Naduso sa 74 ka oras nga welga sa Nexperia Philippines Inc. Workers Union ang kapitalista sa multinasyunal nga kumpanya nga hatagan og konsesyon ang mga mamumuo sa pagkignegosasyon niini alang sa bag-ong collective bargaining agreement (CBA). Miagaray ang kapitalista human mikabat sa gibanabanang ₱1.26 bilyon ang nawalang kita sa kumpanya tungod sa welga gikan Marso 5 sa hapon hangtud Marso 8.

Gisugat og suporta ang mga welgista sa mga sama nilang mamumuo ug ubang organisasyon gawas sa Light Industry and Science Park 1 sa Cabuyao City, Laguna. Nakab-ot sa unyon ang pagbalik sa trabaho sa pangulo sa NPIWU nga si Mary Ann Castillo ug usa pa ka upisyal sa unyon nga gisisante. Nakuha usab sa unyon ang dugang nga ₱17 kada adlaw alang sa 2024, ₱19 alang sa 2025, ₱21 alang sa 2026 ug ₱20,000 signing bonus. Tin-aw usab nga gisulti sa kasabutan nga ginabawal ang unsamang lakang pagpanimalos sa mga mamumuong misalmot sa welga.

Matud kang Castillo, nagmadaugon ang ilang welga tungod kay daghan ang nahigmata sa kahimtang sa mga mamumuo sa Nexperia ug nakighiusa sa ilang pakigbisog. Dugang pa niya, midaku ang kadasig sa mga unyonista ug andam silang labaw pang mosukol alang sa ilang mga katungod.