70; Adora Faye de Vera, 66; ug pinaulahi, si Myrna Cruz-Abraham, 69. Silang de Vera ug Cruz-Abraham nakagawas na, apan mas daghan ang napriso pa sa lain-laing bahin sa nasud.